Mitteko 10 - Mawu a Mulluku

Petro ni Korineliyo

¹ Waakhalla muthu mmodda a o Kaisareya nnddina naye Korineliyo, oyo aari akhoto muullupalli a o Roma a mulloko wa akhoto 100, wooromolliwa wi, “Mulloko wa Italiya.”

² Aanamoova Mulluku, olliye ni nibanja naye nittheene. Aaneerattho ddeko ddinchichi waakavihera Ayuda oohoowa nave aanavekella wa Mulluku mallapo mattheene.

³ Yaari enthawi ekwakhwanne 3 koloko otthaana mvo oonilleeye phaama ddene masomphenya, mungelo a Mulluku awaaka wa olliye amwiithana wi, “Korineliyo!”

⁴ Olliye aamuweha mungeloolle oovaka akoha wi, “Apwiya, tti waphaama?” Mungeloolle ahaakhulla wi, “Mavekellwaawo navettho waakavihera wawo oohoowa ddohaakhullelliwa ni Mulluku wonanko mukutho.

⁵ Vano arumihe athu amodda eye o Yopa wi yamwiithane muthu mmodda nnddina naye Simoni Petro.

⁶ Olliyoolla tti mulleto mu enyumba ya Simoni oopanga mattapara oyo anakhalla vakhuviru ni enyanja.”

⁷ Nave mungeloolle aavenyavo, vano Korineliyo aawiithana allupa muttekwaaye eelli owaaka akhoto mmodda oyo aari oomullapella Mulluku nave oyo aari ovenyera mwa ayo yamurumeyella Korineliyo.

⁸ Ahaalleella ddittheddene ddeereyillennddo nave aaruma wi eye o Yopa.

⁹ Osaka wene eri voolendoniiwoolla nave yaatamelliiwa o Yopa, enthawi ya 12 koloko otthaana Petro aawella vaddullu va enyumba wi avekelle.

¹⁰ Aavolliwa ettalla nave aapalla yoocha. Vano yoocheeyo yakhuruwiwiiwa, ahoona masomphenya.

¹¹ Ahoona oddullu ohulleyille nave ello yawooneya wonanko ekuwo yuullupalli ekitthellaka va ellapo yavatthi ephareelliwe ni etthoka ddiwa ddisese.

¹² Mwemmo mwaakhalla enama dda mitundu ddittheddene wonanko enama dda m'mawaani, ddawaapadda owaakattho epallame ddamuhakani.

¹³ Mawu yahiiweya ellotaka wi, “Petro khawe wiiphe enamannddo nave oddiche!”

¹⁴ Koma Petro aallota wi, “Apwiya, ngeera! Nginachekevo ovenyera khalle ello yoonanara apaalle yooheellihiwa.”

¹⁵ Mawaalle yahiiweya wiilli ellotiwaka wi, “Oheereke yoonanara eyo yeellihiwe ni Mulluku.”

¹⁶ Ella yaheereya oraru nave vano ekuweelle yaawellihiwa oya oddullu.

¹⁷ Petro aahalleelliwa ni ddeko oonilleeyennddo wi tti tini. Enthawi yeeyo athu yarumiwe ni Korineliywaalle yaari ekohenre khalle mvo vaari enyumba ya Simoni nave yaari yiimenlle vamullakoni.

¹⁸ Yahiithana nave ekoha wi, “Ethiyo wuno wookhalla mulleto nnddina naye Simoni Petro?”

¹⁹ Enthawi yeella Petro aari aganizeraka dda masomphenyanndde, Munepa Waweella waallota wi, “Athu araru enimuupaalla weyaano.

²⁰ Sika venya okitthe vatthi nave ohikhoote waathwara vawi kirimaarumiha.”

²¹ Sika Petro aakittha vatthi nave allota wa athwaalle wi, “Munamupaallaanyooyo tti miyaano. Mwaweella tini?”

²² Alliwaayo yahaakhulla wi, “Korineliyo, akhoto muullupalli a o Roma a mulloko wa akhoto 100 sika anirumalle. Olliyoolla tti muthu oolungama ni oomoova Mulluku nave Ayuda attheene ennamuvaha olemu. Mungelo a Mulluku sika amulleelle wi awiithaneni muye onyumbani waye wi iiwe eyo munaalloteenyu.”

²³ Petro aawiithana athwaalle wi evollowe mpa nave ahaalleella wi ekone wenko nllapo nenno. Osaka wene aavenya aya vamodda ni athwaalle navettho ookhulupilila amodda oovenyera o Yopanko yaathananana.

²⁴ Osaka wene aaphiya o Kaisareya, nko Korineliyo amutiyereeyewo vamodda ni abalaaye ni akhwaaye ayo awiithanneeye.

