Mitteko 11 - Mawu a Mulluku

Petro anatthopoolleella mpingo wa o Yerusalemu

¹ Amurummwa ni ookhulupilila a mu Yudeya mutthemwene yahiiwa wi naarittho athu ayo ehiri Ayuda ahaakhullella mawu a Mulluku.

² Vano Petro aphiyalleeye o Yerusalemu, Ayuda ayo yapaalla wi athu ayo ehiri Ayuda ephaddiwe yaamuhumullulla ellota wi,

³ “Waari mulleto o enyumba ya athu ayo ehiri Ayuda ayo ehiphaddiwe navettho waachana!”

⁴ Sika Petro ahaatthopoollella ddittheddene ddeereyennddo ovenyera vawaamba wi,

⁵ “Kavekelleemi m'muzindani wa Yopa, kahoona m'masomphenya. Kahoona oddullu ohulleyille nave ello yawooneya wonanko ekuwo yuullupalli ekitthellaka va ellapo yavatthi vakhuviru ni miyaano ephareelliwe ni etthoka ddiwa ddisese.

⁶ Kaawehesesa muwarimmo nave kahoona enama dda m'mawaani, ddamuhakani ni ddawaapadda ni epallame ddamuhakani.

⁷ Nave kahiiwa mawu ellotaka wa miyaano wi, ‘Petro khawe wiiphe enamannddo nave oddiche!’

⁸ Koma miyaano kaallota wi, ‘Apwiya, ngeera! Nginachekevo ovenyera khalle ello yoonanara apaalle yooheellihiwa.’

⁹ Mawaalle yahiiweya wiilli ellotiwaka wi, ‘Oheereke yoonanara eyo yeellihiwe ni Mulluku.’

¹⁰ Ella yaheereya oraru nave vano ekuwo ettheeneelle yaakusiwa ehokolloselliwa oddullu.

¹¹ Enthawi yeeyo athu araru yarumihiwe ovenyera o Kaisareya yaaphiya onyumbani kakhalleemiwo.

¹² Munepa Waweella aakilleella wi kaathware kihikhoote. Ookhulupilila Akhwiihu atthanu ni mmodda oovenyera o Yopa yaathanana ni miyaano o Kaisareyanko nave attheenehi naavollowa mpa mwa Korineliyo.

¹³ Aanilleella mmo oonilleeye mungelo iimenlle mpa mwaye, oyo amulleelle wi, ‘Waarumihe athu a o Yopa yamwiithane muthu nnddina naye Simoni Petro.

¹⁴ Aneerollota wi weyaano ni nibanja nawo nittheene muvullusiwe.’

¹⁵ Nave kaambilleemi ollota, Munepa Waweella aakittha va alliwa wonanko mmo eerilleeye va hiyaano vawaamba valle.

¹⁶ Vano kahuupuwella ddallotille Apwiya wi, ‘Yohane aabatiza ni maaddi koma nyuwaano muneerobatiziwa ni Munepa Waweella.’

¹⁷ Mulluku ahaavaha athu ayo ehiri Ayudaalla emphaso yoophwanaphwana ni elle naakhenlleehu nikhulupililalle mwa Apwiya Yesu Khrisitu. Vano miyaano kaari aani wi kaaweromuhiiha Mulluku!”

¹⁸ Yiiwalliiwa yeella, yaahiya omuhumullulla wulle nave yaamutitimiha Mulluku, ellota wi, “Vano Mulluku ohaavaha athu ayo ehiri Ayuda ekari yawi ehiye machimo nave ekhalle ni okumi woohimalla!”

Mpingo wa Antiyokeya

¹⁹ Ookhulupilila amodda ayo yapallalleyille ekaamba ya ohoosiwa waambeyille Sitefano iiphiweeye yaaphiya o ezigawo dda Fenisiya, Kupro ni o muzinda wa Antiyokeya,* ollalleya othenga wa Ayudave.

²⁰ Koma ookhulupilila amodda, ayo yaari oovenyera o Kupro ni o Kurene yaaya o Antiyokeya ellalleya othenga wa athu ayo ehiri Ayuda, yaalleella othenga waphaama wa Apwiya Yesu.

²¹ Masiva a Apwiya yaari ni alliwaayo nave athu anchichi yaakhulupilila erukunuwella murima wa Apwiya.

²² Epilleella yaaphiya wa mpingo mu Yerusalemu, sika yaamurumiha Baranaba wi aye o Antiyokeya.

²³ Aphiyalleeyewo ahoona echisomo ya Mulluku vaathwaayo. Aahakallalla nave aallipiha mwiilli attheenaayo wi evirellelle ookhulupilila mwa Apwiya ni murimiiwa muttheene.

²⁴ Baranaba aari muthu aphaama, oohoollelliwa ni Munepa Waweella ni a echikhulupililo nave athu anchichi yahaanjerereya owa wa Apwiya.

²⁵ Vano Baranaba aaya o Tariso wi amwaashaashe Saulo.

²⁶ Amuphwanyilleeye, aamukusella o Antiyokeya nave wa muyakha muttheene yaakumana ni mpingo ni ohuddiha mulloko wa athu muullupalli. Waari o Antiyokeya nko ookhulupilila yaambilliiwa oromolliwa wi akhrisitu.

²⁷ Vano mallapo yaayo anamallotella o Yerusalemu yaaya o Antiyokeya.

²⁸ Mmodda a anamallotellaayo nnddina naye aari Agabu aallotella ni masiva a Munepa Waweella wi ettalla yawoopiha eneerophiya va ellapo yavatthi ettheene. (Nndda ddeereyille Klaudiyo aariiye oolamulella a o Roma)

²⁹ Sika oohuddera yahiiwanana wi tti waphaama wi erumiheke ddeko ddawaakavihera ookhulupilila akhwiiwa o Yudeya moollikana ni eyuumiiwa.

³⁰ Vano yaheera yeella voowinnyani Baranaba ni Saulo makobiri wi yawinnye attekweene a mpingooyo.*