Mateyu 25 - Mawu a Mulluku

Niphwanaphwaniho na anamwalli khumi

¹ “Va enthawi yeeyo omwene wa Mulluku onaakhalle wonanko ddiidda: Waakhalla anamwalli khumi ayo yakusalle enyali ddiwa dda makhura eya wookumana ni ootthella.

² Atthanu a yaayo yaari ookarangeya nave atthanu a yaayo yaari eezeru.

³ Ookarangeyaayo yaakusa enyali ddiwa koma kheyaakusalle makhura amodda awaanjerera.

⁴ Koma a ezerwaalle yaakusa makhura mamodda awaanjerera mookusella mwiwa.

⁵ Vano ootthelloolle aselliweeye anamwalli attheene yaaphariwa ni ekhove sika yaakona.

⁶ “Variyari va mahiiyu wahiiweya okhuwa wi, ‘Otthella oophiya! Khumani mwakumanena!’

⁷ Vano anamwalli attheenaalle yaavenya epotokosa enyali ddiwanndde.

⁸ Ookarangeyaalle yahaalleella a ezerwaalle wi, ‘Nivaheni makhuraanyu mamodda kaambiiwa enyali ddahu ddinimathiima.’

⁹ Koma a ezerwaalle yahaakhulla wi, ‘Iyaayi, khanikwakhwanella nyuwaano ni hiyaano. Yaani wa ookulliha malonda wi mwiikullelle weekhiinyu.’

¹⁰ Sika ookarangeyaalle yaaya wookulla makhura mamodda nave eviralle, ootthella aaphiya. Atthanu eezeru yaakhozekillaalle yaavollowa ni olliye mu machellello a okwati. Nave nchiwi naawalliwa ookarangeyaalle ehinahokollowe.

¹¹ “Vatulli viwa yaahokollowa ookarangeyaalle. Yaakhuwa wi, ‘Apwiya, Apwiya, nihullelleni!’

¹² Koma ootthelloolle ahaakhulla wi, ‘Ddawoona, kinimuulleellani wi, nginuudduwellani.’

¹³ “Sika, chenjerani vawi khamunadduwella nllapo nene apaalle enthaweene.”

Niphwanaphwaniho na allupa mutteko araru

¹⁴ “Va enthawi yeeyo omwene wa Mulluku onaakhalle wawi ddiidda: Waakhalla muthu mmodda aahanlle vang'ono otimulla va olendo. Aawiithana allupa muttekwaaye aahiyera eyuumaaye wi ewehereke.

¹⁵ Aamuvaha arive muthu moollikana ni ezeru ddaye. Mmodda aamuvaha makobiri matthanu ni mmodda meelli ni mmoddattho nimodda. Vano aatimulla va olendwaaye.

¹⁶ Mullupa mutteko aakhenlle makobiri matthanoolle aaya eetellana malonda, aapindulavo makobiri matthanu mamodda.

¹⁷ Emoddamoddavettho mullupa mutteko aakhenlle meelli, aapindulavo makobiri mamodda meelli.

¹⁸ Koma mullupa mutteko aakhenlle nimoddoolle aaya akata nlliti vatthi, avittha nikobiri na apwinnyaanne.

¹⁹ “Villekenlle wunchichi, apwiya a allupa muttekwaalle yaawaawo. Nave yaawiithana allupa muttekwaalle wi emutakhelle mmo yapharihelliiwa mutteko eyuumeelle.

²⁰ Mullupa mutteko aakhenlle makobiri matthanoolle aawaanattho makobiri matthanu mamodda allota wi, ‘Apwiya, mwaakivaha makobiri matthanu. Ngoonani, koopindulavo makobiri matthanu mamodda.’

²¹ Apwinnyaalle yaallota wi, ‘Woheera phaama, we mullupa mutteko aphaama ni oororomelleya. Waaroromelleya va ddeko dding'onong'ono, sika kineerewuutthoolla wi owehereke ddeko ddaka ddittheddene. Waawo ohakallalle ni miyaano, apwiiyo!’

²² “Vano mullupa mutteko aakhenlle makobiri meelli aawa allota wi, ‘Apwiya, mwaakivaha makobiri meelli. Ngoonani, koopindulavo mamodda meelli.’

²³ Apwinnyaalle yaallota wi, ‘Woheera phaama, we mullupa mutteko aphaama ni oororomelleya, vawi waaroromelleya va ddeko dding'onong'ono, sika kineerewuutthoolla wi owehereke ddeko ddaka ddittheddene. Waawo ohakallalle ni miyaano, apwiiyo!’

²⁴ “Vano mullupa mutteko aakhenlle nikobiri nimodda, aawa allota wi, ‘Apwiya, kahuudduwellani wi nyuwaano tti muthu awumma murima, oohata mvo muhaallilleenyuvo ni ootthukumaniha mvo muhimiddalleenyuvo.