²⁵ Petro ahanlleeye vang'ono ovollowa, aakumana ni Korineliyo oyo akokhonre vakhuviru ni olliye nave amuvaha olemu.

²⁶ Nave Petro aamuvenyiha allota wi, “Venya, miyaanottho tti muthu.”

²⁷ Petro aallota ni Korineliyo avolloweeye mpa, mmo aaphwanyilleeye athu anchichi etthukumanne.

²⁸ Allota wi, “Nyu nyookha munnadduwella phaama wi Muyuda khanaakhullelliwa ni malamulwaaye oweetella apaalle waattana ni athu ayo ehiri Ayuda. Koma Mulluku ookooniha miyaano wi kihimweere arive muthu oonanara apaalle ooheellihiwa.

²⁹ Sika mwakirumihenlleenyu athu, miyaano koowa moohikhoota. Vano kinimuukohani wi mukiithanenlle tini?”

³⁰ Korineliyo aallota wi, “Waari nnddana enthawi wonanko yeella kaamavekella mpa mwaka enthawi ya 3 koloko otthaana. Moorurumusa muthu oowara ddaweellesesa ahiimella vahoollo vaka

³¹ nave allota wi, ‘Korineliyo! Mavekellwaawo ahiiweya navettho waakavihera wawo oohoowa wohaakhullelliwa ni Mulluku wonanko mukutho.

³² Vano arumihe athu amodda eye o Yopa wi yamwiithane muthu mmodda nnddina naye Simoni Petro. Olliyoolla tti mulleto mu enyumba ya Simoni oopanga mattapara oyo anakhalla vakhuviru ni enyanja.’

³³ Sika kaawiithanani enthawiine yeeyo nave moheera phaama wi moowa. Vano attheenehi niri wuno vamiitthoni va Mulluku, otiyera wi niiwe erive ello Apwiya yuulamunlleewani wi munilleelle.”

³⁴ Petro ahaamba ollota wi, “Ddawoona, vano kohiiwesesa wi wa Mulluku athu attheene tti oophwanaphwana.

³⁵ Ayo enamoova olliye ni weera echilungamo ennaakhullelliwa ni olliyooyo nave olliyooyo khanoonattho wi enavenyera mutundu wa aani.

³⁶ Aarumiha othengaaye wa athu Israele, ollalleya othenga waphaama wa murendelle mwa Yesu Khrisitu. Yesu yoolla tti Apwiya a athu attheene.

³⁷ Munnadduwella dda ello yeereye mu ellapo ya Israele, waambeella mu Galileya vatulli va obatizo woollalleyiwa ni Yohane.

³⁸ Munnadduwella dda Yesu a o Nazareti nave wi Mulluku aamuvaha olliye Munepa Waweella owaakattho masiva. Aaya orive weko, weera ddaphaama ni waachiriha attheene ayo yalamuliwa ni masiva a Satana vawi Mulluku aari ni olliye.

³⁹ Hiyaano tti amboni a ddittheddene eerilleeye mu ellapo ya Israele ni mu Yerusalemu. Vano yaamwiipha voomutthomeyani vamutandani.

⁴⁰ Koma Mulluku aamuvenyiha wa ookhwa viviralle mallapo mararu navettho aamweeriha wi ooneye,

⁴¹ ohiri wa athu attheene koma wa amboni yaayove yatthoolliwe khalle ni Mulluku, sika vano tti hiyaano nachille ni owirya ni olliye avenyille wa ookhwa.

⁴² Nave aanilamulella wi nillalleye ni weerella omboni wa athu wi olliye sika atthoolliwe ni Mulluku wi akhalle oweeruza millatu wa athu ookumi ni ookhwa.

⁴³ Anamallotella attheene yaallota dda olliye wi, attheene enakhulupilila mwa olliye eneerokhululukelliwa machimwiiwa oweella mwamasiva a nnddina naye.”

Athu ayo ehiri Ayuda enaakhella Munepa Waweella

⁴⁴ Vano Petro allotakave ddiiddo, Munepa Waweella aakitthella va attheene yiiwella othengaayoolle.

⁴⁵ Ayuda ookhulupilila ayo yavenyenre o Yopa ni Petro yaattikhina wi Mulluku aavaha emphaswaaye ya Munepa Waweella naari va athu oohikhalla Ayuda.

⁴⁶ Vawi yaawiiwa ellotaka mu ellotello ddoohidduwanyeya* nave etitimihaka wunnuwa wa Mulluku. Petro aallota wi,

⁴⁷ “Athwaalla ahaakhella Munepa Waweella wonanko hiyaano. Vano khaavo muthu oyo anaahiihe wi ebatiziwe ni maaddi”

⁴⁸ Sika ahalamulella wi ebatiziwe mu nnddina na Yesu Khrisitu. Nave yaamukoha wi akhallena wenko wa mallapo ooyeva.