Mitteko 13 - Mawu a Mulluku

Baranaba ni Saulo ennatthoolliwa nave ennarumiwa

¹ Mumpingoni wa Antiyokeya* waakhalla anamallotella ni ahuddihi alla: Baranaba, Simiyoni (ooromolliwa Ooripa), Lusiyo (oovenyera o Kurene), Manaene (oyo unnuwelle nimodda ni Herode)* ni Saulo.

² Yaallapelliiwa Apwiya ni ohalla ocha,* Munepa Waweella aallota wi, “Okitthoollelle Baranaba ni Saulo wi yaphare mutteko oyo kawiithanelleemi.”

³ Vano yaahalla ocha, yaavekella, yahiiyaatthi mattiiwa va alliwaayo nave yaaruma.

Mu Kupro

⁴ Yarumiwiiwa ni Munepa Waweella, Baranaba ni Saulo yaaya o muzinda wa Seleukiya nave yaheeta vakallawani ovenyera wenko nave yaphiya o echilumba ya Kupro.

⁵ Yaphiyalliiwa o muzinda wa Salamisi, yaallalleya mawu a Mulluku mu enyumba ddamavekello.* Yaarittho ni Yohane Mariko oyo aakavihera mutteko.

⁶ Yaheeta virive veko ophiyera yaaphiya o muzinda wa Pafosi. Wenko yaakumanawo ni amasenga nnddina naye Barayesu, Muyuda oyo ari namallotella awoottha.

⁷ Aari mukhwaaye a oolamulella a o Kupro, nnddina naye Sergio Paulo, oyo aari muthu eezeru. Oolamulellooyo aamwiithana Baranaba ni Saulo wi ewe kaambiiwa apaalla iiwe mawu a Mulluku.

⁸ Koma musing'angoolle (oyo nnddina naye aari Elimasi mu ellotello ya Egriki), aanaavaanyiha Baranaba ni Saulo nave aaneeseesa omweeriha oolamulelloolle wi ahikhulupilile.

⁹ Vano Saulo, (oyottho adduwanyeya ni nnddina nawi Paulo) addalliwe ni Munepa Waweella aamuweha musing'angooyo.

¹⁰ Nave allota wi, “Mwaana a Satana we! Nave mudani a ddeko ddittheddene dda echilungamo, ooddalliwa ni ddeko ddittheddene ddawoottha. Ethiyo khohiya orukunusa yawoona ya Apwiya wi ekhalle yoolleka?

¹¹ Vano Apwiya eneerewuullaka weyaano nave oneerokhalla oohoona sika khawoona nndduwa wa mwaneenthawi.” Enthawi yeeyo m'mwiitthoni mwa Elamasi mwaawa epiphi nave aamba owaasha athu awi emuhoollelleke.

¹² Vano oolamulellooyo oonilleeye ddeereyennddo aakhulupilila nave aattikhina ni ehuddiho ya dda Apwiya.

Mu Antiyokeya a mu Pisidiya

¹³ Vano Paulo ni akhwaaye yaheeta vakallawani ovenyera o Pafosi yaphiya o muzinda wa Perga, mu echigawo ya Pamfuliya nave eri wenko Yohane Mariko ahaahiya ahokollweella o Yerusalemu.

¹⁴ Nave yaavirellella ovenyera o Perga ephiya wa Antiyokeya a mu echigawo ya Pisidiya nave va nllapo na Sabata yaavollowa mu enyumba yamavekello ekeraatthi.

¹⁵ Yamallihalliiwa weerenga ovenyera mu malamulo a Mose ni ehuddiho ya anamallotella, attekweene a mu enyumba yamavekello yahaarumihella mawu awi, “Akhwiihinyu, hiyaano ni napaalla wi mullote wa athwaalla mwaarina mawu owaallipiha murima.”

¹⁶ Sika Paulo ahiimella, uuva ni nnatta naye owiithana athu wi ewe vakhuviru nave aamba ollota wi, “Aisraele akhwaaka owaakattho nyu muhiri Aisraele koma munamoova Mulluku, kiiwelleni!

