Mateyu 27 - Mawu a Mulluku

Yesu anakuselliwa wa Pilato

¹ Osaka wene ohinase allupa mukutho uullupalli attheene ni attekweene a Ayuda* yaakumana wi yiiwanane ddoomwiipha Yesu.

² Yaammaka emukusa, emuvelleella wa Pilato, oolamulella a o Roma.

Okhwa wa Yudasi

³ Vano Yudasi oomuvelleella Yesoolle, oonilleeye wi aakamulla wi Yesu iiphiwe, aamoriwa ethakaraka ni nnddo eerilleeye. Nave aahokollosa makobiri 30 wa allupa mukutho uullupalli ni attekweene a Ayuda.

⁴ Nave aallota wi, “Koochimwa miyaano voomuvelleellani muthu oohichimwa wi iiphiwe!” Yaamwaakhulla wi, “Khaninna mutteko ni ddennddo hiyaano. Oddoonelle weekhaawo.”

⁵ Yudasi aavokhella vatthi makobiraalle va enyumba ya Mulluku avenyavo aya iimakellella.

⁶ Allupa mukutho uullupalli yaatota makobiraalle ellota wi, “Malamulwaahu khenanakhullella ohiya makobiri awi ddiidda ni makobiri a mu enyumba ya Mulluku kaambiiwa tti a nikhame.”

⁷ Vano yahiiwanana wi makobiraayo ekullelle emata eyo yaari ya mullupa awoopa mino wi ekhalle mahame a alleto.

⁸ Kaambiiwa emata yeella enaromolliwa wi emata ya Nikhame ophiyera ollello vaava.

⁹ Nndda ddaakwakhwaniha nnddo namallotella Yeremiya aallotilleeye wi, “Yaakusa makobiri 30 waata wene athu a o Israele yiiwananiiwa wi emukullihelle.

¹⁰ Nave yaakullella emata eyo yaari ya mullupa awoopa mino wonanko mmo Apwiya yaakilamulalliiwa miyaano.”

Pilato aamukoha Yesu

¹¹ Vano Yesu ahiimella vamiitthoni va Pilato, oolamulella a o Romoolle nave oolamulellooyo aamukoha wi, “We tti Mwene a Ayuda?” Yesu ahaakhulla wi, “Mullotillethi nyookha.”

¹² Nave allupa mukutho uullupalli ni attekweene a Ayuda yamullotelliiwa wi oochimwa, olliye khaakhullalle ello.

¹³ Sika Pilato aamukoha wi, “Ethiyo khoniiwa ddittheddene enuullotelliiwanndda?”

¹⁴ Koma Yesu khaawaakhullalle naari mawu amodda. Sika oolamulella a o Roma aattikhina wunchichi.

Mullatu onakamulliwa wi Yesu iiphiwe

¹⁵ Va erive Ehakallallo ya Paska, oolamulella a o Roma aaddollweella waattaphullella muthu oomakiwa mmodda oyo athu yamupaalliiwa.

¹⁶ Nave enthawi yeeyo aakhallavo oomakiwa oodduwanyeya, nnddina naye Baraba.

¹⁷ Sika athwaalle etthukumanne, Pilato ahaakoha wi, “Munapaalla kuuttaphullelleni aani, Baraba apaalle Yesu ooromolliwa Mesiya?”*

¹⁸ Vawi aadduwella wi yaamvelleella Yesu wa olliyooyo ekaamba ya ehache.

¹⁹ Vano Pilato akeraatthille vampandoni wooweeruzella mwaariye aarumiha wa olliyooyo mawu awi, “Muheere ello ni muthu oolungamoolla vawi mahiiyu koohoowa muullohani ekaamba ya yoolla.”

²⁰ Koma allupa mukutho uullupalli ni attekweene a Ayuda yahaakopa athwaalle wi emuveke Pilato amuttaphulle Baraba nave Yesu iiphiwe.

²¹ Pilato ahaakohattho wi, “Oovi a eellaalla munapaalleenyu wi kuuttaphullelleni?” Nave alliwa yahaakhulla wi, “Baraba!”

²² Pilato ahaakoha wi, “Vano keerena tini Yesu ooromolliwa Mesiya?” Attheene yahaakhulla wi, “Atthomeyiwe vamutandani!”

