Mitteko 1 - Mawu a Mulluku

¹ Ooriiheya Teofilo, valle mu nibukhu naka nawaamba kaalemba dda ddeko ddittheddene Yesu eereeye owaaka ahuddiheeye ovenyera va nllapo aambilleeye muttekwaaye

² ophiyera nllapo awellihiweeye oya oddullu. Ahinawellihiwe, ahaalamulella mwamasiva a Munepa Waweella allopwana aatthoonlleeye wi ekhalle amurummwaaye.

³ Mwa mallapo 40 vatulli va ohoosiwa ni wiiphiwa waye, ahooniha mu ettilla ddoohiyanahiyana wi aavenyihiwa wa ookhwa. Aaddoonihella wa alliwaayo navettho aallota wiilliwiilli dda omwene wa Mulluku.

⁴ Yaariiwana nimodda, Yesu ahaalamulella wi, “Muhivenyewo o Yerusalemu koma mutiyere ophiyera mwaakhenlle emphaso ya Attiitthaaka kalonjezilleemiille.

⁵ Vallethi Yohane aabatiza ni maaddi koma vihinavire mallapo manchichi muneerobatiziwa ni Munepa Waweella.”

Yesu anawellihiwa oya oddullu

⁶ Amurummwa yaariiwa nimodda, yaamukoha Yesu wi, “Apwiya, mallapo yaalla muneerohokollosellattho omwene wa Israele?”

⁷ Yesu aallota wi, “Khonaphwanella wi nyuwaano mudduwelle dda enthawi ni mallapo ayo Attiitthaaka ekeraatthihalliiwa mwa olamulellwiiwa wi nndda ddeereye.

⁸ Koma Munepa Waweella awa mwa nyuwaano, muneerewaakhella masiva nave muneerokhalla ambonaaka mu Yerusalemu, mu echigawo ya Yudeya ni echigawo ya Samariya ophiyera wookomella ellapo yavatthi.”

⁹ Allotilleeye ddenndda, yamoona awellihiwaka oya oddullu nave aavollowa m'miraponi ahooneyattho.

¹⁰ Alliwaayo emuwehaka olliye ayaaka oddullu, moorurumusa allopwana eelli oowara mikanjo ddaweella yahiimella vakhwipi viwa.

¹¹ Allopwana yaalla yaallota wi, “Nyu Agalileya, mwiimellelle tini munaweha oddullu? Yesu oyo aawellihiwe oya oddullu ovenyera wa nyuwaano, aneerohokollowattho wonanko mmo mwamoonilleenyu ayaaka oddullu.”

Otthoolliwa wa oovollowa munipuroni mwa Yudasi

¹² Vano amurummwa yaahokollweella o Yerusalemu ovenyera o mwaango wa Olivi, oyo waatamanne ni Yerusalemu olendo vakhuviru nikilomita nimodda.

¹³ Yavollowilliiwa m'muzindanimmo yaaya o echipinda yavaddullu nko yakhalliiwawo. Amurummwaayo yaari: Petro, Yohane, Yakobo, Andreya, Filipo,* Tomasi, Bartolomeyu, Mateyu, Yakobo mwaana a Alifeyu, Simoni a mulloko wa Aziloti ni Yudasi mwaana a Yakobo.

¹⁴ Yaanavekella wiilliwiilli ni murimiiwa muttheene moowiiwanana, vamodda ni atthiyana ni Mariya amennya a Yesu navettho asinne a Yesu.

¹⁵ Viviralle mallapo ooyeva waakhalla mutthukumano wa ookhulupililave 120. Vano Petro ahiimella allota wi,

¹⁶ “Asinnaka ni arokoraka, waari woophwanella wi mawu a Mulluku ekwakhwanihiwe mmo Munepa Waweella allotilleeye oweella mwa Davide ollotella dda Yudasi, oyo aari owaahoollella ayo yamuphanre Yesu.

¹⁷ Yudasi aari mmodda a mullokwaahu vawi aatthoolliwattho wi niphareke nimodda muttekwaahu.”

¹⁸ Vano Yudasi aakulla emata ni makobiri ayo allivelliweeye va onanara murima wayenko. Wenko aamora atthipella murwaaye vatthi sika aaphulleya nave marupwaaye yaakhumella vaatte akhwa.

¹⁹ Athu attheene ookhalla o Yerusalemu yaadduwella ddenndda nave mu ellotellwiiwa yaaromolla emateeyo wi, “Akeledama.” Ottaphullella wi, “Emata ya Nikhame.”

²⁰ “Vawi moolembiwa mu nibukhu na Masalimo wi, ‘Enyumbaaye etthaamiwe, nave muhikhalle muthu oyo anaakhallekemo.’ Moolembiwattho wi, ‘Muthu mmodda akuse muttekwaaye.’

^21-22 “Sika tti woophwanella wi mullopwana mmodda atthoolliwe wi akhalle mboni a ovenya wa ookhwa wa Apwiya Yesu. Anaphwanella akhalle mmodda a allopwana ayo yaari nimodda ni hiyaano enthawi ettheene naariihu nimodda ni Apwiya Yesu, waambeella mvo Yohane amubatizilleeye ophiyera nllapo awellihiweeye oya oddullu ovenyera wa hiyaano.”

²³ Vano yaaromolla manddina a athu eelli, Yosefe ooromolliwa Barasaba oyottho aromolliwa wi Yusuto ni Matiyasi.

²⁴ Yaavekella wi, “Apwiya, nyuwaano sika munadduwella mirima dda athu attheene. Vano munoonihe oyo mumutthoonlleenyu va eellaalla

²⁵ wi akhalle oorumeyellaanyu ni murummwaanyu ovollowa munipuroni mwa Yudasi oyo akhwille moollikana ni mmo aphwanenlleeye.”

²⁶ Yahoombesa nave Matiyasi aatthoolliwa akhalla murummwa nimodda ni amurummwa amodda khumi ni mmoddaayo.