Mateyu 8 - Mawu a Mulluku

Yesu anamuchiriha muthu amakate

¹ Yesu akitthalleeye ovenyera omwaangoni, mulloko muullupalli wa athu waamuthwara.

² Vano, muthu amakate aawa, amukokhorella, amuveka wi, “Apwiya, mwaapaallaka ttuuwora okeelliha.”

³ Yesu ahookolla nnatta naye amuttannya nave allota wi, “Kinnapaalla, ellihiwa!” Nave enthawi yeeyo aheellihiwa o makataaye.

⁴ Vano Yesu aamulleella wi, “Ngiiwa nndda vano! Ohimulleelle arive muthu koma khawe wa mullupa mukutho wi awoone wi woheella. Vano waheraatthi mukutho olle walamuliwe ni Mose wi vikhalle omboni wa athu wi woheellihiwa.”

Echikhulupililo ya akhoto a o Roma

⁵ Yesu avollowilleeye mu etawoni ya Kaperenao, akhoto muullupalli a o Roma aawa wa olliyooyo aveka nikavihero voollotani wi,

⁶ “Apwiya, kaporwaaka akonaatthille vabedini owaani ekaamba yoorakalla vawi annoona ovoreya wunchichi.”

⁷ Vano Yesu aamulleella wi, “Kineeroyaawo wi kamuchirihe.”

⁸ Koma akhoto muullupallooyo aallota wi, “Iyaayi, Apwiya. Miyaano nginaphwanella wi muvollowe mpa mwaka. Koma mweere moona ollota mawuve nave kaporwaaka aneerochira.

⁹ Vawi miyaanottho kookhalla ni uullupallaaka ookilamulella nave nameene kookhalla ni akhotwaaka kinaalamulelleemi. Kallota wa mmodda wi, ‘Rowa,’ annarowa, kallotattho wa mmodda wi, ‘Ngawa,’ annawa nave kamulleella kaporwaaka wi, ‘Ngeera ella,’ anneera.”

¹⁰ Yesu iiwalleeye ddenndda, aattikhina nave aallota wa athu yamuthwaraayo wi, “Ddawoona, kinimuulleellani wi ngimuphwanyille muthu mu Israele a echikhulupililo yuullupalli wonanko yeella.

¹¹ Kinimuulleellani wi anchichi eneerovenyera wookhuma nndduwa ni woovollowa nndduwa nave eneerocha ni makhollwaahu, Abrahamu, Isaki ni Yakobo, va machellello mu omwene wa Mulluku.

¹² Nave ayo yaaphwanenlle ovollowa mu omwene eneerovokhiwa mu epiphi ya woowallamella, wenko eneerekewinlla ni okhuuriha miino.”

¹³ Vano Yesu aamulleella akhoto muullupallooyo wi, “Hokollweella owaninyu nave eyo okhulupilinleewe eneereweeriwa wa weyaano.” Vano kaporwaayooyo aachirihiwa enthawi yeeyo.

Yesu anaachiriha athu anchichi

¹⁴ Yesu avollowille mpa mwa Petro, aawoona amoottonaaye a Petrooyo ekonaatthille vabedini evoriiwaka oviha mwiilli.

¹⁵ Ahaattannya nnatta niwa nave yaachirihiwa. Vano yaavenya emurumeyella ni ddoocha.

¹⁶ Vano voophiyani misikuwa athu amodda yaawaana wa Yesu athu anchichi ookhalla ni minepa ddoonanara. Yesu aakhumiha minepannddo ni mawuve navettho ahaachiriha oovoriiwa attheene.

¹⁷ Aheera nndda wi ddikwakhwanelle nnddo aallotille namallotella Yesaya wi, “Olliye yeekha aatukhulla ethakaraka ddahu ni wiireya ereta ddahu.”

Dda omuthwara Yesu

¹⁸ Yesu oonilleeye mulloko wa athu omwaaphenlle ahaalamula oohudderaaye wi eye vakhopella va enyanja.

¹⁹ Muhuddihi a malamulo* aawa wa olliye. Aallota wi, “Ahuddihi, miyaano kineerewuuthwarani orive weko munayeenyu.”

²⁰ Yesu aallota wi, “Akhatwe aakhalla ni milliha ddiwa navettho epallame ddookhalla ni emphuru ddiwa koma mi, Mwaana a Muthu, nginna naari voohameella murwaaka.”

²¹ Nave mmodda a oohudderaaye, aallota wi, “Apwiya, mukaakhullelle wi kaambe waavittha attiitthaaka.”

²² Koma Yesu aallota wi, “Kithware nave waahiye ookhwa yaavittheke ookhwa akhwiiwa.”

Yesu anamaalliha ephevo yuullupalli

²³ Vano Yesu aawella mu ekallawa nave oohudderaaye yaamuthwara.

²⁴ Moorurumusa ephevo yuullupalli yahoopa va enyanja valle, sika ekallaweelle yaari vakhuviru opwina. Koma Yesu aamakona.

²⁵ Oohudderaaye yaamuvenyiha nave ekhuwa wi, “Apwiya, nivulluseni nihanlle vakhuviru okhwa.”

²⁶ Yesu ahaakhulla wi, “Munoova ekaamba ya tini? Nyu athu eechikhulupililo yooyeva.” Vano aavenya asimwella ephevweeyo ni maaddaayo nave waakhalla okhurumuwa wuullupalli.

²⁷ Athu attheene yaari mukallawanimmo yaattikhina, ellota wi, “Muthu yoolla tti awiidde? Naari ephevo ni maaddi ddinnamwiiwellella.”

Yesu anaachiriha athu ookhalla ni minepa ddoonanara

²⁸ Yesu aphiyalleeye o echigawo ya athu a o Gadara vakhopella va enyanja, aakumana ni allopwana eelli oovenyera omakhunguni nko wavitthiwa athu ookhwa. Athu yaalla yaari a minepa ddoonanara nave yaari awoopiha wunchichi vawi khaavo muthu awora oweella musewu yoolla.

²⁹ Nave yaakhuwa wi, “Nuullikalleni tini nyuwaano, Mwaana a Mulluku? Moowa wuno wi munillake ehinakwakhwane enthawi eyo Mulluku atthoonlleeye wi athu ellakiwe?”

³⁰ Vakhuviru ni vaavo vaakhalla mulloko muullupalli wa ekumba ddichihiwaka.

³¹ Sika minepa ddoonanarannddo ddaamuveka Yesu wi, “Mwanikhumiha, munirumihe navollowe mu ekumbannddo.”

³² Yesu aaddilleella wi, “Khaweni.” Sika ddaakhuma navettho ddaavollowa mukumbanimmo. Vano mulloko muttheenooyo waathamaka ni okitthella munyanjanimmo nave waamorellamo opwina m'maaddinimmo.

³³ Oochiha ekumbannddo yaathawa eya o etawoni evuwiha mwahoolla ni yeeriweeyo wa athu yaari ni minepa ddoonanaraalle.

³⁴ Vano athu attheene a mutawoni mulle yaakhuma wi ekumane ni Yesu. Yamoonilliiwa yaamuveka wi avenyewo o echigawiiwa.