¹⁷ Mulluku a Aisraele ahaatthoolla makhollwaahu nave aweera ekhalle mulloko muullupalli wa athu va enthawi yaariiwa alleto mu ellapo ya Iguputo. Ahaakhumiha mu Iguputommo ni masivaaye.

¹⁸ Nave wa miyakha 40 ahaavillella yeetiiwa mu echipululu.

¹⁹ Aheeriha wi mitundu mitthanu ni miilli ddoonongiwe mu Kanani nave aweera athwaaye ekhalla aneena a ellapweeyo.

²⁰ Ddittheddenenndda ddaheereya wa miyakha 450. “Nave ddimallille ddenndda ahaavaha aweeruza ophiyera enthawi ya namallotella Samuele.

²¹ Vano yaaveka wi evahiwe mwene nave Mulluku ahaavaha Sauli, mwaana a Kishi, muthu a nlloko na Benjamini wi akhalle mweniiwa, wa miyakha 40.

²² Mulluku amuvenyihalleeye omwene Saulo, ahaavaha Davide wi akhalle mweniiwa. Nndda sika allotille Mulluku dda olliyooyo wi, ‘Koomuphwanya Davide mwaana a Yese, muthu a vamurimani vaka, muthu oyo anaaweere nnddo kinaapaalleemi.’

²³ Moollikana ni nnddo alonjezilleeye khalle Mulluku aheeriha edduullu ya Davide, Yesu wi akhalle oowaavullusa a Aisraele.

²⁴ Yesu ahinaambe muttekwaaye, Yohane aallalleya wa athu attheene a o Israele wi erukunuwe murima nave ebatiziwe.

²⁵ Nave Yohane ahanlleeye vang'ono omalliha muttekwaaye, aallota wa athu wi, ‘Munakeesa miyaano ttaani? Miyaano khe oyo munamutiyeraanyu. Nave ngoonani, Animawa mutulli mwaka nave naari miyaano ngiphwanenlle naari orulla esapato omanyalloni waye.’

²⁶ “Aisraele akhwaaka, edduullu dda Abrahamu ni athu attheene ayo ehiri Ayuda koma munamoova Mulluku, othenga woollota dda ovullusa waarumihiwa wa hiyaano!

²⁷ Vawi athu enakhalla o Yerusalemu ni attekweeniiwa kheyaadduwenlle wi olliyooyo tti oovullusa naari kheyaawiiwesesille mawu a anamallotella ayo yeerengiwa va nirive nllapo na Sabata. Voomwiipani mullatu Yesu yaakwakhwaniha mawu yallotiwe ni anamallotella.

²⁸ Nave naari yahiphwanyille mullatu woomwiiphella olliye, yaamuveka Pilato wi Yesu iiphiwe.

²⁹ Nave yamallihalliiwa weera ddittheddene nnddo mawu a Mulluku enallotiiwa dda olliye, yaamukitthihavo vamutandani nave emuvittha mu mahame.

³⁰ Koma Mulluku aamuvenyiha wa ookhwa.

³¹ Nave wa mallapo manchichi ahooneya wa ayo yamuthwanre ovenyera o Galileya oya o Yerusalemu. Vano alliwaayo tti amboni wa athu a o Israele.

³² Nave noollalleya othenga waphaama wa nyuwaano, oyo Mulluku alonjezilleeye khalle wa makhollwaahu wi aneereweera.

³³ Vano ddookwakhwanihiwa wa hiyaano edduullu ddiwa, Mulluku voomuvenyihani Yesu wa ookhwa. Moollikana ni ddalembiwe mu nchipo naneepiilli wi, ‘Weyaano tti Mwanaka, ollello kohuuyara weyaano.’

