Mateyu 22 - Mawu a Mulluku

Niphwanaphwaniho na machellello a okwati

¹ Yesu aallotattho wa athu m'maphwanaphwanihoni wi,

² “Omwene wa Mulluku tti wonanko niphwanaphwaniho nna. Waakhalla mwene mmodda oyo amukhozenre mwanaye aamullopwana machellello a okwati.

³ Ahaaruma allupa muttekwaaye wi yaalleelle awiithaniwa omachellelloni wi ewe koma kheyaapanlle owa.

⁴ Ahaarumattho allupa mutteko amodda ni othenga wawi, ‘Mwaalleelle awiithaniwaayo wi ddoocha ddohiithwa. Eng'ombe ni asaaniiwa ooneneva ddohiiphiwa nave ddittheddene ddohiithwa. Waani o machellello a okwati!’

⁵ Koma awiithaniwaayo kheyaapwathillewo nave yayiille omittekoni ddiwa. Mmodda ayiille omata waye, mmodda ayiille omuttekoni waye wookulliha malonda.

⁶ Amoddaalle yahaaphara allupa muttekwaalle ewuukutha nave ewiipha.

⁷ Mwenoolle aasha murima wunchichi, sika ahaaruma akhotwaaye wi yawiiphe awiiphaalle ni woosa muzindiiwa.

⁸ Eerille ddiiddo aawiithana allupa muttekwaaye niwaalleella wi, ‘Machellellwaaka a okwati vano ahiithwa koma alleto awiithaniwaayo kheyaaphwanenlle wiithaniwa.

⁹ Vano khaweni omisewuni nave mwawiithanelle omachellelloninngu athu attheene munaaphwanyeenyu.’

¹⁰ Sika allupa muttekwaalle yaaya omisewuni wulle yaatthukumaniha attheenaayo yaaphwanyilliiwa, oonanara naari aphaama vawi enyumba ya machellello yaaddalla ni awiithaniwa.

¹¹ “Mwenoolle aavollowa wi awoone awiithaniwaalle nave aamoona muthu mmodda oohiwara yoowara ya okwati.

¹² Mwenoolle aamukoha wi, ‘Mukhwaaka wavollowille mmu mwawiidde ohinna yoowara ya okwati?’ Koma muthoolle khaarina yoollota.

¹³ Vano mwenoolle ahaalleella allupa muttekwaaye wi, ‘Mumakeni yooyo matta ni meto mumuvokhelle mwiipiphini yavaatte. Wenko aneerekewinlla ni okhuuriha miino.’ ”

¹⁴ Nave Yesu aamalliha ni ollota wi, “Awiithaniwa tti anchichi koma ootthoolliwa tti vang'ono.”

Nikoho na okhoma musonkho

¹⁵ Afarisi* yaarowa yiiwanana wi emphwanyelle mullatu Yesu ni nnddo anaalloteeye.

¹⁶ Koma yaanaarumiha wa Yesu oohudderiiwa amodda ni athu a mulloko wa Herode.* Yaayo yaallota wi, “Ahuddihi, ninnadduwella wi munnallota ddawoona. Munnahuddiha ddawoona dda opaalla wa Mulluku wa athu nave muhikhupanyeke dda wi athu enuuganizerekeni tini kaambiiwa khamunawehattho ekhove.

¹⁷ Sika munilleelle hiyaano maganizwaanyu tti awi tini? Tti ddawaakhullelliwa ni malamulwaahu okhoma musonkho wa Kaisara,* o Roma apaalle khe ddiiddo?”

¹⁸ Koma Yesu aadduwella dda wiiwanana ddiwa ddoonanara nave aallota wi, “Awoottha nyu munakeesella tini?

¹⁹ Ngakooniheni nikobiri nookhomella musonkho!” Yaawaana nikobiri nimodda,

²⁰ nave ahaakoha wi, “Ekhoveella ni nnddinanna tti ddawani?”

