Mateyu 26 - Mawu a Mulluku

Opangana dda omwiipha Yesu

¹ Yesu amallihalle ohuddiha, aallota wa oohudderaaye wi,

² “Munnadduwella wi vavira mallapo meelli, vineerokhalla Paska. Vano mi, Mwaana a Muthu, kineerovelleelliwa wi katthomeyiwe vamutandani.”

³ Vano allupa mukutho uullupalli ni attekweene yaatthukumana mu enyumba yoomwene ya Kayafa, mullupa mukutho muullupalli.

⁴ Yahiiwanana wi emmake Yesu ni omwiipha moowiipittheya.

⁵ Yaallota wi, “Niheere ella enthawi ya machellello wi vihikhalle mapokoso.”

Yesu anazoziwa ni makhura o Betaniya

⁶ Yesu aari o Betaniya mpa mwa Simoni, muthu amakatoolle.

⁷ Yesu achaka, mutthiyana mmodda aawa wa olliyooyo ni makhura a nthuko naphaama oowallamella mutengo mu yookusella nave aamiminella vamuruni vaye.

⁸ Vano oohudderaaye yoonilliiwa nndda yaasha murima, ekohana wi, “Anoonongella tini mwawi ddiidda?

⁹ Makhura yaalla yaaweerokullihiwa voowallamella mutengo ni waavaha athu oohoowa makobiraayo.”

¹⁰ Vano Yesu ahiiwa yalloteeweeyo nave ahaakoha wi, “Munamuhoosella tini mutthiyanoolla? Vawi ookeerella ello yaphaama.

¹¹ Vawi munnakhalla ni athu oohoowa mallapo mattheene koma khamukhalla ni miyaano mallapo mattheene.

¹² Mutthiyana yoolla ookimiminella makhura vamwiillini vaka okikhozera dda ovitthiwa waka.

¹³ Ddawoona, kinimuulleellani wi orive weko mu ellapo yavatthi ettheene onaallalleyiwelle othenga waphaamoolla, athu eneerollota yeella enreeye wi emuupuwelleke.”

Yudasi anaakhullella omvelleella Yesu

¹⁴ Vatulli viwa mmodda a oohuddera khumi ni eellaalle, nnddina naye Yudasi Isikariyoti, aaya wa allupa mukutho uullupalli.

¹⁵ Ahaakoha wi, “Munaakivahe tini miyaano kamuvelleella Yesooyo wa nyuwaano?” Alliwaayo yaheerenga makobiri 30 emuvaha olliyooyo.

¹⁶ Waambeella enthawi yeeyo Yudasi ahaashaasha mpata woomuvelleellella Yesu.

Yesu ni oohudderaaye enacha yoocha ya Paska

¹⁷ Vano va nllapo nawaamba na Ehakallallo ya Buledi Oohikhalla ni Yisiti oohudderaayo yaawa wa Yesu emukoha wi, “Munapaalla nuukhozereni wuuwi nipuro nawi mwachellevo yoocha ya Paska?”

¹⁸ Olliye ahaalleella wi, “Khaweni wa muthu mmodda m'muzindanimmo, mwamulleelle wi, ‘Ahuddihi enallota wi enthawaaka yohaatamella, kinaachelle owaninyu yoocha ya Paska ni oohudderaaka.’ ”

¹⁹ Oohudderaalle yaheera nnddo yaalamulelliwiiwa ni Yesu, sika yaakhoza yoocha ya Paska.

²⁰ Nave voophiyani misikuwa Yesu ni oohuddera khumi ni eellaalle yaakeraatthi wi eche.

²¹ Vano echaka Yesu aallota wi, “Ddawoona, kinimuulleellani wi mmodda a nyuwaano aneerokivelleella wa adanaaka.”

²² Oohudderaalle yahaapheella muru wunchichi yaamba mmoddammodda ollota “Ddawoona, Apwiya, khamunakaaka miyaano!”

²³ Yesu ahaakhulla wi, “Yooyo amurenre buledi mu embale nimodda ni miyaano, sika anaakivelleelle.

²⁴ Mi, Mwaana a Muthu, kineerokhwa moollikana ni ddoolembiwa mu mawu a Mulluku koma ootulli tti muthu oyo anaakivelleelle miyaano! Waaweerokhalla phaama wa muthu yooyo ahiyariweke!”

²⁵ Nave Yudasi, oomuvelleella, aallota wi, “Ddawoona, Ahuddihi, khamunakaaka miyaano!” Yesu aamwaakhulla wi, “Ee tti weyaano.”

Mugonelo wa Apwiya

²⁶ Yesu ni oohudderaaye yachiiwa Yesu aamukusa buledi avekella omuthokoza Mulluku. Vano aamumeyameya buledooyo aavaha oohudderaaye, allota wi, “Kusani, chani, olla sika mwiillaaka.”

