Mateyu 23 - Mawu a Mulluku

Yesu anaachenjeza dda ahuddihi a malamulo ni Afarisi

¹ Vatulli viwa Yesu aallota wa athwaalle ni wa oohudderaaye

² wi, “Ahuddihi a malamulo* ni Afarisi* aakhalla ni olamulello woottaphullella malamulo a Mose.

³ Sika mwiiwellelleke nave muthware erive ello enuulleelleewani wi mweere. Koma muhittakihereke mitteko ddiwa vawi kheneera enallalleyiiwa.

⁴ Enaawatihera athu wiiwellella malamulo ookatamiha ayo enakhalla wonanko ddeko ddoollemella ni ddookatamiha otukhulla. Koma alliwa khenapaalla naari wookolla eyaalliiwa wi yaakavihere otukhullanko.

⁵ Enneera erive ello wi athu ewoone. Ennaddimakellella vayuuchini ni vamuwononi mahutta anttapara uullupalli a mawu a Mulluku. Nave ennarekamihattho manyenje a malayiiwa.

⁶ Ennakonda mapuro oolemu vamachellelloni ni mipando ddoolemu mu enyumba ddamavekello.*

⁷ Navettho ennakonda ovahiwa mooni moolemu m'misikani ni wi eromolliweke ‘Ahuddihi.’

⁸ Nyuwaano muhiromolliweke wi ‘Ahuddihi’ kaambiiwa muri ni ahuddihi amoddave nave nyuwaano attheene tti musinne ni murokoriye.

⁹ Nyuwaano muhimuromolleke arive muthu vatthimva wi ‘Attiitthaanyu’ kaambiiwa muri ni Attiitthaanyu amoddave ooddullu.

¹⁰ Muhiromolliwekettho wi ‘Oohoollella’ kaambiiwa muri ni oohoollella mmoddave Mesiyoolle.

¹¹ Muullupalli ookhwaranya nyuwaano anaphwanella akhalle oorumeyella attheenenyu.

¹² Koma anaddinnuwiha yeekhaaye aneeroyevihiwa nave aniiyeviha yeekhaaye aneerewuunnuwihiwa.

Yesu anaahumullulla ahuddihi a malamulo ni Afarisi

¹³ “Nyu, awoottha, ahuddihi a malamulo ni Afarisi, mookhalla ni otulli! Munnawalla nchiwi na omwene wa Mulluku wi athu ehivollowemo. Nyuwaano khamunavollowamo nave munnahiiha ayo enapaalla ovollowa!”

¹⁵ “Mookhalla ni otulli ahuddihi a malamulo ni Afarisi, awoottha nyu! Munneeteeta virive veko omwaashaasha muthu oyo ahiri Muyuda wi athwareke echikhulupililwaanyu. Athwara echikhulupililwaanyu munnamweeriha yooyo wi allakiwe o gehena ohiyana ni nyuwaano wiilli.

¹⁶ “Nyu oohoollella oohoona, mookhalla ni otulli! Nyuwaano munnahuddiha wi, ‘Muthu allupella oromolla enyumba ya Mulluku, khaddinna mutteko. Koma allupella omuromolla golide a mu enyumba ya Mulluku ari oomakiwa ni nllupello nayenno.’

¹⁷ Nyu athu ookarangeya ni oohoona! Ttiivi eri yoopaalleya okhwaranya ekhwiiwa, golide apaalle enyumba ya Mulluku eyo enamweelliha golidooyo?

¹⁸ Munnahuddihattho wi, ‘Oyo anallupella oromolla nikuwa na mukutho, khaddinna mutteko. Koma allupella oromolla emphaso ya vanikuwani na mukutho ari oomakiwa ni nllupello nayenno.’

¹⁹ Nyu athu oohoona! Ttiivi eri yoopaalleya okhwaranya ekhwiiwa, emphaso apaalle nikuwa na mukutho mvo vineelliha emphasweeyo?

²⁰ Sika vano muthu allupella oromolla nikuwa na mukutho, anallupella va yeeyo ni emphaso ddittheddene ddiri vaavo.

²¹ Nave allupella oromolla enyumba ya Mulluku anallupella va yeeyo ni va Mulluku oyo anakhalla mwemmo.

