Mateyu 9 - Mawu a Mulluku

Yesu anamuchiriha muthu oorakalla

¹ Yesu aawella mu ekallawa allapuwa enyanja aphiya otawoni nko akhalleeye.

² Wenko athu yaaphiya ni muthu oorakalla akonaatthille vamachirani. Nave Yesu vawoonani echikhulupililwiiwa, aallota wa oorakallooyo wi, “Mukhwaaka, llipa murima, machimwaawo aakhululukiwa.”

³ Ahuddihi a malamulo* amodda yaallota m'murimani mwiwa wi, “Muthu yoolla anamullotella epewe Mulluku.”

⁴ Koma Yesu aadduwella maganizwiiwa sika ahaakoha wi, “Kaambiiwa tini munaganizeenyu ddeko ddoonanarannddo?

⁵ Yookhweya ttiivi, ollota wi, ‘Machimwaawo aakhululukiwa,’ apaalle ollota wi, ‘Venya weete?’

⁶ Kineerowoonihani vano wi, mi Mwaana a Muthu kookhalla ni olamulello va ellapo yavatthi wookhululukella machimo.” Sika aamulleella muthu oorakallooyo wi, “Venya, kusa machiraawo oroweke owaninyu!”

⁷ Vano muthooyo aavenya anarowa.

⁸ Athu yoonilliiwa yeella, yahoova wunchichi emutitimiha Mulluku, ekaamba yowaavaha athu olamulello yoolla.

Yesu anamwiithana Mateyu

⁹ Yesu aavenyavo vanipuroni valle, vano eetaka, aamoona muthu, nnddina naye Mateyu, akeraatthille mu enyumba yookhomihella misonkho. Aamulleella wi, “Kithware.” Nave Mateyu aavenya anamuthwara.

¹⁰ Yesu achaka mpa mwa Mateyu, ookhomiha misonkho anchichi ni athu amodda oochimwa yaaphiya navettho yaacha ni Yesu ni oohudderaaye.

¹¹ Afarisi* amodda yahoona nndda nave yahaakoha oohudderaaye wi, “Kaambiiwa tini ahuddihaanyu enachiiwa ni athu ookhomiha misonkho ni oochimwa?”

¹² Koma Yesu aawiiwa nave ahaakhulla wi, “Athu oohivoriiwa khenaya wa mullupa murete koma yaayove enavoriiwa.

¹³ Khaweni mwiiwesese ottaphullella wa mawu a Mulluku awi, ‘Kinapaalla echifundo ohiri mukuthove.’ Miyaano ngiwiille wi kiwiithane athu oolungama koma athu oochimwa.”

Nikoho na ddoohalla ocha

¹⁴ Vano yaawa oohuddera a Yohane Oobatiza wa Yesu ekoha wi, “Kaambiiwa tini hiyaano ni Afarisi ninnahalla ocha* wiilliwiilli koma oohudderaanyu khenahalla?”

¹⁵ Yesu ahaakhulla wi, “Ethiyo ttuuworeya wi awiithaniwa o machellello a okwati yinlleke ootthellooyo ari vaavo? Wohiworeya iyaayi! Koma eneerophiya enthawi yawi ootthellooyo aneerokusiwa va yaayo nave eneerohalla ocha.

¹⁶ “Khaavo muthu anakusa echigamba ya ekuwo esha asowella va yoowara yakhalle. Vawi echigamba esheeyo eneerokwinyeya ni waahulla yoowareeyo wunchichi ohiyana ni khalle.

¹⁷ Navettho khaavo muthu anamuhella vinyo musha mu mathumba anttapara akhalle vawi mathumba yaayo eneerophulleya, vinyooyo aneerotathiyamo nave mathumbaayo eneerewoonongeya. Koma vinyo mushooyo anahelliwa m'mathumbani asha nave piillinnddo ddineerosungeya phaama.”