²⁷ Nave aamukusa kapu, avekella omuthokoza Mulluku nave ahaavaha alliwaayo. Aallota wi, “Muwiryeni vinyo yoolla attheenenyu.

²⁸ Vawi nna tti nikhame naka noollipiha echipangano ya Mulluku, nookhumihiwa ekaamba ya athu anchichi wi machimo ekhululukelliwe.

²⁹ Kinimuulleellani wi ngiwa kimuwiryattho vinyo ophiyera nllapo nenno kineereemi kimuwiryettho vinyo musha ni nyuwaano mu omwene wa Attiitthaaka.”

³⁰ Yahiipa nchipo nave yaakhuma eya o mwaango wa Olivi.

Yesu aavallallella ollota wi Petro aneeromuruna

³¹ Vano Yesu aallota wi, “Nyu attheene muneerothawa okihiya meekhaaka mahiiyu yaalla vawi woolembiwa wi, ‘Mukakathe mbusa nave enkhosa dda mulloko ddineeropallalleya.’

³² Koma kavenyihiwa wa ookhwa kineerohoolla oya o Galileya.”

³³ Petro aallota wi, “Naari amodda yuuhiyeni, miyaano nguuhiyani.”

³⁴ Yesu aallota wa Petro wi, “Kinimuulleella ddawoona wi mahiiyu yaalla mutthupi ohininlle, onaakhalle okikhootille oraru.”

³⁵ Petro ahaakhulla wi, “Naari ori woophwanella miyaano okhwa ni nyuwaano, nguukhootani.” Nave oohuddera attheenaayo yaallota ello emoddamoddave yeella.

Yesu aavekella mu Getsemani

³⁶ Vano Yesu aaya ni oohudderaaye o nipuro nooromolliwa Getsemani, aallota wa oohudderaaye wi, “Khallani vaava, kinaya wulle wi kavekelle.”

³⁷ Aamukusa Petro ni anamwani eellaalle a Zebedayo. Ahaamba okhupanya ni ohoowa m'murimani.

³⁸ Nave aallota wi, “M'murimani mwaka mooddalla ethakaraka ddinchichi ddookhwana. Hallani vaava nave muhikoneke kinayeemi wi kavekelle.”

³⁹ Nave aaya vahoollo vang'ono akokhora oweha vatthi nave avekella wi, “Attiitthaaka, wakhalla wooworeya, mukivenyiherevo kapu a ddookatamihoolla! Ohiri opaalla waka koma opaalla wanyu weereye.”

⁴⁰ Vano aahokollweella wa oohuddera ararwaalle, aaphwanya ekonaka. Vano aallota wa Petro wi, “Nyu attheene khamwaawonre okhalla oohikona naari wa enthawi yooyeva?

⁴¹ Muhikoneke, muvekelleke wi muheesiwe. Murimaanyu onnapaalla weera ddaphaama koma mwiillaanyu tti woofooka.”

⁴² Wiillittho waneepiilli Yesu aaya avekella wi, “Attiitthaaka kapu a ddoohoosoolla aahivenyihiwa ophiyera kimuwinrye, opaalla wanyu weeriwe.”

⁴³ Awiilleeye ahaaphwanya oohudderaalle ekonakattho vawi yaatopa.

⁴⁴ Nave ahaahiya wiillittho avekella enthawi yaneeraru, allotaka mawu mamoddamoddave yaalle.

⁴⁵ Vatulli viwa Yesu aahokollweella wa oohudderaaye allota wi, “Munimakona ni wiithuuwa? Enthawi yookwakhwana yawi mi, Mwaana a Muthu, kivelleelliwe wa athu oochimwa.

⁴⁶ Venyani, hankoni niroweke. Ngoonani, ookivelleella ari vaava.”

Omakiwa wa Yesu

⁴⁷ Yesu allotaka ddiiddo, Yudasi, mmodda a khumi ni eelli a oohudderaalle aaphiya ni mulloko muullupalli wa athu ekusalle masupada ni ekoonda erumiwe ni allupa mukutho uullupalli ni attekweene a Ayuda.*

⁴⁸ Vano oomuvelleellooyo ahaavaha echizindikiro wi, “Oyo kinaamukhupaarelleemi tti yooyo, mummake.”

⁴⁹ Vano Yudasi aawa moomookollella Yesu allota wi, “Mooni, Ahuddihi.” Eerille ddiiddo aamukhupaarella.

⁵⁰ Yesu ahaakhulla wi, “Mukhwaaka, erathi nnddo oweelleewe!” Vano yaawa emuphara Yesu emmaka moollipiha.

⁵¹ Nave mmodda a yaayo aari ni Yesu aahullulla nsupada amuphadda naaru kaporo a mullupa mukutho muullupalli.

⁵² Yesooyo aamulleella wi, “Hokollosella nsupada nawo mu nigonelo mwiwa vawi attheene oophara nsupada eneerewiiphiwattho ni nsupada.

