Mateyu 7 - Mawu a Mulluku

Dda oweeruza athu amodda

¹ “Muhiweeruzeke amodda wi Mulluku ahiweeruzeni.

² Vawi Mulluku aneeroweeruzani moophwanaphwana ni mmo munaaweeruzelleenyu athu amodda navettho aneerophariha mutteko mulingo woophwanaphwana ni oyo munaphariheenyu mutteko wa athu amodda.

³ Onamoonella tini mwaneello m'mwiitthoni mwa mukhwaawo koma onahiya woona murinda ori m'mwiitthoni mwawo?

⁴ Onawora ollota wa mukhwaawo wi, ‘Kinapaalla kimuvenyihemo mwaneello ari m'mwiitthoni mwawommo,’ weyaano ohinavenyihemo murinda ori m'mwiitthoni mwawo?

⁵ Nyu awoottha! Mwaambe ovenyihamo murinda ori m'mwiitthoni mwanyu nave muneerowora woona phaama wi mumuvenyihemo mwaneello ari m'mwiitthoni mwa mukhwiinyu.

⁶ “Muhaavaheke anapwa ddeko ddaweella, woova wi ttuurukunuwa ni wuullumani. Navettho muhinavokhella ddeko ddanyu ddoowallamella mutengo vahoollo va ekumba kaambiiwa ddineeronyingallella ni manyallwiiwa.

Omuveka, waashaasha ni wookotha

⁷ “Sika kinimuulleellani wi, vekani nave muneerewaakhella; ashaashani nave muneerophwanya; okothani nave nchiwi nineerohulliwa wa nyuwaano.

⁸ Vawi attheene ayo enaveka eneerewaakhella nave ayo enaashaasha eneerophwanya nave oyo anookotha aneerohullelliwa nchiwi.

⁹ Khaavo mwaana anaavahiwe nlluku ni attiitthinnya aavekille yoocha,

¹⁰ apaalle omuvaha enowa aavekille ehomba.

¹¹ Naari muri oonanara munnadduwella waavaha aniinyu ddeko ddaphaama. Attiitthaanyu ooddullu ennavaha ddeko ddaphaama wuukhwaranyani nyuwaano wa ayo enamuveka.

¹² “Muweerelleke athu amodda nnddo munapaalleenyu wi eweerellekeni nyuwaano. Nngu sika ottaphullella wa malamulo a Mose ni ehuddiho ya anamallotella.

Dda mullako mung'onong'ono

¹³ “Volloweellani va mullako mung'onong'ono kaambiiwa mullako wooya o gehena tti wooramballalla navettho museweene tti wookhweya nave eneetamo tti athu anchichi.

¹⁴ Vawi mullako wooyana o okumi woohimalla tti mung'onong'ono nave museweene tti wookatamiha sika athu enawuphwanya yoolla tti ooyeva.

Dda muteekho ni ezipaso ddiwa

¹⁵ “Chenjerani ni anamallotella awoottha; enaphiya wa nyuwaano yooneyaka oomaalleya wonanko enkhosa koma muwari mwiwa eri enama ddawoopiha

¹⁶ Muneerewaadduwella ni ddaweera ddiwa. Mpesa khonarukulliwa vamuteekhoni wa miiwa apaalle namukuyu vamuteekhoni wa epullathi.

¹⁷ Muteekho wawunnuwa phaama onniimma ezipaso ddaphaama koma muteekho wohunnuwa phaama khoniimma ezipaso ddaphaama.

¹⁸ Muteekho wawunnuwa phaama khoniimma ezipaso ddoonanara navettho muteekho wohunnuwa phaama khoniimma ezipaso ddaphaama.

¹⁹ Vano orive muteekho woohimma ezipaso ddaphaama, oneerewuuhiwa navettho oneerovokhiwa viikho.

²⁰ Sika muneerewaadduwella anamallotella awoottha ni ddaweera ddiwa.

Ochenjeza dda nllapo na echiweruzo

²¹ “Khe arive muthu anakiithana wi, ‘Apwiya, Apwiya’ anaavollowe mu omwene wa Mulluku. Vawi weera ddiiddo khonakwakhwanella koma ayo eneera ddoopaalla dda Attiitthaaka ooddullu sika enaavollowe.

²² Va nllapo na echiweruzo, athu anchichi eneerollota wi, ‘Apwiya, Apwiya! Mu nnddina nanyu naallotella mawu a Mulluku, mu nnddina nanyu naakhumiha minepa ddoonanara ni mu nnddina nanyu naheera ddoottikhiniha ddinchichi!’

²³ Vano kineerewaalleella wi, ‘Nguudduwenlleni naari vang'ono. Mukivenyerevo, nyu athu aweera ddoonanara!’

Dda athu eelli oomaka enyumba

²⁴ “Vano arive muthu oyo aniiwa ni weera mawaaka anaphwanaphwana ni muthu eezeru oyo aamakille enyumbaaye vanllukuni.

²⁵ Nave murimu aarupa, mihinje ddaaddalla navettho ephevo yahoopa mwamasiva va enyumbeeyo koma kheyaakumuwalle kaambiiwa yaamakiwa vanllukuni.

²⁶ “Koma arive muthu aniiwa mawaakaalla koma ahaapharihella mutteko anaphwanaphwana ni muthu ookarangeya amakille enyumbaaye vamihavani.

²⁷ Nave murimu aarupa, mihinje ddaaddalla navettho ephevo yahoopa mwamasiva va enyumbeeyo, sika yaakumuwa. Okumuwanko waari wawoopiha.”

²⁸ Yesu amallihalle ohuddiha, athu yaattikhina ni ehuddiherwaaye,

²⁹ vawi ahuddiha ni olamulello waakhwaranya ahuddihi a malamulo.*