Mateyu 5 - Mawu a Mulluku

Ehuddiho ya Yesu vamwaangoni 5.1—7.29

¹ Yesu oonilleeye mulloko wa athoolle, aawella vamwaangoni akeraatthi. Oohudderaaye yaamutthukumanella olliyooyo.

Odalisiwa

² Ahaamba waahuddiha oohudderaayo wi,

³ “Oodalisiwa tti ayo eri oohoowa m'munepani, vawi ennahakallalla ni madaliso a omwene wa Mulluku!

⁴ Oodalisiwa tti ayo enoopa ekutho vawi Mulluku aneerewaallipiha murima!

⁵ Oodalisiwa tti athu ayo eri oomaalleya, vawi Mulluku aneerewaavaha ellapo yavatthi wi ekhalle yayiwa!

⁶ Oodalisiwa tti ayo enavolliwa ettalla ni nthona noopaalla weera echilungamo, vawi Mulluku aneerewakwakhwanihella ddoopaalla ddiwa!

⁷ Oodalisiwa tti ayo enaweerella echifundo athu akhwiiwa, vawi Mulluku aneeroweerellattho echifundo!

⁸ Oodalisiwa tti ayo eri aweella murima, vawi eneeromoona Mulluku!

⁹ Oodalisiwa tti ayo enawiiha murendelle, vawi Mulluku aneerewaaromolla wi anaaye.

¹⁰ Oodalisiwa tti ayo enahoosiwa ekaamba yaweera echilungamo, vawi ennahakallalla ni madaliso a omwene wa Mulluku!

¹¹ “Muri oodalisiwa athu yaawuunyaambusakani, yaawuuhoosakani nave yaawuullotellakani mwawoottha ddoonanara ddittheddene kaambiiwa nyuwaano tti oohudderaaka.

¹² Kotellani nave hakallallani kaambiiwa muneerothuviwa wuullupalli oddullu. Anamallotella yaahoosiwattho mwawi ddiidda khalle muhinayariwe nyuwaano.

Dda mwiinyu ni owala

¹³ “Nyu muri wonanko mwiinyu wa athu attheene a va ellapo yavatthi. Koma mwiinyu watthulluwa khoweerihiwattho wi oddiveke. Khonnattho mutteko, sika onnatathilliwa nave athu ennawuunyingalla.

¹⁴ “Nyu muri wonanko owala wa athu attheene a va ellapo yavatthi. Muzinda oyo omakiwe vamwaangoni khonaworeya ovittheya.

¹⁵ Khaavo muthu anakhariha enyali, ayikhuneella ni muno koma anahiya va yoohiyavo enyali, mvo enamumolleelliiwa arive muthu mpammo.

¹⁶ Emoddamoddave yeeyo owala wanyu wooneyeke vamiitthoni va athu wi vawoonani mitteko ddanyu ddaphaama yaatitimihe Attiitthaanyu ooddullu.

Dda malamulo a Mose

¹⁷ “Muheese miyaano koowa va ellapo yavatthi wi kaahiihe malamulo a Mose ni ehuddiho ya anamallotella. Ngiwiille wi kaahiihe malamulwaayo koma wi kaakwakhwanihe.

¹⁸ Vawi kinimuulleellani ddawoona wi, ophiyera oddullu ni ellapo yavatthi ddimallille, khaviwa vivenyihiwa nlemba ning'onong'ono nimodda naari etthoka emodda va malamulwaalla ophiyera ddittheddene ddeeriwe.

¹⁹ Vano oyo ahiniiwellella nimodda na malamulo yaalla naari lamulo ning'onong'ono navettho anaahuddiha athu amodda wi ehiiwellelleke, yooyo aneerokhalla mung'onong'ono mu omwene wa Mulluku. Koma oyo aniiwellella malamulwaalla navettho anaahuddiha athu amodda wi yiiwellelleke, aneerokhalla muullupalli mu omwene wa Mulluku.

²⁰ Kaambiiwa kinimuulleellani wi, munaavollowe mu omwene wa Mulluku mwalungama wunchichi waakhwaranya ahuddihi a malamulo* ni Afarisi* vaweerani nnddo anapaalla Mulluku.

Dda onanariwa

²¹ “Mwahiiwa wi makhollwaanyu yaalleelliwa wi, ‘Ohiiphe; nave oomwiipha muthu mukhwaaye aweeruza eneeromuphwanya wi tti oochimwa.’

²² Koma miyaano kinuulleellani wi wamunanariwella mukhwaawo attekweene a millatu eneerewuuphwanya wi tti oochimwa. Wamullotella epewe mukhwaawo wi, ‘Muthu ookarangeya we’ oneerokusiwa oya wa attekweenaanyu aweeruza millatu. Navettho wamullotella epewe mukhwaawo wi, ‘Okarangeya, oohikhalla ni muttekowe,’ oneerophwanella ovokhiwa mu gehena.

