Mika 5 - Mawu a Mulluku

¹ Nyu a o Yerusalemu, vano atthukumaniheni akhotwaanyu. Nohaapheelliwa! Eneeromuukutha ni ekopo oolamulella a Israele vanramani.

Oyariwa wa mwene a o Betelehemu

² Apwiya enallota wi, “We Betelehemu Efurata, ori mung'onong'ono variyari va matawoni a Yuda koma mwa weyaano muneerovenyera oolamulella Israele. Olliyoolla maambeellwaaye tti akhallekhalle, a mallapo oohaamba.”

³ Ekaamba ya yeella Mulluku aneerewaahiya Aisraele ophiyera mutthiyana amuyanre mwaana. Vaavo oohalla a mutundwaaye eneerohokollweella wa Aisraele akhwiiwa.

⁴ Olliye aneerollipihella nave ochiha enkhosa ddaye mwamasiva a Apwiya ni ntitimiho na nnddina na Apwiya Mullukwaaye. Nave eneerokhalla m'murendelleni vawi ottekweenaaye oneerokeraattheya va ellapo yavatthi ettheene.

⁵ Olliye sika anaakeraatthihe murendelle. Aasiriya eneerovollowa mwiillaponi mwahu ni waamba onihella ekhoto. Vano hiyaano nineerewaarumiha oolamulella atthanu ni eelli apaalle enduna tthanu ni raru.

Ovullusiwa ni ollakiwa

⁶ Alliwa eneerogonjiha ellapo ya Asiriya ni nsupada nave eneerewaakha ellapo ya Nimirodi mwakhoto. Aneeronivullusa wa Aasiriya yavollowa ni ollapuwella mwiillaponi mwahu.

⁷ Oohalla a Yakobo enaakhalle variyari va mitundu ddinchichi dda athu wonanko nikame noovenyera wa Apwiya. Enaakhalle wonanko murimu oorupella vamanasini moohiselliwa vawi khanatiyera olamuliwa ni muthu.

⁸ Oohalla a Yakobo enaakhalle variyari va mitundu ddinchichi dda athu wonanko mukango variyari va enama ddamuhakani. Anaakhalle wonanko mukango onavira variyari va mulloko wa enkhosa oyo onnaddiphara ni oddikhaddulla, oohikhallavo ooddivullusa.

⁹ Nyu Aisraele, muneerewaagonjiha adanaanyu nave attheene eneerewoonongeya.

¹⁰ Komave Apwiya enaalleella Aisraele wi, “Va nllapo nenno kineerowoononga akavalwaanyu attheene ni kineerewinttaka magaretaanyu.

¹¹ Kineerewoononga mizinda dda mwiillaponi mwanyu ni okumulla mipanda ddoollipa ddanyu.

¹² Kineerewoononga masengaanyu mattheene nave variyari vanyu khavikhallattho awoombesa.

¹³ Kineerewoonongattho mafanwaanyu mattheene vamodda ni apoto oopatuleya mwiillaponi mwanyu. Khamullapellakattho ddeko nnddo mwapangilleenyu ni mattaanyu.

¹⁴ Kineerokumulla mafanwaanyu a Asherimu mwiillaponi mwanyu nave kineerewoononga mizinda ddiwa.

¹⁵ Moowalli ni moonanariwa kineerollaka mitundu ddittheddene dda athu nnddo ddihinakiiwellella.”