Mika 4 - Mawu a Mulluku

Yerusalemu muzinda wa Apwiya

¹ Va mallapo a muhoollo mwaango wa enyumba ya Apwiya oneerotthattusiwa woorekamesesa okhwaranya miyaango ddittheddene. Athu ddineerothamakella omwaangoninko,

² athu a mitundu ddinchichi eneeroowa, ellotaka wi, “Hankoni niwelle o mwaango wa Apwiya, o enyumba ya Mulluku a Yakobo! Eneeronihuddiha ettilla ddiwa nave nineeteke mwemmo. Vawi o Ziyoni sika onaavenyereke malangizo, o Yerusalemu sika onaakhume mawu a Apwiya.”

³ Alliwa eneereweeruza variyari va mitundu dda athu ddinchichi, eneeromalliha ohiiwanana variyari va malloko amasiva, avakhuviru ni awoorekama. Athu eneerohana masupadiiwa wi ekhalle ehipa ni mavakiiwa wi ekhalle ezikwakwa. Mitundu dda athu khaddiwa ddiimesellanattho masupada, khaddiwa ddihudderattho ddoowana ekhoto.

⁴ Arive muthu anaakhalleke mwamurendelle, naari vatthi va muteekhwaaye wa mpesa ni vatthi va muteekhwaaye wanamukuyu, khaavo oyo anaawoopopiheke vawi Apwiya Amasiva Mattheene, aneena, aallota.

⁵ Naari orive mutundu wa athu othwaraka milluku ddiwa, hiyaano ninaawaathware Apwiya Mullukwaahu wa enthawi yoohimalla.

Aisraele eneerohokollweella owaniwa

⁶ Apwiya enallota wi, “Va nllapo nenno kineerewaatthukumaniha oottutthunya, awiikariwa owaniwa navettho ayo kaallakilleemi.

⁷ Oottutthunya kineerewaatthattusa oohalla nave ayo yiikariwe owaniwa kineerewaatthattusa mutundu wamasiva. Mi Apwiya kinaakhalle mweniiwa va mwaango wa Ziyoni ovenyera ollello ophiyera wa enthawi yoohimalla.”

⁸ Vano we Ziyoni, nttattha nooteteza enkhosa ddaka, mwaango wa athwaaka, omwenaawo wakhalle oneerohokollowa, omwene wa mwaana aamutthiyana a Yerusalemu.

⁹ We muzinda, oninllellati mookhuwa ddiiddo? Ethiyo khonna mwene? Onahoowellati wonanko mutthiyana va enthawi yooyara?

¹⁰ Nyu athu a o Ziyoni, wuupuruwa ni wiipullella wonanko mutthiyana va enthawaaye yooyara. Vawi vano muneerovenyamo m'muzindanimmo wi mwakhalle m'mawaani. Muneeroya o Babiloni wuukaporoni komave muneerovullusiwawo vawi Apwiya eneerowoopollani wa adanaanyu.

¹¹ Vano mitundu ddinchichi ddootthukumana wi ddiwane ni weyaano Ziyoni voollotani wi, “Hankoni nimuripihe, noone omalla wa Ziyoni.

¹² Koma athwaayo khanaadduwella maganizo a Apwiya navettho kheniiwesesa nnddo enakhozekelliiwa. Khenadduwella wi alliwa aawuukellella wonanko mitolo dda tirigu va nipuro nawuuputhellavo.

¹³ “We Ziyoni, amba wuuputha vawi kineerewuutthattusa amasiva wonanko manyaka amukoko, wonankottho manyallo amukuwa. Oneeronyenya mitundu ddinchichi dda athu nave nnddo yaphuralliiwa oneeroddivelleella wa Apwiya. Eyuumiiwa oneeroyivelleella wa Apwiya a ellapo yavatthi ettheene.”