⁵³ Ethiyo onaganiza wi ngaawore waaveka Attiitthaaka wi enthawi yeeyo ekirumihelle milloko dduullupalli dda akhoto dda angelo ddookhwaranya khumi ni meelli?

⁵⁴ Koma keera ddiiddo, mawu a Mulluku enaakwakhwanihiwe mwawiidde vawi ella sika enaphwanella wi yeereye?”

⁵⁵ Enthawi yeeyo Yesu aallota wa mullokoolle wi, “Muphiyalle ni masupada ni ekoonda wi mukimake, ethiyo miyaano tti echigawenga? Nllapo ni nllapo kaanakhalla mu enyumba ya Mulluku kihuddihaka koma khamwaakimakille.

⁵⁶ Koma ddittheddenenndda ddoheereya wi yaalembille anamallotella, ddikwakhwanelle.” Vano oohuddera attheene yaamuhiya ethawa.

Yesu vanthatoni na attekweene a millatu a Ayuda

⁵⁷ Vano ayo yammakille Yeswaayo yaamukusella wa Kayafa, mullupa mukutho muullupalli, nko yatthukumanne ahuddihi a malamulo* ni attekweene a Ayuda.

⁵⁸ Nave Petro aamuthwara moomurekamella, ophiyera vanthatoni na mullupa mukutho muullupalli. Aavollowamo akeraatthi ni akhoto oowehera wi oone mamallihellwiiwa.

⁵⁹ Nave allupa mukutho uullupalli ni attekweene a millatu attheene yahaashaasha omboni wawoottha woomuvaanyiha Yesu wi emwiiphe.

⁶⁰ Koma kheyaaphwanyille naari athu anchichi yawiille ellota ddawoottha dda olliye. Voomallihellani athu eelli yahiimella.

⁶¹ Nave yaallota wi, “Muthu yoolla aallota wi, ‘Miyaano kineerowora okumulla enyumba ya Mulluku ni oyimakattho m'mallaponi mararu.’ ”

⁶² Nave mullupa mukutho muullupalli ahiimella allota wi, “Khonaakhulla nnddo athwaalla enallotiiwa dda wuuvaanyiha weyaano?”

⁶³ Koma Yesu aakhalla llakallaka. Vano mullupa mukutho muullupalli aallotattho wi, “Vamiitthoni va Mulluku Ookumi kinimuullupelliha weyaano wi onilleelle weyaano waari Mesiya,* Mwaana a Mulluku.”

⁶⁴ Yesu ahaakhulla wi, “Mullotillethi nyookha. Koma kinimuulleellani attheene wi waambeella vaavo muneerokoona mi, Mwaana a Muthu, kikeraatthille o nnattanatta na Mulluku Amasiva Mattheene nave kiwaaka vamiraponi ddooddullu.”

⁶⁵ Vano mullupa mukutho muullupalli ahaahulla mukanjwaaye allota wi, “Anamullotella epewe Mulluku. Ninaapaallellatittho amboni amodda? Mohiiwa vano epeweeyo?

⁶⁶ Maganizwaanyu tti awi tini?” Yahaakhulla wi, “Anaphwanella wi iiphiwe.”

⁶⁷ Vano yaamuttaphera mare owiitthoni waye ni omuukutha. Nave amodda yamoopille makofi

⁶⁸ yaallota wi, “We Mesiya noonihelle hiyaano waari namallotella, awuukuthalle ttaani?”

Petro anamuruna Yesu

⁶⁹ Petro akeraatthille vaatte vanthatoni namillatu, namwalli mmodda, mullupa mutteko a mullupa mukutho muullupalli, aawa wa yooyo allota wi, “Wettho waari nimodda ni Yesu oovenyera o Galileya.”

⁷⁰ Nave aaruna vamiitthoni va attheene, allota wi, “Nginadduwella eyo onalloteewe.”

⁷¹ Nave akhumeeye oya omullakoni, mullupa mutteko mmodda aamutthiyana aamoona allota wa athu yaari vaavo wi, “Oyottho aari nimodda ni Yesu oovenyera o Nazareti.”

⁷² Nave wiillittho aaruna ni ollota wi, “Kinimallupella wi nginamudduwella muthu yoolle.”

⁷³ Evinre enthawi yooyeva athu ayo yiimenlle vaavo yaawa wa Petro ellota wi, “Ddawoona, weyaanottho ori mmodda a yaayo. Vawi mallotellwaawo ennuudduwanyeyiha weyaano.”

⁷⁴ Vano Petro ahaamba wiitembelela yeekhaaye ni ollupella wi, “Nginamudduwella muthu yoolle.” Vano enthawi yeeyo mutthupi wahinlla.

⁷⁵ Vano Petro ahuupuwella nnddo Yesu aamulleelleeye wi, “Mutthupi ohininlle onaakhalle okikhootille oraru.” Vano aakhuma vaatte, inlla moomoriwa ethakaraka.