Yesu anamuchiriha mwaana aamutthiyana a Yairo ni mutthiyana mmodda

¹⁸ Yesu alloteeye ddeko ddenndda, aawa muttekweene a Ayuda* amukokhorella, allota wi, “Mwanaka aamutthiyana ttuukhwa wene. Koma muwe mwiiyaatthi mattaanyu va olliyooyo wi akhallettho mukumi.”

¹⁹ Sika Yesu aavenya, amuthwara ni oohudderaayeene.

²⁰ Nave mutthiyana oohoowa ni ereta yoohikhumamo oonille mweeri wa miyakha khumi ni miilli aawa otulli wa Yesu nave aattannya mukhwipi mwa yawiikhuneellaaye.

²¹ Vawi aallota m'murimani mwaye wi, “Kattannya yawiikhuneellaaye, kineerochirihiwa.”

²² Yesu aarukunuwa amoona olliyooyo nave aallota wi, “Llipa murima, echikhulupilwaawo yohuuchiriha.” Waambeella enthawi yeeyo mutthiyanooyo aachira.

²³ Vano Yesu aavollowa mpa mwa muttekweenoolle. Aaphwanyille awiipa machipo a maliro ni athu attheene awinlla,

²⁴ aallota wi, “Khumani, attheene! Namwalloolla khakhwille koma animakona!” Vano attheene yaamuttheya mweepewe.

²⁵ Vano enthawi yeeyo athwaalle ekhumihiwe, Yesu aavollowa ochipindani wa namwallooyo amuphara nnatta nave avenya.

²⁶ Epilli yeella yaavuwa mu echigawo ettheene ya ellapweeyo.

Yesu anaachiriha athu eelli oohoona

²⁷ Yesu aavenyavo vanipuroni valle nave eetaka, athu eelli oohoona yaamuthwara. Yaakhuwa wi, “Nyu edduullu ya Davide, muneerelle echifundo!”

²⁸ Yesu avollowille mpa, athu eelli oohoonaalle yaawa nave ahaakoha wi, “Munnakhulupilila wi miyaano ttuuwora wuuchirihani?” Yahaakhulla wi, “Ee, Apwiya!”

²⁹ Vano Yesu aattannya miitthwiiwa nave aallota wi, “Ddeereye moollikana ni echikhulupilwaanyu!”

³⁰ Vano yahaamba woona. Yesu ahaalleellesesa wi, “Muhimulleelle nndda arive muthu!”

³¹ Koma alliwaayo yaavenyavo yavuwiha epilli ya Yesu mu echigawo ettheene ya ellapweeyo.

Yesu anamuchiriha muthu oohillota

³² Athwaalle yarowiiwa athu amodda yaaphiya wa Yesu ni muthu oohillota kaambiiwa aakhalla ni munepa woonanara.

³³ Nave munepa woonanarooyo okhumihiwe, enthawi yeeyo muthooyo ahaamba ollota nave arive muthu aattikhina. Yaakhuwa wi, “Khaninoone ddeko ddawi ddiidda mu Israelemmu waambeella khalle!”

³⁴ Koma Afarisi yaallota wi, “Tti muullupalli a minepa ddoonanara anamuvaha Yesu masiva ookhumiha minepa ddoonanara.”

Yesu anaamorella ethakaraka athu

³⁵ Yesu aheeteeta m'mizi ni m'matawoni mutthemwene ahuddihaka mu enyumba ddamavekello* ni ollalleya othenga waphaama wa omwene navettho waachiriha athu oovoriiwa ereta ddittheddene ni ddoovoreya ddittheddene.

³⁶ Yesu oonille mulloko wa athoolle, ahaamorella ethakaraka kaambiiwa athwaalle yaari ookhupanya ni oorama nikavihero wonanko enkhosa ddoohikhalla ni mbusa.

³⁷ Vano ahaalleella oohudderaaye wi, “Ddoohata ddohaatesa koma allupa mutteko tti ooyeva.

³⁸ Vekellani wa mwaneena a ddoohatannddo wi aarumihe allupa mutteko etthukumanihe ddoohata ddaye.”