Mateyu 28 - Mawu a Mulluku

Yesu anavenyihiwa wa ookhwa

¹ Niviralle nllapo na Sabata na Ayuda oyaaka ni osa wa Nllapo Namulungu, Mariya Magadalena ni Mariya mmoddoolle, yaawa wi enoone nihamenne.

² Moorurumusa waakhalla echivomerezi yuullupalli vawi mungelo a Apwiya aakittha ovenyera oddullu aphiya o mahame wulle aphikirisa nllukunne akeraatthi vaddullu vaye.

³ Wooneya waye waari woowala wonanko ettari nave yoowaraaye yaari yaweella wunchichi wonanko nthoche.

⁴ Ooweheraalle yaatthukumella, yiikuha ekhalla wonanko athu ookhwa vawi yaamoova wunchichi.

⁵ Mungeloolle aallota ni atthiyanaalle wi, “Muhoove vawi kinnadduwella wi munamwaasha Yesu oyo aatthomeyiwe vamutandani.

⁶ Yooyo khaamo mmu vawi aavenyihiwa wa ookhwa moollikana ni mmo aallotilleeye. Waani wuno moone vanipuroni mvo vaari mutembwaaye.

⁷ Akuvani veneva muye wa oohudderaaye mwaalleelle wi, ‘Oovenyihiwa wa ookhwa nave ari muhoollo mwanyu oya o Galileya. Muneeromoona wenko.’ Ella sika kaweelleemi wi kuulleelleni.”

⁸ Sika yaavenyavo vanihamenimvo mwawaakuva mwawoova ni moohakallalla wuullupalli nave ethamakella waalleella oohudderaaye.

⁹ Moorurumusa Yesu aakumana ni alliwaayo aavaha mooni. Vano alliwa yaawa emphara manyallwaaye moomullapella.

¹⁰ Vano Yesu aallota wa yaayo wi, “Muhoove, khaweni mwaalleelle oohudderaaka wi eye o Galileya nave eneerokoona miyaano wenko.”

Ddallotiwe ni oowehera

¹¹ Atthiyanaalle yarowiiwa, amodda a akhoto yawehera nihamenne yaahokollweella omuzindani wulle yaalleella allupa mukutho uullupalli ddittheddene ddeereyille.

¹² Allupa mukutho uullupallaalle yaatthukumana ni attekweene a Ayuda* yiiwanana waavaha akhotwaalle makobiri manchichi.

¹³ Nave yahaalleella wi, “Mulloteke wa athu wi, ‘Oohudderaaye yaawa mahiiyu yiiya mutembwaaye hiyaano niikimakona.’

¹⁴ Nave oolamulella a o Roma iiwa mwaha yoolla, hiyaano nineeromutakhella wi nyuwaano khamunna mullatu nave khavikhalla yawuukhupanyihani.”

¹⁵ Akhoto ooweheraalle yahaakhella makobiraalle, yeera mmo yalleelliwiiwa. Sika mwaha yoolla waavuwa mwa Ayuda attheene ophiyera ollello vaava.

Yesu anaaruma oohudderaaye

¹⁶ Oohuddera khumi ni mmoddaalle yaaya o Galileya omwaangoni nko Yesu aalleelleeye wi eyeewo.

¹⁷ Yamoonilliiwa yaamullapella koma amodda yaanakaika.

¹⁸ Yesu aaphiya vakhuviru allota wi, “Attiitthaaka aakivaha olamulello muttheene wa oddullu ni wa vatthimva.

¹⁹ Sika khaweni wa athu a mitundu ddittheddene mwaarukunuse ekhalle oohudderaaka vawaabatizani mu nnddina na Attiitthaaka ni na Mwaana ni na Munepa Waweella.

²⁰ Nave mwaahuddihe wi yiiwellelleke ddeko ddittheddene kuulamulalleemini nyuwaano. Nave miyaano kiri ni nyuwaano mallapo mattheene ophiyera omalla wa ellapo yavatthimva.”