³⁴ Dda omuvenyiha olliye wa ookhwa nave ohimuhiya wi untellettho mu mahame, Mulluku aallota khalle wi, ‘Kineerewuuvaha madaliso aweella ni oororomelleya ayo kalonjezilleemi khalle wa Davide.’

³⁵ Ollikana ni ddalembiwe mu machipo mamodda wi, ‘Khamumuhiya oororomelleyaanyu aweella wi untelle mu mahame.’

³⁶ Vawi Davide amallihalle orumeyella ddoopaalla dda Mulluku mu mallapwaaye aakhwa. Nave aavitthiwa vamodda ni makhollwaaye nave mwiillaaye wahuntella mu mahame.

³⁷ Nave yeella kheyaawereyille wa oyo Mulluku amuvenyihalleeye wa ookhwa.

³⁸ Dduwellani nndda Aisraele akhwaakanyu wi oweella mwa Yesu, othenga wookhululukelliwa machimo onnallalleyiwa wa nyuwaano. Oweella mu malamulo a Mose khamwaawore ottaphulliwa o machimwaanyu mattheene,

³⁹ Koma oweella mwa Yesu arive muthu oyo anakhulupilila aneerottaphulliwa.

⁴⁰ Vano chenjerani wi ddallotiwe ni anamallotella ddiheereye wa nyuwaano ddawi,

⁴¹ ‘Nyu athu oovevulla! Ttikhinani nave moonongeye! Vawi ollello kineereweera ello emodda yawi khamukhulupilila vawiiwani!’ ”

⁴² Paulo ni Baranaba yakhumiiwa mu enyumba yamavekello, athu yaawiithana wi yawe va nllapo na Sabata noothwarellellanno wi yaalleellettho dda ddeko ddenndda.

⁴³ Athu yapallalleyiiwa va mutthukumanooyo, Ayuda anchichi ni athu ayo yahaari Ayuda koma yathwara echikhulupililo ya Ayuda yahaathwara Paulo ni Baranaba. Amurummwa eellaalla yahaalleella athwaayo ni waallipiha murima wi evirellelle okhulupilila echisomo ya Mulluku.

⁴⁴ Sika nllapo na Sabata noothwarellellanno, vakhuviru athu attheene a m'muzindanimmo yaawa wi yiiwelle mawu a dda Apwiya.

⁴⁵ Ayuda yoonilliiwa mulloko wa athwaayo yaaddalliwa ni ehache, enavaanyiha allotille Paulonnddo navettho enamullotella epewe.

⁴⁶ Koma Paulo ni Baranaba yaallota moollipa murima wi, “Waari woophwanella wi mawu a Mulluku ellotiwe wa nyuwaano vawaamba. Ekaamba yawi mohaakhoota, mohooniha wi khamunaphwanella okumi woohimalla, nineerewuuhiyani niye wa athu ayo ehiri Ayuda.

⁴⁷ Vawi ella sika Apwiya yanilamulliiwa wi, ‘Kooweerani wi mukhalle owala wa athu ayo ehiri Ayuda, wi ovullusa waka ophiye o makomello a ellapo yavatthi.’ ”

⁴⁸ Athu ayo ehiri Ayudaayo yiiwalliiwa ddenndda, yaahakallalla nave etitimiha mawu a Apwiya nave ayo yatthoolliwe wi yaakhelle okumi woohimalla, yaakhalla ookhulupilila.

⁴⁹ Mawu a Apwiya yaavuwa echigawo ettheeneeyo.

⁵⁰ Nave Ayuda yaaweeriha atthiyana oovuwa ni allopwana oolamulella ayo yahiri Ayuda koma oomullapella Mulluku wi yaambihe waahoosa Paulo ni Baranaba nave owiikarihawo o echigawonko.

⁵¹ Amurummwa eellaalla yaattattha nthupi omanyalloni wiwa mowaavaanyiha nave evirellella olendwiiwa oya o Ikonio.

⁵² Ookhulupilila a mu Antiyokeya yaaddalliwa ni ehakallallo owaaka Munepa Waweella.