Mateyu 24 - Mawu a Mulluku

Dda okumulliwa wa enyumba ya Mulluku

¹ Yesu aakhumamo mu enyumba ya Mulluku, vano aroweeye oohudderaaye yaawa emutthoonyihera enyumba ya Mullukweeyo.

² Nave Yesu aallota wi, “Munnoona ddittheddenenndda? Ddawoona, kinimuulleellani wi, vaava khavikhalla nlluku naari nimodda va nikhwaaye nihinaakumulliwe.”

Ddookatamiha ni ddoohoosa

³ Vano Yesu akeraatthille va mwaango wa Olivi, oohudderaaye yaawa mwa weekhiiwa. Yaamukoha wi, “Nilleelleni ddittheddene ddenndda ddineereye niini? Nave echizindikiro ya enthawi ya owa wanyu waneepiilli ni omalla wa ellapo yavattheella enaakhalle yawiidde?”

⁴ Yesu ahaakhulla wi, “Chenjerani wi muthu ahiwoottottheni.

⁵ Vawi athu anchichi eneerophiya mu nnddina naka ni ollota wi, ‘Mi tti Mesiya,’* nave eneerowoottottha athu anchichi.

⁶ Nyuwaano muneerewiiwa dda ekhoto ni epilli ya ekhoto. Muhinahoowa m'murimani mwanyu vawi tti ddoophwanella wi ddeereye koma emallihello khenaphiye.

⁷ Mutundu ni mutundu mmodda oneerekowana navettho omwene ni omwene omodda oneerekowana. Navettho oneerokhalla ettalla ni echivomerezi virive veko.

⁸ Ddeko ddittheddenenndda ddinaakhalle wonanko ddoovoreya ddawaamba mwaana aayariwaka.

⁹ “Vano muneeromakiwa ni okuselliwa woollakiwa ni wiiphiwa. Athu attheene eneerowiitani kaambiiwa nyuwaano tti oohudderaaka.

¹⁰ Nave vano anchichi eneerohiya echikhulupililwiiwa, eneeromakihana ni wiitana.

¹¹ Vano anamallotella anchichi awoottha eneerewooneya ni owoottottha athu anchichi.

¹² Kaambiiwa ddoonanara ddineerewaatesa, echikondi ya athu anchichi eneeromalla.

¹³ Koma oyo anaavillelle ophiya o mamallihello, aneerovulluwa.

¹⁴ Vano othenga waphaamoolla wa omwene wa Mulluku oneerollalleyiwa va ellapo ettheene yavatthimva wi ekhalle omboni wa athu attheene; nave vaavo eneerophiya mamallihello.

Yoonanara Yawoononga

¹⁵ “Vano muneerewoona ‘Yoonanara Yawoononga’ elle yaallotiwe ni Daniele namallotella yiimenlle mu nipuro noopatuleya.” (Oyo aneerenga mawaalla iiwesese ottaphullella wiwa.)

¹⁶ Vano ayo eri o Yudeya ethawelle omiyaangoni.

¹⁷ Oyo ari vaatte ahiselliwe ni ovollowa mpa wi akuse ddeko ddaye.

¹⁸ Oyo ari m'matani ahihokollweelle owaniwa wi akuse yawiikhuneella.

¹⁹ Enthawi yeeyo ootulli enaakhalle atthiyana ayo enaakhalle ni erukullu vamodda ni awaamwiha anamwani.

²⁰ Vekellani wa Mulluku wi othawa wanyu ohikhalle mu eyitta apaalle va nllapo na Sabata!

²¹ Kaambiiwa, ddoohoosa ddinaawe mallapo yaayo, ddinaakhalle ddawi khaddineereyeke ovenyera va ophatuwa wa ellapo ophiyera ollello nave khaddiwa ddeereyattho ddoophwanaphwana ni ddenndda.

²² Nave Mulluku ahaayevihalleke mallapwaayo, khaavo naari muthu mmodda aavulluwe. Koma ekaamba ya athwaaye ootthoolliwa, Mulluku aneerewayeviha mallapwaayo.

²³ “Vano muthu allota wa nyuwaano wi, ‘Mesiya ari wuno’ apaalle wi, ‘Ari nko,’ muhikhulupilile.

²⁴ Vawi amesiya awoottha ni anamallotella awoottha eneerewooneya. Eneereweera ezizindikiro dduullupalli ni ddoottikhiniha wi wakhalla wooworeya yaahollose naari athu ootthoolliwa a Mulluku.

²⁵ Ngiiwani! Kohuulleellani enthawi ehinaphiye.

²⁶ “Apaalle athu yuulleellani wi, ‘Olliye ari muchipululuni muhiyeewo,’ apaalle yaallota wi, ‘Ngoonani, iipitthalle mva,’ muhikhulupilile.

²⁷ Vawi mi, Mwaana a Muthu, kineeroowa wonanko ettari enasherima muddullu ovenyera wookhuma nndduwa ophiyera woovollowa nndduwa.

