Mika 3 - Mawu a Mulluku

Mika anaahumullulla oohoollella a Yuda

¹ Ngiiwani, nyu oohoollella a nibanja na Yakobo, oolamulella a nibanja na Israele! Ethiyo nyu khamuphwanenlle odduwella echilungamo?

² Koma munniitana ni ddaphaama ni okonda ddoonanara. Athwaaka munnawaatta ookumi ni ottovorolla muhehiiwa.

³ Munnakittakhunella athwaaka, owaatta, waapwesa makhuviiwa ni waaphaddella mwiipallini wonanko enama.

⁴ Enthawi enimawa mvo muninllelleenyu wa Apwiya koma khewaakhullani. Enthawi yeeyo Apwiya eneerewiipitthiha ekhoviiwa kaambiiwa mitteko ddanyu tti ddoonanara.

⁵ Vookhalla anamallotella ayo enaahollosa athwaaka. Mmodda aavaha yoocha, ennallotella dda murendelle. Koma mmodda ahaavaha yoocha, ennamullotella dda ekhoto.

⁶ Wa anamallotella yaalla Apwiya enallota wi, “Ekaamba ya yeella khamuwa moonattho ddeko m'masomphenya, khamuwa mullotellattho. Nyu anamallotella, enthawi yohuumallellani, epiphi yohuumorellani.”

⁷ Oollotella ddamuhoollo eneerowulliwa muru nave awoombesa eneerovevulliwa. Attheene eneeromaalleya kaambiiwa Mulluku khanawaakhulla.

⁸ Koma miyaano kooddalla ni masiva a Munepa wa Apwiya. Kooddalla ni echilungamo ni ollipa murima wi kaahumullulle a nibanja na Yakobo ekaamba ya ddoolakwa ddiwa nave wi kiwoonihe Aisraele ddoonanara ddiwa.

⁹ Ngiiwani, nyu oohoollella a nibanja na Yakobo, oolamulella a nibanja na Israele! Munniitana ni echilungamo, munnakhoromaniha ddeko ddawookowa.

¹⁰ Munammaka Ziyoni ni eyuuma yanikhame nave Yerusalemu ni onanara wanyu.

¹¹ Oohoollella kheneeruza vaahikhalla ddamukaphwani, allupa mukutho khenahuddiha vaahikhalla mallivello navettho anamallotella khenallotella vaahikhalla makobiri. Komave enahameella va Apwiya voollotani wi, “Ethiyo Apwiya kheri variyari vahu? Kheyiivo yookatamiha enaanimorelle!”

¹² Sika vano ekaamba ya nyuwaano, Ziyoni aneerollimiwa wonanko emata, Yerusalemu aneerotthattuwa ntepe nave mwaango wa enyumba ya Apwiya oneerotthattuwa otthako.