Mika 7 - Mawu a Mulluku

Onanara wa Aisraele

¹ Otulli wa miyaano! Kiri wonanko awuurulla oohiphwanyamo ello. Khavihanlle mpesa ddawi ttuucha apaalle namukuyu oyo kinamukondeemi.

² Athu oororomelleya aamalla va ellapo yavatthi, khaavo naari mmodda oolungama. Attheene enniipitthellana wi emorihe nikhame, arive muthu annamusaya mbalaaye ni nthavi.

³ Alliwa tti eeruso vaweerani ddoonanara. Enduna ni aweeruza eneetella ddamukaphwani nave oohoollella enaalleella ddoonanara nnddo enapaalliiwa weera. Sika enalakwella nimodda.

⁴ Naari muthu aphaama wunchichi ni oolungamesesa ari wonanko miiwa. Nllapo na ollaka wawo nno nallotelliwe ni alondaawo noophiya. Vano woophiya omalla ezeru wawo.

⁵ Ohimuroromelleke munasaawo apaalle mukhwaawo a vamurimani. Ohaaheyeke okawana ddawiipittheya naari ni ookona omirimani wawo.

⁶ Ollello mwaana aamullopwana annavevulla attiitthinnya, mwaana aamutthiyana annaawukila amennya, mvokohi annatokollolla ni akwegwawaaye sika wi adani a muthu tti munibanjani mwaye.

⁷ Koma miyaano, kinaaroromelle Apwiya. Murimaaka kinaahiye va Mulluku Oovullusaaka vawi Mullukwaaka aneerokiiwa.

Israele aneerovullusiwa

⁸ We mudanaaka, ohikittheye vawi naari kiikuhalle kineerovenyattho. Naari kiri mwiipiphini, Apwiya sika enaakhalle omolleella waka.

⁹ Kinaphwanella ovillella owalli wa Apwiya kaambiiwa kahaachimwella ophiyera yiiwalle mullatwaaka ni owukamulla. Koma vatulli viwa eneerokivollochiha mu owala nave kineerewoona ovullusa wiwa.

¹⁰ Adanaaka vawoonani ddenndda eneerowulliwa muru vawi yaanallota wi, “Ari wuuwi Apwiya Mullukwaawo?” Vano kineerewoona ni miitthwaaka enyingallelliwaka wonanko matokwi m'musewuni.

¹¹ Ninaakhalle nllapo noomakattho mpandaanyu nave enthawi yeeyo maliraanyu eneerewoonjereriwa.

Nivekello noomalliha

¹² Nllapo nenno athu eneerohokollweella wa nyuwaano ovenyera o Asiriya ophiya o Iguputo, ovenyera o Iguputo ophiya o muhinje wa Yufurate, ovenyera o enyanja emodda ophiya o enyanja emodda nave ovenyera o mwaango mmodda ophiya o mwaango mmodda.

¹³ Koma ellapo yavatthi eneerotthattuwa echipululu ekaamba ya ddoonanara dda athwiiwa vawi yaayo sika mallivello a mitteko ddiwa.

Echifundo ya Apwiya va Israele

¹⁴ Nyu Apwiya, ahoollelleni athwaanyu ni ekopwaanyu, weherani enkhosa dda yoohallanaanyu. Vano ddinakhalla weekhiiwa muutthakoni variyari va ellapo ya ethaya yaphaama. Koma muddaakhullelle wi ddache munyepu waphaama, o Bashani ni Giliyadi, monga mallapo akhalle.

¹⁵ Monga mallapo alle mwakhumalleenyu o Iguputo, nooniheni ddoottikhiniha.

¹⁶ Mitundu dda athu vawoonani ddenndda ddineerowulliwa muru naari ddikhalleve ni masiva awiidde. Eneeromaalla nave eneerokhoowa owaruni mootathilla murima.

¹⁷ Eneerewuupuruseya munthupini wonanko enowa apaalle ddoophatusiwa ddimodda ddawaapadda. Enaawe etthukumellaka ovenyera o mipanda ddoollipa ddiwa nave mwawoova eneerorukunuwella wa nyu Apwiya Mullukwaahu nave eneerowoovani.

¹⁸ Ethiyo ttaani ari Mulluku oophwanaphwana ni nyuwaano, oyo anakhululukella machimo ni ovenyiha ddoolakwa dda oohalla a yoohallanaanyu? Khamunasunga m'murimani onanariwa wa enthawi yoohimalla ekaamba ya echikondaanyu yoohisintheya.

¹⁹ Muneeroneerellattho echifundo Muneeronyingallella vatthi machimwaahu ni otathillella mu enyanja yoowallamella.

²⁰ Muneerewooniha ororomelleya wanyu va Yakobo ni echikondaanyu yoohisintheya va Abrahamu monga mwallupenlleenyu khalle wa makhollwaahu.