Mika 1 - Mawu a Mulluku

Mawu oomuhumullulla Israele ni Yuda

¹ Va enthawi ya Yotamu, Ahazi ni Hezekiya mamwene a o Yuda, mawu a Apwiya yaawa wa Mika a o Moresheti mu masomphenya dda Samariya ni Yerusalemu.

² Nyu athu a mitundu ddittheddene, iwani! We ellapo yavatthi ni ddittheddene ddookhalla mwemmo, Apellani maaru! Apwiya Mulluku Amasiva Mattheene enawiipani mullatu, enallota ovenyera o enyumbiiwa yaweella.

³ Ngoonani, Apwiya enimawa ovenyera o nipuro niwa, enakittha vatthi eneeta va mapuro aweellesesa a va ellapo yavatthi.

⁴ Vano miyaango ddineerottotthowa vatthi va olliye wonanko onyoma vamunlloni, ddineneereweetellella mutapo wonanko maaddi a m'mwaangoni.

⁵ Ddittheddenenndda ddineereya ekaamba ya ddoonanara dda Yakobo ni machimo a Israele. Ethiyo ddoonanara dda Yakobo tti ddawiidde? Ethiyo khe dda Samariya? Ethiyo mapuro oollapellamo mafano a Yuda eri wuuwi? Ethiyo kheri mu Yerusalemu?

⁶ Sika Apwiya enallota wi, “Samariya kineeromutthattusa ntepe, nipuro noollimamo emata yampesa. Mallukwaaye kineerewaatathillella o ntapo nave matthipellwaaye kineerewaavuhulla.

⁷ Mafanwaaye mattheene kineerewaanyenyanyenya nave ddoovelleella ddaye ddittheddene dda mahule ddineerotathillelliwa m'munlloni. Mafanwaaye mattheene kineerowoononga. Emphaso ddaye aakhenlleeye ovenyera wa mahule, amoddattho eneeroddiphariha mutteko voollivellani mahule.”

⁸ Vano Mika aallota wi, “Ekaamba ya yeella kineerewinlla moomoriha ethakaraka. Kineereweeta oohiwara esapato nave kiri epwillimwinddive, kikhuwaka wonanko khatwe ni winlla wonanko enthiwatiwa.

⁹ Makhwata a Samariya khenavolla nave aaphiya o Yuda. Woonongeya wohaatamella o Yerusalemu, muzinda wa athwaaka.”

Adani aamwaatamella Yerusalemu

¹⁰ “Vano muhaalleelle ddenndda a o Gati nave muhinlle naari vang'ono. Mudduupuruse munthupini o Beteleafura vawoonihani ethakaraka.

¹¹ Nyu ookhalla o Shafiri munaaye wuukaporoni muri epwillimwinddive ni oowulliwa muru. Athu a o Zanani khekhuma mu muzindiiwa. Mwawiiwa athu a o Betezele yinllaka, dduwellani wi khewora wuukaviherani.

¹² Athu a o Maroti ennakhupanya vootiyerellani nikavihero ekaamba yawi Apwiya aawiiha woonongeya vakhuviru ni Yerusalemu.

¹³ Sika nyu a o Lakishi, amakellelleni akavalo o magareta. Mwaattakihera machimo a o Israele, sika mwahaachimwiha athu a o Ziyoni.

¹⁴ Sika mullaanyane ni a o Moresheti Gati. Athu a o Akizibu eneerowoottottha mamwene a o Israele.

¹⁵ “Nyu a o Maresa kineerewuurumihellani adani wi yuugonjiheni. Attekweene a o Israele eneerothawella o Adulamu.

¹⁶ Nyu a o Yuda, chemani mpala wooniha wi munawinllella aniinyu mwaakondeenyu. Mukhalle ni nttari na echiwombankhanga vawi aniinyu yahuuhiyani.”