²⁵ Kaamoova, sika kaaya kaavittha vatthi nikobiri nanyu. Ngoonani, nna sika nikobiri nanyunne.’

²⁶ “Apwinnyaalle yaamulleella wi, ‘We, mullupa mutteko oonanara ni oolesi. Waadduwella wi kinnahata mvo kihanlleemi navettho kinnatthukumaniha mvo kihimiddalleemi?

²⁷ Waaphwanenlle ovelleella makobiraakaayo wa oopolleyiha makobiri nave miyaano voohokollowani kaaweerewaakhella mattheene ni yoopinduleene.

²⁸ Vano mwaakheni nikobirinno nave mumuvahe mullupa mutteko oyo arina makobiri khumi.

²⁹ Vawi arive muthu arina ello aneerewaanjereriwa ddimodda nave aneerokhalla ni ddawaata. Koma muthu oyo ahinna ello naari eng'onong'ono ariiyeneeyo aneerewaakhiwa.

³⁰ Vano mullupa mutteko oohikhalla ni mphuroolla, mvokheni mu epiphi ya vaatte. Wenko aneerekewinlla ni okhuuriha miino.’

Echiweruzo yoomallihella

³¹ “Mi, Mwaana a Muthu, kaawaka mu ntitimiho naka wonanko mwene ni angelo attheene, kineerokeraatthi vampandonaaka wantitimiho.

³² Nave athu a mitundu ddittheddene eneerotthukumanihiwa vamiitthoni vaka. Vano kineerewaahiyaniha mmodda ni mukhwaaye wonanko mmo mbusa anahiyaniheeye enkhosa ni epuri.

³³ Kineerewaahiya athu aweera echilungamo o nnattanatta koma amodda o nnatta noonyottho.

³⁴ Vano miyaano, mwene, kineerollota wa ayo a o nnattanatta wi, ‘Waani wuno nyu athu oodalisiwa ni Attiitthaaka! Waani mwaakhelle omwene oyo mwaakhozelliweenyu waambeella voophatuwani va ellapo yavatthi.

³⁵ Vawi kaavolliwa ettalla nave mwaakichiha, kaavolliwa nthona nave mwaakivaha yoowirya, kaari mulleto nave mwaakaakhella m'mawaninyu.

³⁶ Ngaari ni yoowara koma mwaakiwariha, kaavoriiwa koma mwaakikavihera, kaari mundende koma mwaawa mwaarera ni miyaano.’

³⁷ “Athu aweera echilungamo eneeromwaakhulla wi, ‘Apwiya, nawonneni niini nyuwaano muvolliwalle ettalla nuuchihani apaalle muvolliwe nthona nuuvahani yoowirya?

³⁸ Nawonneni niini nyuwaano muri mulleto niwaakhellani m'mawanihu apaalle muhiri ni yoowara nuuwarihani?

³⁹ Nawonneni niini muvoriiwaka apaalle muri mundende niwa naarera ni nyuwaano?’

⁴⁰ “Mi, mwene, kineerewaakhulla wi, ‘Ddawoona, kinimuulleellani wi kaambiiwa mwaamweerella mmodda a aakhwaaka naari ang'onong'onwaalla, mwaakeerella yeeyo miyaano.’

⁴¹ “Vano miyaano kineerollota wa ayo a o nnatta noonyottho wi, ‘Venyanivoni va miyaano, nyu ootembeleliwa ni Mulluku! Khaweni o omunlloni woohimalla oyo okharihelliwe Satana ni angelwaaye.

⁴² Vawi kaavolliwa ettalla koma khamwaakichihalle, kaavolliwa nthona koma khamwaakivahille yoowirya.

⁴³ Kaari mulleto koma khamwaakaakhenlle m'mawaninyu, ngaari ni yoowara koma khamwaakiwarihalle, kaavoriiwa ni okhalla mundende koma khamwaawiille mwaarera ni miyaano.’

⁴⁴ Vano eneeromwaakhulla wi, ‘Apwiya, nawonneni niini nyuwaano muvolliwe ettalla apaalle muvolliwe nthona apaalle muri mulleto apaalle muhiri ni yoowara apaalle muri oovoriiwa apaalle muri mundende, hiyaano nihuurumeyellani?’

⁴⁵ Miyaano kineerewaakhulla wi, ‘Ddawoona, kinimuulleellani wi ekaamba yawi mwaakhoota omurumeyella mmodda a ang'onong'onwaalla mwaakhoota okirumeyella miyaano.’

⁴⁶ Vano yaalla eneeroya woollakiwa woohimalla koma aweera echilungamo eneeroya wuukumini woohimalla.”