²² Nave muthu allupella oromolla oddullu anallupella dda mpando woomwene wa Mulluku navettho va oyo anakhalla vaavo.

²³ “Nyu, awoottha, ahuddihi a malamulo ni Afarisi, mookhalla ni otulli! Munnavelleella dda khumi dda ddoomella dding'onong'ono ddooddiviha yoocha. Koma munahiya wiiwellella mahuddero oopaalleya a malamulo amoddaalla, weeruza mwa echilungamo, weerella echifundo ni okhalla moororomelleya. Munaphwanella wi mweereke ddenndda oohihiya ddimoddannddo.

²⁴ Nyu oohoollella oohoona! Munnatthoolla engwillihi mu yoowiryaanyu koma munnamirya ekamira!* Nndda ddinattaphullella wi muniiwellella malamulo oohipaalleya koma malamulo oopaalleya khamunawiiwellella.

²⁵ “Nyu, awoottha, ahuddihi a malamulo ni Afarisi, mookhalla ni otulli! Munnahuwa otte wa kapu ni embale koma muwari mwiwa tti mooddalla ni dda nrima ni dda wiikonda.

²⁶ Mufarisi oohoona we! Waambe ohuwa muwari mwa kapu navettho otte onawa okhalle waweella.

²⁷ Nyu, awoottha, ahuddihi a malamulo ni Afarisi, mookhalla ni otulli! Muri wonanko mahame oohelliwa enjeresa ddaweella ayo enooneya aweella otte wiwa koma muwari muri mooddalla ni makhuva a mitembo ni ddeko ddimodda ddawunta.

²⁸ Emoddamoddave yeeyo nyuwaano munooneya wonanko athu aweera echilungamo vamiitthoni va athu koma muwari mooddalla ni woottha ni ddoonanara.

Yesu anallotella dda ollakiwa wiwa muhoollo

²⁹ “Nyu, awoottha, ahuddihi a malamulo ni Afarisi, mookhalla ni otulli! Vawi munnamaka mahame a anamallotella nave munnareeriha mahame a athu aweera dda echilungamo.

³⁰ Vano munihina, ‘Hiyaano nakhanlleke m'mallaponi a makhollwaahu khanaawiiphena anamallotella iyaayi.’

³¹ Sika tti omboni wawiivaanya yeekhiinyu voollotani wi nyuwaano tti edduullu dda ayo yawiiphalle anamallotella.

³² Sika muvirellelle weera machimo ayo yaambiwe ni makhollwaanyu.”

³³ “Nyu enowa nave anamwani a enowa! Munaathawe mwawiidde ollaka waye wa gehena?

³⁴ Ekaamba ya yeella kineerewuurumihellani anamallotella ni athu eezeru ni ahuddihi. Amodda a yaayo muneerowiipha, amodda muneerewaatthomeya vamutandani nave amodda muneerewaawashulla mu enyumba ddanyu ddamavekello ni waathamakiha ovenyera o etawoni emodda ophiya o etawoni emoddeeyo.

³⁵ Voothwarellellani, ollakiwa wa ayo yawiiphalle athu oolungama onaakhalle vamuruni va nyuwaano ovenyera va wiiphiwa wa Abele oolungama ophiyera va wiiphiwa wa Zakariya mwaana a Barakiya, oyo mwaamwiiphalleenyu variyari va nipuro naweella ni nikuwa na mukutho mu enyumba ya Mulluku.

³⁶ Ddawoona, kinimuulleellani wi ollakiwa wa athu awiiphaayo onaakhalle vamuruni va athu a mbadoolla.”

Yesu aninllella muzinda wa Yerusalemu

³⁷ “Yerusalemu, Yerusalemu! Athwaawo ennawiipha anamallotella nave ennaavokha malluku owiipha athu yarumihelliwiiwa ni Mulluku! Tti mallapo makavi kapanlleemi waakhupaarella athwaawo attheene wonanko mwanakhu anaakhupaarelleeye asaanaaye vatthi va muuphellwaaye koma nyuwaano khamwaapanlle!

³⁸ Vano muzindaanyu oneerohiyiwa moohikhalla ello.

³⁹ Kinimuulleellani wi waambeella vano ophiyera muhoollo khamuwa mukoonattho, ophiyera muneerollota wi, ‘Oodalisiwa tti oyo anawa mu nnddina na Apwiya.’ ”