²⁸ “Sika ddeko ddenndda ddinnooniha wi omalla wa ellapo yavatthi wohaatamella wonanko otthukumana wa ephangwi onoonihelliiwa wi wenko wookhalla enama yookhwa.

Owa wa Mwaana a Muthu

²⁹ “Enthawi yeeyo ddamalla ddoohoosa dda mallapo yaayo, nndduwa nineerothiima nave mweeri khowala, etheneeri ddineeromora ovenyera oddullu nave masiva a muddullu eneerotikhiwa.

³⁰ Vano vaavo echizindikiro ya mi, Mwaana a Muthu, eneerewooneya muddullu. Navettho malloko mattheene a athu a va ellapo yavatthimva eneerekewinlla yaakoonaka mi Mwaana a Muthu kiwaaka vamiraponi ddooddullu ni masiva ni ntitimiho nuullupalli.

³¹ Nave kineerewaarumiha angelwaaka ni nipallapata nuullupalli omapuroni mattheene masese a ellapo yavatthi. Nave angelwaalla eneerewaatthukumaniha ootthoolliwaaka ovenyera o mamallihello a ellapo yavatthi ophiya o mamallihellwaaye mamodda.

Nihuddero na muteekho wanamukuyu

³² “Muteekho wanamukuyu wuuhuddiheni ello. Enthambi ddaye ddaamba ophuwa makukhu, munnadduwella wi ellimwe yohaatamella.

³³ Emoddamoddave yeeyo nyuwaano mwawa moona ddenndda dduwellani wi enthawi yoohaatamella, okhozekella wohaambeya.

³⁴ Ddawoona, kinimuulleellani wi ddeko ddenndda ddineereweereya athu a mbadoolla amodda ehinakhwe.

³⁵ Oddullu ni ellapo yavatthi ddineeromalla koma mawaaka khemalla.

Khaavo anadduwella dda nllapo ni enthawi

³⁶ “Khaavo anadduwella nllapo ni enthawi ya owa wa miyaano Mwaana a Muthu naari angelo naari mwaneenaka, koma Attiitthaakave sika enadduwella.

³⁷ Owa wa miyaano, Mwaana a Muthu, onaakhalle wonanko mmo ddeko ddakhallelliiwa m'mallaponi a Nowa.

³⁸ Vawi m'mallaponi yaalle, ehinasefukelle maaddi, athu yaamoona ocha ni owirya, yaatthella ni otthelliwa, ophiyera nllapo nenno Nowa avollowilleeye mukallawani.

³⁹ Kheyaadduwenlle ello ophiyera maaddi yaasefukella ni waakusa attheene. Owa wa miyaano, Mwaana a Muthu, onaakhalle wawi ddiidda.

⁴⁰ Vano allopwana eelli enaallimeke m'matani, mmodda aneerokusiwamo oya mu omwene wa Mulluku nave mmoddooyo aneerohiyiwa.

⁴¹ Atthiyana eelli eneerokosilla vansilloni, mmodda aneerokusiwa, mmoddooyo aneerohiyiwa vaavo.

⁴² “Sika weherakani kaambiiwa khamunadduwella nllapo niwa noophiya Apwiinyu.

⁴³ Mwaneena a enyumba adduwenlleke enthawi yooweella mullupaawiiya, aawerekowehera wi mullupaawiiyooyo ahivollowe mu enyumbeeyo.

⁴⁴ Sika vano nyuwaano munaphwanella mukhozekettho kaambiiwa va enthawi eyo muhinadduwelleenyu mi, Mwaana a Muthu kineeroowa.”

Dda mullupa mutteko oororomelleya ni mmodda oohiroromelleya

⁴⁵ “Ttaani ari mullupa mutteko oororomelleya ni eezeru? Tti oyo apwinnya enaamutthoolliiwa wi aawehereke allupa mutteko attheene a mpa mwaye ni waavaha ddoocha va enthawi yaphaama.

⁴⁶ Oodalisiwa tti mullupa mutteko oyo apwinnya yaawaaka enaamuphwanyiiwa eeraka ddawi ddiidda.

⁴⁷ Ddawoona, kinimuulleellani wi aneeromweera mullupa mutteko yooyo wi awehereke ddeko ddaye ddittheddene.

⁴⁸ Koma mullupa muttekoolle akhalla oonanara, aneerollota m'murimani mwaye wi apwinnya emmaselliwa.

⁴⁹ Nave aneerewaamba owuukutha allupa mutteko akhwaaye, ocha ni owirya ni athu oolezela.

⁵⁰ Vano apwinnya a mullupa muttekoolle eneerophiya va nllapo nno ahinamutiyereeye ni va enthawi eyo ahinadduwelleeye.

⁵¹ Apwinnyaalle eneeromuphaddaphadda nave eneeromullaka wonanko athu awoottha. Eneerekewinlla ni okhuuriha miino.