Mateyu 3 - Mawu a Mulluku

Ollalleya wa Yohane Oobatiza

¹ Viviralle miyakha ddinchichi Yohane Oobatiza aaya o chipululu ya o Yudeya aamba ollalleya.

² Allalleya wi, “Rukunuwani murima kaambiiwa omwene wa Mulluku wohaatamella!”

³ Yohane tti oyo namallotella Yesaya amwaakeeye allotilleeye wi, “Okhuwa wa muthu mmodda muchipululuni onallalleya wi, ‘Llimani musewu wa Apwiya, okollani ettilla wi yeetemo.’ ”

⁴ Yohane awara ddoowara ddawoopiwa ni mapururu a ekamira,* am'makella laamba anttapara muyuununi mwaye navettho acha middope ni enwi dda muchipululuni.

⁵ Athu oovenyera o Yerusalemu ni mu Yudeya mutthemwene ni mapuro mattheene awaatamana ni muhinje wa Yordani, yaaphiya wa olliyooyo.

⁶ Yaalapa machimwiiwa nave ahaabatiza athwaayo mu Yordani.

⁷ Vano Yohane awoonilleeye athu anchichi a mulloko wa Afarisi* ni wa Asaduki* ewaaka wi alliwattho ebatiziwe, ahallotella wi, “Nyu enowa! Ttaani uulleelleni wi muthawe ollaka wa Mulluku onawanko?

⁸ Mweereke ddeko ddawooniha wi moorukunuwa murima wonanko muteekho onimma ezipaso ddaphaama.

⁹ Nave muhinallotaka weekhiinyu wi, ‘Abrahamu sika nikhollo nahu.’ Kinimuulleellani wi Mulluku ttuuwora otthattusa mallukwaalla okhalla edduullu dda Abrahamu.

¹⁰ Kottokwa ari khalle vatthi va orive muteekho wi yuuhe woohimma ezipaso ddaphaama wi ovokhelliwe viikho.

¹¹ “Kinuubatizani ni maaddi wooniha wi moorukunuwa murima koma oyo anaawe mutulli mwaka tti muullupalli ookikhwaranya miyaano. Ngiphwanenlle naari otukhulla esapato ddaye. Yoolla aneerewuubatizani ni Munepa Waweella ni munllo.

¹² Ookusa etthello m'mattani mwaye wi amuveethe tirigu. Aneeromuhella tirigwaaye mukhokweni mwaye; koma aneerowoosa mallullaayo vamunlloni woohithiima.”

Obatiziwa wa Yesu

¹³ Va enthawi yeeyo Yesu aaphiya o Yordani ovenyera o Galileya wi abatiziwe ni Yohane.

¹⁴ Nave Yohane apaalla wi amuwatteelle, voollotani wi, “Nyu sika munaakibatize ohiri miyaano kuubatizeni. Munawattho wa miyaano?”

¹⁵ Koma Yesu aamwaakhulla wi, “Waakhullelle vano vawi mwawi ddiidda nineerokwakhwaniha echilungamo ettheene.” Vano Yohane ahaakhullella.

¹⁶ Yesu abatiziwe wene, enthawi yeeyo aakhumamo m'maaddini nave oddullu waamuhulleyella, vano ahoona Munepa a Mulluku akitthaka wonanko ekhunda va olliye.

¹⁷ Vano mawu yahiiweya ovenyera oddullu wi, “Olla sika Mwanaka ookondiwa, kinnahakallallana ni murimaaka muttheene.”