Mateyu 6 - Mawu a Mulluku

Dda ovelleella nikavihero wa athu oohoowa

¹ “Wehesesani wi muheere mitteko ddanyu ddoolungama vamiitthoni va athu wi ewooneni. Mweera ddiidda vamiitthoni va athu khamwaakhella erive emphaso yoovenyera wa Attiitthaanyu ooddullu.

² “Sika mwaamuvahaka ello muthu oohoowa, muhinawellaka veeruwani wonanko awoottha ayo enavelleella ddeko mu enyumba ddamavekello* ni m'misewuni. Eneera ddiidda wi athu yaavaheke olemu. Ddawoona, kinimuulleellani wi yaallathi aathuviwa khalle.

³ Koma nyuwaano mwaamuvahaka ello muthu oohoowa, nnatta noonyottho nihidduwelle eyo nineera nnattanatta,

⁴ wi ekhalle yawiipittheya nave Attiittho awoona ddawiipittheya eneerewuuthuva.

Dda mavekello

⁵ “Mwaavekellaka, muhinaphwanaphwanaka ni awoottha! Alla ennakonda wiimella ni ovekella mu enyumba ddamavekello ni m'makhullukano wi arive muthu awooneke. Ddawoona, kinimuulleellani wi yaallathi ahaakhella khalle yoothuviwiiwa.

⁶ Koma weyaano waavekellaka vollowa mu echipindaawo yawiipittheya, owalle nchiwi, vano ovekelle wa Attiittho ayo ehinooneya. Vano Attiittho awoona ddawiipittheya eneerewuuthuva.

⁷ “Nave mwaavekellaka muhuulluulleke mawu wonanko athu oohimullapella Mulluku ayo eneesa milluku ddiwa ddineerowiiwellella kaambiiwa nivekello niwa noorekama.

⁸ Sika muhinaphwanaphwanaka ni yaayo. Attiitthaanyu ennadduwella khalle ddoopaalla ddanyu naari muhinaambe oveka.

⁹ Vano muvekelleke mwawi ddiidda, Attiitthiihu ooddullu, nnddina nanyu naweella nititimihiwe,

¹⁰ omwenaanyu owe, opaalla wanyu weeriwe, vatthimva wonanko ooddullu.

¹¹ Munivahe ollello, yoocha yoollello.

¹² Munikhululukelle machimwaahu, wonanko mmo ninaakhululukellaahu amodda ayo enilakwenlle.

¹³ Muhinikuselle woweesiwa, koma munivulluse wa Oonanarooyo.

¹⁴ “Mwaakhululukella ayo yuulakwenlleni, Attiitthaanyu ooddullu eneerewuukhulukellanittho.

¹⁵ Koma mwaahaakhululukella amodda sika Attiitthaanyu kheyuukhululukellani machimwaanyu.

Dda ohalla ocha

¹⁶ “Nave mwaahallaka ocha,* muhinoonihaka ekhove yookhupanya wonanko mmo eneerella awootthaayo. Alliwa ennananariha ekhove ddiwa wi arive muthu oone wi enimahalla ocha. Ddawoona, kinimuulleellani wi yaallathi aathuviwa khalle.

¹⁷ Koma weyaano waahallaka ocha, osuusulleke navettho opeseke meehaawo,

¹⁸ wi athu amodda ehidduwelleke wi onimahalla ocha. Koma Attiittho, ayo ehinooneya, eneerodduwella. Vano Attiittho enoona ddawiipittheya, eneerewuuthuva.

Dda eyuuma yooddullu

¹⁹ “Muhiitthukumanihelleke eyuuma va ellapo yavatthimva, mvo enjenjete ni murawa ddinnoonongiiwa navettho mvo allupaawiiya ennakhuvulla enyumba ni wiiya.

²⁰ Koma mwiisungelle nyookha eyuuma oddullu, nko enjenjete ni murawa ddihinoonongiiwawo navettho allupaawiiya khenakhuvulla enyumba ni wiiya.

²¹ Vawi wenko onakhalla eyuumaawo, murimaawo onakhallattho wenko.

Miittho tti wonanko enyali ya mwiilli

²² “Miittho tti wonanko enyali ya mwiilli. Miitthwaawo yakhalla aphaama, mwiillaawo muttheene onnaddalliwa owala.

²³ Koma miitthwaawo yaahikhalla aphaama, mwiillaawo muttheene oneeroddalliwa ni epiphi. Vano owala ori mwa weyaano watthattuwa epiphi, epipheene enaakhalle yawoopiha!

Dda Mulluku ni eyuuma

²⁴ “Khaavo mullupa mutteko anawora waarumeyella apwiya eelli vawi aneeromwiita mmoddooyo nave aneeromukonda mmoddooyo apaalle aneeromwiiwellella mmoddooyo nave aneeromuvevulla mmoddooyo. Emoddamoddave yeeyo khamuwora omurumeyella Mulluku ni orumeyella eyuuma.

²⁵ “Ella sika ekaambiiwa kinuulleelleemini nyuwaano wi muhikhupanyeke dda okumaanyu wi munaache tini apaalle munaawirye tini apaalle dda mwiillaanyu wi munaaware tini? Ethiyo okumi khonakhwaranya yoocha? Navettho mwiilli khonakhwaranya yoowara?

²⁶ Ganizerani dda epallame, khaddinamidda mmiddo apaalle otthukumaniha ddoohata ni ohella mukhokweni nave Attiitthaanyu ooddullu ennaddivahera. Ethiyo nyuwaano khamunapaalleya wunchichi okhwaranya epallame?

²⁷ Ttaani a nyuwaano anaanjerere okumaaye nllapo nimodda vookhupanyani?

²⁸ Nave kaambiiwa tini munakhupanyeenyu ekaamba ya ddoowara? Ganizerani wunnuwa wa malluwa a muhakani, khenaphara mutteko apaalle wiisowella weekhiiwa ddoowara.

²⁹ Nave kinimuulleellani nyuwaano wi mwene Solomoni ni eyuumaaye ettheene ariiyena, khaarina ddoowara ddooreera wonanko nimodda na malluwaalla.

³⁰ Mulluku sika anareeriha manasi a muhakani ayo enakhallavo ollellove koma osiisello enavokhiwa viikho. Nyu athu eechikhulupililo yooyeva! Olliyoolla khawora wuuwarihani nyuwaano?

³¹ “Sika muhikhupanyeke wi, ‘Yoochaaka enaavenyere wuuwi? Yoowiryaaka enaavenyere wuuwi? Ddoowara ddaka ddinaavenyere wuuwi?’

³² Athu oohimullapella Mulluku ennakhupanya dda ddeko ddenndda. Attiitthaanyu ooddullu ennadduwella wi munnapaalla ddeko ddittheddenenndda.

³³ Koma yawaamba mwaashaasheke omwene wa Mulluku ni echilungamwaaye nave aneerewuuvahani ddeko ddittheddenenndda.

³⁴ Vano muhikhupanyeke ni ddoosiisello vawi osiisello oneerewiikhupanyella mwa weekhiiwa mookwakhwanella. Nirive nllapo nookhalla ni ddookatamiha ddaye ddookwakhwanella.