Mika 6 - Mawu a Mulluku

Apwiya enaahumullulla Aisraele

¹ Iwani vano nnddo enallota Apwiya. Imellani Apwiya! Mutthopoolle variyari va miyaango mullatwaanyu. Asimiyaango yiiwe mawaanyu.

² Nyu miyaango ni matthipello ookeraattheya a ellapo yavatthi, iwani mullatu wa Apwiya. Apwiya enawiipa mullatu athwiiwa, enaahumullulla Aisraele.

³ Apwiya enallota wi, “Nyu athwaaka, kiweerenlleni tini? Ethiyo kuutopihalleni ni tini? Pepaani, kaakhulleni.

⁴ Valle kahuukhumihani o Iguputo ni owoopollani o ellapo yookaporo. Kaamurumiha Mose wa nyuwaano owaaka Aroni ni Miriyamu wi yuuhoollelleni.

⁵ Nyu athwaaka, upuwellani nnddo Balaki, mwene a o Mowabu apaalleeye oweerellani navettho mmo Balamu mwaana a Beori amwaakhullelleeye. Upuwellani nnddo ddeereyille va olendo woovenyera o Shitimu oyo o Giligala. Upuwellani ddittheddenenndda wi mwiiwesese nnddo mi Apwiya keerilleemi wi kuuvulluseni.”

Nnddo Apwiya enapaalliiwa

⁶ Ethiyo kikuse tini wi kiphiye vamiitthoni va Apwiya wi kamullapelle Mulluku ooddullu? Ethiyo kaakuse asaanaang'ombe a muyakha mmodda wi kivelleelle mukutho wooshellelliha?

⁷ Ethiyo Apwiya ttuuhakallalla ni anankhoro ankhosa ooheerengeya apaalle mihinje dda makhura a olivi? Ethiyo ttuumuvelleella mwanaka awaamba ekaamba ya ddoolakwa ddaka apaalle mwanaka olliva machimwaaka?

⁸ Iyaayi, muthuwe, Apwiya yaawooniha khalle eyo eri yaphaama. Alliwa enapaalla wi weereke ddoolungama, okondeke echifundo ni weeta mwawiiyeviha vamiitthoni va Mullukwaawo.

⁹ Ngiiwani, mawu a Apwiya eniithana muzinda! Woova nnddina na Apwiya sika ezeru. Enuulleellani attheene ookhalla m'muzindanimmu.

¹⁰ Ethiyo mi ttuutiwalla eyuuma ya mu enyumba dda oonanara eyo yayiphwanyilliiwa moolleka ni yoolingella yawoottha eyo kiniitaneemina?

¹¹ Ethiyo ttuuwaattumera oophariha mutteko esikelo ddoolleka apaalle nthumba noolingiwa mwawoottha?

¹² Athu eeyuuma tti eechiwawa. Athu attheene tti awoottha ni oolleka.

¹³ Sika kohaamba wuullakani ni owoonongani ekaamba ya machimwaanyu.

¹⁴ Muneerekoocha koma khamuvonaka, ettalla kheyuumallellakani. Muneerekosunga ddeko koma khaddisungeyaka. Nnddo munaasungeenyu ddineerewoonongiwa ni ekhoto.

¹⁵ Muneerekewaalla koma khamuhataka. Muneerekeweeka makhura a olivi koma khamwiihellaka. Muneerekovota mpesa koma vinyweene khamumullawihaka.

¹⁶ Moosunga makhallello oonanara a mwene Omuri ni mitteko ddittheddene dda nibanja na Ahabu. Ekaamba yawi moothwara ettilla ddiwa ddittheddene, miyaano kineerewuutthollosani. Mitundu ddimodda dda athu oneerekewuusoonyani nave orive weko athu eneerewuuvevullani.