Mitteko 12 - Mawu a Mulluku

Ohoosiwa wunchichi

¹ Enthawi yeeyo mwene Herode ahaamba waahoosa athu amodda a mpingo.

² Aamwiipha Yakobo, mwanamunne a Yohane ni nsupada.

³ Oonilleeye wi ddenndda ddohaahakallalliha Ayuda, aavirellella ammaka Petro. (Ddenndda ddeereye mallapo a Ehakallallo ya Buledi Oohikhalla ni Yisiti.)

⁴ Amakiweeye Petro, aahiyiwa mundende, avelleelliwa wa milloko misese dda akhoto asese orive mulloko wi emuwehereke. Herode apaalla amweeruze vamiitthoni va athu amalla Paska.

⁵ Petro ahiyiwe mundende mpingoolle waanamuvekella wa Mulluku moohihiya.

⁶ Mahiiyu yaayo Herode ahanlleeye vang'ono wi amukhumihe eeruziwe, Petro akonille variyari va akhoto eelli, amakiwe ni onyolo miilli. Nave vaakhallattho oowehera ayo yawehera va mullako wa endendeeyo.

⁷ Moorurumusa owala wahooneya mundendemmo mungelo a Apwiya ooneyilleeye. Mungelooyo aamuttannya Petro vanthurini, amuvenyiha nave allota wi, “Akuva, venya!” Enthawi yeeyo onyolo oyo Petro amakiweeyena matta waamora.

⁸ Nave mungelooyo aallota wi, “M'makelle laambaawooyo navettho oware esapato ddawo.” Petro aheera ddennddo nave mungeloolle allotattho wi, “Wiikhuneelle ni yawiikhuneellaaweeyo nave okithware.”

⁹ Nave Petro aamuthwara akhumaka mundendemmo koma khaadduwella wi ddeera mungelooyo ddaari ddawoona, olliye aganiza wi anoona m'masomphenya.

¹⁰ Yaakhwaranya oowehera awaamba nave yaakhwaranyattho aneepiilli nave ephiya va nchiwi na mikoko, na mullako woovollowella m'muzindani. Mullakooyo waahulleya weekhiiwa nave ekhuma. Yaheeta m'musewuni wa m'muzindanimmo nave enthawi yeeyo mungeloolle aamuhiya Petro.

¹¹ Nave Petro aadduwella ddamweereyellennddo allota wi, “Vano koodduwella wi tti ddawoona! Apwiya yaamurumiha mungelwiiwa wi akivulluse wa Herode ni wa ddeko ddittheddene Ayuda yatiyeriiwa wi ddikeereyelle.”

¹² Adduwenlleeye ddenndda, aaya o enyumba ya Mariya, amennya a Yohane Mariko nko athu anchichi yatthukumanniiwa evekellaka.

¹³ Petro ookothilleeye nchiwi na mullako wa vaatte, namwalli nnddina naye Roda oyo aari mullupa mutteko aawa wi amuhullelle.

¹⁴ Aadduwella mawu a Petro nave aahakallalla sika ahinahulle nchiwi aathamakella waari athu wulle, aalleella wi Petro sika iimenlle vaattemvo.

¹⁵ Yaamulleella wi, “Weene tti mullupaanepa!” Koma olliye aallipihella ollota wi tti ddawoona. Sika yaallota wi, “Tti mungelwaaye.”

¹⁶ Vano Petro aavirellella wookothanko. Voomallihella viwa yaahulla nchiwi nave yamoonilliiwa, yaattikhina.

¹⁷ Ahiimesa nnatta naye wi emaalle nave ahaatthopoollella mmo Apwiya yamukhumihelliiwa mundende. Nave aallota wi, “Mumulleelle Yakobo ni ookhulupilila amodda ddenndda.” Nave aavenyavo aya waamodda wene.

¹⁸ Wasilliiwa akhoto ooweheraalle yaasimwella voohidduwellani wi yamweereyelle Petro yaari tini.

¹⁹ Herode aalamulella wi emwaasheke koma kheyaamphwanyille. Sika aawiipa mullatu akhoto ooweheraalle nave alamulattho wi yiiphiwe. Ddamanlliiwa ddenndda Herode aavenyawo o Yudeya aya akhalla o Kaisareya.

Okhwa wa Herode

²⁰ Herode ahaashella murima athu a o mizinda dda Tiro ni Sidoni, sika yaakusana mulloko wi yamoone. Vowaamba yamukopille Blasito wi aakavihere, olliyoolla aari oowehera dda mu enyumba ya Herode. Vano yaaya wa Herode yaveka murendelle kaambiiwa yoocha ya echigawiiwa yavenyera o ellapo ya mwenooyo.

²¹ Yaatthoolla nllaponno Herode awanreeye mukanjwaaye wa omwene, akeraatthi va mpandwaaye wooweeruzella nave aallota wa athu.

²² Athu yaari vaavwaayo yaakhuwa wi, “Khe muthu anallotooyo koma tti mulluku!”

²³ Enthawi yeeyo mungelo a Apwiya aamweeriha Herode wi avoriiweke kaambiiwa khaamutitimihalle Mulluku. Aakhuma miingu nave aakhwa.

²⁴ Vano mawu a Mulluku yaavirellella ovuwa ni waakhullelliwa ni athu anchichi.

²⁵ Baranaba ni Saulo yamallihalliiwa muttekwiiwa yaahokollowa ovenyera o Yerusalemu, emukusalle Yohane Mariko.