²³ “Sika waaheraatthiki mukutho vanikuwani mu enyumba ya Mulluku nave vano wuupuwella wi mukhwaawo annuukhupanya,

²⁴ ohiye emphasweeyo vahoollo va nikuwa vaavo nave oye waambe waattana ni mukhwaawooyo, weera ddiiddo owe oheraatthi mukuthooyo.

²⁵ “Muthu uukusella vanthatoni namillatu amba weeseesa waattana ni oyo uusumenlle mwawaakuva. Waaheera ddiiddo aneerewuuvelleella wa aweeruza nave ooweeruzooyo aneerewuuvelleella wa akhoto wi akhotooyo uuhiye mundende.

²⁶ Kinimuulleella ddawoona wi khokhuma ophiyera ollivenlle makobiri mattheene.

Dda oraruwa

²⁷ “Mwahiiwa wi waallotiwa wi, ‘Ohiraruwe.’

²⁸ Koma miyaano kinuulleellani wi, arive muthu anamuweha mutthiyana navettho anamupaalla, ooraruwana khalle m'murimani mwaye.

²⁹ Sika niittho nawo nuuchimwiha, onikhorokottemo navettho onitathille! Tti waphaama wa weyaano wi emodda ya eziwalo ddawo evenyevo okhwaranya okhalle nimwiillaawo muttheene koma ovokhiwe mu gehena.

³⁰ Nnatta nawo nuuchimwiha oniphadde nave onitathille! Tti waphaama wa weyaano wi emodda ya eziwalo ddawo etathilliwe ohiyana ni wi okhallena mwiillaawo muttheene koma ovokhiwe mu gehena.”

Dda omwallana

³¹ “Waallotiwattho wi, ‘Oyo anamuhiya mwaariye amwinnyeke kalata oomwallanella.’

³² Koma miyaano kinuulleellani wi, mullopwana amuhiya mwaariye ahiraruwalle, annamweeriha mutthiyanooyo oraruwa atthelliwattho nave mullopwana amutthella mutthiyana oohiyiwooyo animararuwattho.”

Dda ollupella

³³ “Mwahiiwattho wi waallotiwa wa makhollwaanyu wi, ‘Ohillupelle mwawoottha koma weereke eyo wallupenlleewe wa Apwiya.’

³⁴ Koma miyaano kinuulleellani wi, ohillupelleke wene. Ohillupelleke vooromollani oddullu vawi wenko tti mpando woomwene wa Mulluku;

³⁵ naari vooromollani ellapo yavatthi vawi tti yoonyingallavo manyallwaaye naari oromolla Yerusalemu vawi ori muzinda wa Mwene muullupalli, Mulluku.

³⁶ Ohillupellettho vooromollani murwaawo vawi khowora weelliha naari oripiha neehi nawo nimodda.

³⁷ Mukhulleke ollota wi, ‘Ee’ mwaapaallaka waakhullella apaalle, ‘Iyaayi mwaapaallaka oruna.’ Mawu munaanjerereenyu mwaallupellaka enavenyera wa Oonanarooyo.”

Dda ddoohokollosellana

³⁸ “Mwahiiwa wi waallotiwa wi, ‘Niittho olliva niittho, niino olliva niino.’

³⁹ Koma miyaano vano kinimuulleellani wi, muhinamuhokollosella muthu aweerellani yoonanara. Muthu awuukutha vanramani noonnattanatta, ohimuhokolloselle, omwinnyettho nrama noonyottho wi awuukuthe.

⁴⁰ Nave muthu mmodda uukusella vanthatoni namillatu opaalla wi akuse malayaawo, omwaakhullelle akusettho yawiikhuneellaawo.

⁴¹ Nave akhoto uuwatihera wi omutukhullelle katundwaaye weetena mutunda mmodda, weyaano weetekena mitunda miilli.

⁴² Nave muthu uuvekani ello, mumvaheke, muthu apaalla opolleya ellwaanyu, mumpolleyeke.”

Dda okonda adani

⁴³ “Mwahiiwa wi waallotiwa wi, ‘Omukondeke mukhwaawo, owiiteke adanaawo.’

⁴⁴ Koma miyaano vano kinimuulleellani wi, mwaakondeke adanaanyu nave mwaavekellelleke ayo enuuhoosani,

⁴⁵ wi moonihe wi muri anamwani a Attiitthaanyu ooddullu. Vawi annoopiha nndduwa wa athu oonanara ni aphaameene nave annamurupiha murimu wa ayo eneera ddoonanara ni wa ayo eneera ddaphaama.

⁴⁶ Mwaawaakondaka yaayove enuukondani, Mulluku anuuthuveni mwawiidde? Naari ookhomiha musonkho enneera ddiiddo.

⁴⁷ Nave mwaawaavahaka mooni akhwiinyuve, mweerilleenyu tti tini yookhwaranya athu amodda? Naari athu oohimullapella Mulluku eneera ddiiddo!

⁴⁸ Munaphwanella wi mukhalle aweella wunchichi vawi Attiitthaanyu ooddullu tti aweella.