²³ Nave Pilato ahaakoha wi, “Enre tini yoonanara?” Vano yaakhuwa moollipiha wi, “Atthomeyiwe vamutandani.”

²⁴ Pilato oonilleeye wi khaphuravo ello vawi vaakhalla mapokoso, aakusa maaddi anawa m'mattani vamiitthoni va athwaayo allota wi, “Mi nginna mullatu va nikhame na muthu yoolla, muddoonelle nyookha!”

²⁵ Athu attheenaalle yahaakhulla wi, “Mullatu wa okhwa wa muthu yoolla okhalle va hiyaano ni edduullu ddahu.”

²⁶ Vano Pilato ahaattaphullella Baraba. Aalamulella wi Yesu awashulliwe nave aamuvelleella wi atthomeyiwe vamutandani.

Akhoto enamullotella epewe Yesu

²⁷ Vano akhoto a Pilato yaamukusa Yesu eyaana o nthato namillatu na Aroma, emutthukumanihella akhoto attheene.

²⁸ Yaamurulla ddoowara ddaye, emuwariha mukanjo woofiira.

²⁹ Vano yaalluwa echipewa ya miiwa emuwariha m'muruni mwaye nave emuphareelliha ekopo mu nnattanatta naye. Nave yaanakokhora vahoollo vaye enamullotella epewe wi, “Mooselliwa, Mwene a Ayuda!”

³⁰ Yaanamuttaphera mare, enakusa ekopweelle enamuukuthana vamuruni vaye.

³¹ Vano yamallihalliiwa omullotella epewe, yaamurulla mukanjoolle emuwariha ddoowara ddayenndde. Nave yaamuhoolliha oyaana wi yamutthomeye olliye vamutandani.

Yesu anatthomeyiwa vamutandani

³² Akhotwaayo yakhumiiwa ni Yesu, yaakumana ni muthu a o Kurene nnddina naye Simoni nave akhotwaalle yaamuwatihera wi iireye mutanda wa Yesu.

³³ Nave yaaphiya vanipuroni nooromolliwa Gologota, ottaphullella wiwa, “Nipuro na Nikharakadda.”

³⁴ Yaamuvaha vinyo oottakanyihera ni wamwa wi amuwirye koma amullawihalleeye, khaamuwiryalle.

³⁵ Yaamutthomeya vamutandani ni okawana ddoowara ddaye weekhiiwa yoombesille.

³⁶ Emanlle nndda yaakeraatthi vaavo enamuwehera.

³⁷ Yahiiyaatthi vaddullu va murwaaye yoolembiwa ya ekaamba yoomwiiphella wi, “Olla tti Yesu, Mwene a Ayuda.”

³⁸ Vano ezigawenga piilli ddaatthomeyiwa vamutandani ni Yesu, mmodda o nnattanatta ni mmoddooyo o nnatta noonyottho.

³⁹ Athu oovira yaanatikha miru ddiwa enamullotella epewe.

⁴⁰ Yaallota wi, “We oowora okumulla enyumba ya Mulluku oyimakattho mallapo mararu wiivulluse weekha nave okitthevo vamutandanimvo waari Mwaana a Mulluku!”

⁴¹ Emoddamoddave yeeyottho allupa mukutho uullupalli ni ahuddihi a malamulo* ni attekweene a Ayuda yaamullotella epewe wi,

⁴² “Aanaavullusa amodda koma khanawora wiivullusa yeekha. Khe olla mwene a Israele? Akitthevo vamutandanimvo vano wi nimukhulupilile!

⁴³ Annamukhulupilila Mulluku, yooyothi amuvulluse vano aarimi amwaakhullellaka olliyooyo. Vawi aallota wi, ‘Miyaano kiri Mwaana a Mulluku.’ ”

⁴⁴ Navettho ezigawenga nnddo ddatthomeyiwena vamutandani vamodda ddaamullotella epewe emoddamoddave yeeyo.

Okhwa wa Yesu

⁴⁵ Waambeella 12 koloko otthaana ophiyera 3 koloko waakhalla epiphi mu ellapo ettheene.

