Mitteko 14 - Mawu a Mulluku

Paulo ni Baranaba o Ikonio

¹ Ddeko ddeereye o Antiyokeya* ddaheereyattho o Ikonio. Paulo ni Baranaba yaavollowa mu enyumba yamavekello nave ellalleya wawi Ayuda anchichi owaakattho athu ayo ehiri Ayuda yaakhulupilila.

² Nave Ayuda ayo yahikhulupililaayo yaaweeriha athu ayo ehiri Ayudaayo wi ekanganganeke ni athu yakhulupililaayo.

³ Koma Paulo ni Baranaba yaakhallawo enthawi yoorekama, ellalleyaka moollipa murima dda Apwiya. Apwiya yaakhalla mboni a othengiiwa wa echisomwiiwa vawaavahani masiva aweera ezizindikiro ni ddoottikhiniha.

⁴ Athu ookhalla m'muzindanimmo yaakawaneya, amodda yaari ni Ayuda nave amodda yaari ni Paulo owaaka Baranaba.

⁵ Vano athu ayo ehiri Ayuda ni Ayuda vamodda ni attekweeniiwa yahiiwanana wi yawuukuthe Paulo ni Baranaba ni owiipha vawaavokhani malluku.

⁶ Amurummwaayo yadduwenlliiwa ddenndda, yaathawella o mizinda dda Listara ni Derbe mu echigawo ya Likaoniya ni mapuro oowaapheella mizindannddo.

⁷ Wenko yaallalleyawottho othenga waphaama.

Paulo ni Baranaba o Listara ni Derbe

⁸ Vano o Listara waakhalla muthu mmodda oyo aari ookhwa meto eyariwellwaaye nave khaawora weeta.

⁹ Muthooyo aamwiiwa Paulo allotaka. Vano Paulo aamuwehesesa nave ahoona wi muthooyo annakhulupilila wawi ttuuwora ochira.

¹⁰ Sika Paulo aallota mookhuwa wi, “Iimella ni manyallwaawo!” Muthooyo aallupha nave aamba weeta.

¹¹ Athwaayo yoonilliiwa eerille Paulonnddo, yahaamba okhuwa mu ellotellwiiwa ya Elikaoniya wi, “Milluku ddawooneya wonanko athu ddoonikitthella!”

¹² Baranaba yaamuvaha nnddina nawi Zeyasi navettho Paulo nnddina nawi Heremesi vawi aari oohoollella voollotani.

¹³ Enyumba yoomullapellamo mulluku Zeyasi, yaari otte wa muzindooyo nave mullupa mukutho a mullukooyo, aawa omullakoni wa muzindooyo akusalle eng'ombe ddooreerihiwa ni ekhara ddamalluwa vawi olliye ni mullokooyo yapaalla wi eheraatthi mukutho wa Paulo ni Baranaba.

¹⁴ Paulo ni Baranaba yiiwalliiwa yapaalliiwa weerannddo, yahaahulla ddoowara ddiwa, ethamakella variyari va mullokooyo, ekhuwa wi,

¹⁵ “Athu nyu muneerella tini ddenndda? Hiyaano tti athu wonanko nyuwaano! Niwiille wi nillalleye othenga waphaama, wawi nyuwaano muhiye milluku ddoohikhalla ni mutteko nave muwe wa Mulluku Ookumi, oyo aphatusalle oddullu, ellapo yavatthi, enyanja ni ddittheddene ddiri mwemmo.

¹⁶ Khalle ahaahiya athu attheene wi yeereke ddoopaalla ddiwa.

¹⁷ Koma mallapo mattheene aaddeerella omboni wawi ookhallawo oweella mu ddeko ddaphaama eerilleeye. Annuuvahani murimu ovenyera oddullu ni ezipaso va enthawiiwa. Annuuvahani ddoocha navettho anaddalliha mirima ddanyu ni ehakallallo.”

¹⁸ Naari yallotille yeella, Paulo ni Baranaba waari wowaakatamiha wi yaahiihe athwaayo wi ehiheraatthi mukuthwiiwa wa alliwaayo.

¹⁹ Ayuda amodda yavenyenre o Antiyokeya ni o Ikonio, yahaakopa athwaalle wi ekhalle ni alliwa. Yaamuvokha malluku Paulo emupurullella otte wa muzindooyo vawi yaganiza wi ookhwa.

²⁰ Koma ookhulupililaayo yatthukumanniiwa moomwaapheella, aavenya nave aahokollweella mu etawoni moomulle. Osaka wene olliye ni Baranaba yaaya o Derbe.

Paulo ni Baranaba enahokollweella o Antiyokeya mu echigawo ya Siriya

²¹ Paulo ni Baranaba yaallalleya othenga waphaama wa athu mu Derbe nave yahaakopa oohuddera anchichi. Vano yaahokollweella o Listara, o Ikonio ni o Antiyokeya.

²² Yahaallipiha murima ni waalleellesesa wi evirellelle okhulupilila. Yahaahuddiha wi, “Ninaphwanella wi nikumane ni ddoohoosa wi navollowe mu omwene wa Mulluku.”

²³ Va orive mpingo yahaatthoollavo attekweene nave ni mavekello owaakattho ohalla ocha* yahaavelleella wa Apwiya, ayo yaakhulupililiiwa.

²⁴ Yamallihalliiwa weeta mu echigawo ya Pisidiya, yaaphiya o Pamfuliya.

²⁵ Yaallalleya mawu a Mulluku wa athu a o muzinda wa Perga nave eyattho o muzinda wa Ataliya.

²⁶ Nave yavenyeriiwa wenko yaawella ekallawiiwa ehokollweella o Antiyokeya ekaamba yawi yaamalliha muttekwiiwa. Sika yaahokollweella onipuroni wulle yavelleelliwiiwa wa Mulluku wi aweerelle echifundo vamuttekonoolle.

²⁷ Yaphiyalliiwa o Antiyokeya, yahaatthukumaniha athu a mpingo vamodda yaalleella ddittheddene Mulluku eerilleeye oweella mwa alliwaayo. Nave yahaalleellattho mmo Mulluku aworelleeye wi athu ayo ehiri Ayuda ekhulupilile.

²⁸ Nave yaakhalla wenko enthawi yoorekama ni ookhulupililaayo.