Mateyu 4 - Mawu a Mulluku

Yesu aneesiwa ni Satana

¹ Vano Munepa Waweella waamukusa Yesu oya muchipululuni wi eesiwe ni Satana.

² Nave emanlle mallapo 40 otthaana ni mahiiyu ahaallaka ocha, ettalla yaamuvolla.

³ Vano Satanoolle aawa amweesa voollotani wi, “Nyu mwaarimi muri Mwaana a Mulluku lamulani mallukwaalla wi etthattuwe yoocha.”

⁴ Koma Yesu ahaakhulla wi, “Mawu a Mulluku eni, ‘Athu khenakhalla ni okumi ekaamba ya yoochave, koma ni mawu oollotiwa ni Mulluku.’ ”

⁵ Vano Satana aamukusella Yesu o muzinda waweella, Yerusalemu. Aamwiimesa otthoka va enyumba ya Mulluku,

⁶ nave allota wi, “Nyu mwaarimi muri Mwaana a Mulluku ivokheni nyookha vatthi ovenyera vaava vawi mawu a Mulluku eni, ‘Mulluku aneerewaalamulella angelwaaye dda weyaano wi yuukaphulleni ni mattiiwa, wi manyallwaanyu ehiphoreye vamallukuni.’ ”

⁷ Yesu ahaakhulla wi, “Navettho mawu a Mulluku eni, ‘Ohiiweese Apwiya Mullukwaawo.’ ”

⁸ Vano Satana aamukusella Yesu vamwaangoni woorekamesesa navettho aamooniha moomwene mattheene a va ellapo yavatthi ni ntitimiho niwa,

⁹ nave allota wi, “Kineerewuuvaha ddittheddenenndda wakikokhorella ni okillapella.”

¹⁰ Vano Yesu ahaakhulla wi, “Kivenyerevo, Satana! Mawu a Mulluku eni, ‘Waallapelleke Apwiya Mullukwaawo nave omurumeyelleke yooyove.’ ”

¹¹ Vano Satanooyo aamuhiya Yesu nave angelo yaawa emurumeyella.

Yesu anaamba muttekwaaye o Galileya

¹² Yesu iiwalleeye wi Yohane oomakiwa aahokollweella o echigawo ya Galileya.

¹³ Aavenyawo o etawoni ya Nazareti nave aaya akhalla o Kaperenao, etawoni ya mukhwipi mwa enyanja ya Galileya,* mu malire a Zebuloni ni Nafutali.

¹⁴ Nndda ddeereyille wi ddikwakhwanelle nnddo aallotille namallotella Yesaya wi,

¹⁵ “We echigawo ya Zebuloni ni echigawo ya Nafutali, vamusewuni wooya o enyanja, vakhopella va Yordani, we Galileya, nko onakhalla athu oohimullapella Mulluku,

¹⁶ athwaawo ayo yaari mwiipiphini, ahoona owala wunchichi. Athu ayo yaari munipuroni na muuthuuchi wa okhwa, owala wohaaphiyera.”

¹⁷ Ovenyera enthawi yeeyo Yesu ahaamba ollalleya othengaaye wi, “Rukunuwani murima kaambiiwa omwene wa Mulluku wohaatamella!”

Yesu anawiithana oottottha ehomba asese

¹⁸ Yesu eeteeye mukhwipi mwa enyanja ya Galileya, aawoona athu eelli ayo yaari awiipha ehomba, Simoni (ooromolliwa Petro) ni mwanamunne Andreya, yiiphaka ehomba ni nthavi mu enyanja.

¹⁹ Yesu aallota wa athwaayo wi, “Waawoni mukithware miyaano nave kineerewuuhuddihani wi mukhalle owaattottha athu.”

²⁰ Enthawi yeeyo yaahiya mathaviiwa enamuthwara.

²¹ Eetille oya vahoollo aawoonattho athu amodda eelli, Yakobo ni mwanamunne Yohane, anamwani a Zebedayo. Alliwaalla yaari mu ekallawiiwa ni attiitthiiwa, Zebedayo, esowaka mathaviiwa. Yesu aawiithana wi emuthware ni omuttakiha,

²² vano enthawi yeeyo yaahiya ekallaweelle ni attiitthiiwa nave emuthwara olliyooyo.

Yesu anaamba ohuddiha, ollalleya ni waachiriha athu oovoriiwa

²³ Yesu aheeteeta mu Galileya mutthemwene ahuddihaka mu enyumba ddamavekello* ni ollalleya othenga waphaama wa omwene navettho waachiriha athu oovoriiwa ereta ddittheddene ni ddoovoreya ddittheddene.

²⁴ Epillaaye yaavuwa mu echigawo ettheene ya Siriya, sika athu yaamukusella athu attheene a ereta ddoohiyanahiyana ni oovoriiwa oohiyanahiyana, athu ookhalla ni minepa ddoonanara, a achillechille ni oorakalla nave olliye ahaachiriha attheene.

²⁵ Vano milloko ddinchichi ddaamuthwara ovenyera o Galileya, o Dekapolisi* o Yerusalemu, o Yudeya ni nipuro na vakhopella va Yordani.