⁴⁶ Voowaatamellani 3 koloko otthaana yooyo, Yesu aakhuwa moollipiha wi, “Eli, Eli, lama sabakitani?” Ottaphullella wiwa, “Mullukwaaka, Mullukwaaka, mukihiyere tini?”

⁴⁷ Athu amodda yiimenlle vaavo yaamwiiwa nave yaallota wi, “Muthu yoolla anamwiithana namallotella Eliya.”

⁴⁸ Vano mmodda a yaayo aathamaka akusa esiponje atthaveya mu vinyo oonyuunya ahiya otthoka wa ekopo, amvahera wi amuwirye.

⁴⁹ Koma amodda yaallota wi, “Ngatiyerani, noone namallotella Eliya eeki awe wi amuvulluse!”

⁵⁰ Yesu aakhuwattho moollipiha nave aakhwa.

⁵¹ Nave ekatani yoohiyaniha mapuro meelli a mu enyumba ya Mulluku yahaahuwa okawaneya variyari ovenyera vaddullu ophiyera vatthi. Nave ellapo yaatikheya nave malluku yaatthalleya.

⁵² Mahame yaahulleya nave athu anchichi a Mulluku Aweella murima ayo yaari ekhwille, yaavenyihiwa wa ookhwa.

⁵³ Yaakhumamo mu mahame mwiwa nave Yesu avenyille wa ookhwa, alliwaayo yaavollowa mu muzinda waweella, Yerusalemu, yooneya wa athu anchichi.

⁵⁴ Akhoto muullupalli a o Roma ni akhotwaaye ayo yamuwehera Yesu, yahoona echivomerezi ni ddeko ddittheddene ddeereya. Yahoova wunchichi ellota wi, “Ddawoona, olla aari Mwaana a Mulluku!”

⁵⁵ Vaakhalla atthiyana anchichi yamoonella Yesu voorekama. Yaalla tti atthiyana yaamuthwanre Yesu ovenyera o Galileya emurumeyellaka.

⁵⁶ Mwa yaayo mwaari Mariya Magadalena ni Mariya, amennya a Yakobo ni Yosefe navettho mwaara Zebedayo.

Ovitthiwa wa Yesu mu mahame

⁵⁷ Vano misikuwa ophiyalle aawa mullopwana eeyuuma oovenyera o etawoni ya Arimateya, nnddina naye Yosefe, yooyottho aari oohuddera a Yesu.

⁵⁸ Olliye aaya wa Pilato aveka mutembo wa Yesu. Vano Pilato aalamulella wi ovelleelliwe wa olliyooyo.

⁵⁹ Sika Yosefe aakusa mutembooyo awuhuruwella ni ekuwo yanaanweene.

⁶⁰ Aawuvittha mu mahamaaye anaanweene oosemiwa vanllukuni. Aaphikirisella nlluku nuullupalli omullakoni wa mahamaayo nave aavenyavo.

⁶¹ Mariya Magadalena ni Mariya mmoddoolle yaakeraatthi vaavo voowehana ni mahamaayo.

Oowehera enahiyiwa va nihame na Yesu

⁶² Osaka wene, nno naari nllapo na Sabata, Nllapo Nookhozekella, allupa mukutho uullupalli ni Afarisi* yaatthukumana wa Pilato.

⁶³ Yaallota wi, “Apwiya, nohuupuwella wi awootthoolle ahinakhwe aallota wi, ‘Kineerovenyattho wa ookhwa evinre mallapo mararu.’

⁶⁴ Ekaamba ya yeella mulamule wi nihame niweheriwe ophiyera nllapo naneerarunno, woova wi oohudderaaye enaawe emwiiyemo. Yeeddiiddo enaalloteke wa athu wi olliye oovenyihiwa wa ookhwa. Woottha woomallihellanngu oneerokhwaranya wowaambeella wulle.”

⁶⁵ Pilato ahaalleella wi, “Akuseni oowehera. Khaweni, mwawehere nihamenno moollikana ni mmo munadduwellelleenyu.”

⁶⁶ Sika yaayo yaayaawo yallipiha owalla nihamenno, ehiyavo echizindikiro vanllukunimvo. Yeerille ddiiddo yahaahiyavo oowehera.