²¹ Yahaakhulla wi, “Dda Kaisara, o Roma.” Vano Yesu aallota wi, “Ddawoona, sika velleellani wa Kaisara nnddo ddiri dda Kaisara nave velleellani wa Mulluku nnddo ddiri dda Mulluku.”

²² Yiiwalliiwa ddenndda, yaattikhina, sika yaamuhiya evenyavo.

Nikoho na ovenya wa ookhwa

²³ Nllapo nenno Asaduki* amodda ayo ehinakhulupilila wi ookhwa ttuuvenya, yaawa wa Yesu ellota wi,

²⁴ “Ahuddihi, Mose aarihina muthu akhwa ahinna anamwani mwanamunne amutthelle mutthiyana oohiyiwooyo wi amuyarelle anamwani ookhooyo.

²⁵ Vano wuno waakhalla muthu ni asinne atthanu ni mmodda, aatthella akhwa ahinna anamwani. Aamuhiya mwaariye wa mwanamunne.

²⁶ Yaheereya emoddamoddave yeeyo wa mwanamunne aneepiilli nave aneeraru ophiyera aneetthanu ni mmoddoolle.

²⁷ Voomallihellani, mutthiyanoollettho aakhwa.

²⁸ Vano va nllapo na ovenya wa ookhwa mutthiyanooyo anaakhalle mwaara awani va allopwana atthanu ni eellaayo vawi attheene yaamutthella?”

²⁹ Yesu ahaakhulla wi, “Munnalakwa kaambiiwa khamunadduwella mawu a Mulluku naari masiva a Mulluku.

³⁰ Vawi voovenyani wa ookhwa khavikhalla naari otthelliwa koma attheene enaakhalle wonanko angelo ooddullu.

³¹ Vano dda ovenya wa ookhwa, Khamweerengille yeeyo Mulluku uulleelleeyeni? Aallota wi,

³² ‘Miyaano kiri Mulluku a makhollwaanyu, Mulluku a Abrahamu, Mulluku a Isaki ni Mulluku a Yakobo.’ Olliyooyo khahiyo Mulluku a athu ookhwa koma tti a athu ookumi.”

³³ Athwaalle yiiwalliiwa ddenndda, yaattikhina ni ehuddihwaaye.

Dda lamulo nuullupalli

³⁴ Afarisi yiiwalliiwa wi Yesu ahaamaalliha Asaduki, yaamutthukumanella,

³⁵ nave mmodda a yaayo, muhuddihi a malamulo,* aamukoha Yesu wi amweese.

³⁶ Aakoha wi, “Ahuddihi, lamulo nuullupalli mwa malamulo mattheene tti niivi?”

³⁷ Yesu ahaakhulla wi, “ ‘Waakondeke Apwiya Mullukwaawo ni murimaawo muttheene ni okumaawo muttheene navettho ni maganizwaawo mattheene.’

³⁸ Nna sika lamulo nawaamba ni nuullupalli.

³⁹ Naneepiilli nuullupalli moophwanaphwana tti nna, ‘Waakondeke akhwaawo wonanko mmo oniikondelleewe weekha.’

⁴⁰ Malamulo mattheene a Mose ni ehuddiho ya anamallotella ddinavenyera va malamulo meelli yaalla.”

Nikoho na Mesiya

⁴¹ Afarisi etthukumanne, Yesu ahaakoha wi,

⁴² “Maganizwaanyu tti awi tini dda Mesiya?* Tti mwaana awani?” Yaamwaakhulla wi, “Tti Edduullu ya Davide.”

⁴³ Yesu ahaakoha wi, “Kaambiiwa tini Munepa Waweella aamuhollelleeye Davide amuromolla olliye ‘Apwiya’? Vawi Davide aallota wi,

⁴⁴ ‘Apwiya Mulluku yahaalleella apwiyaaka wi, “Khalla o nnattanatta naka ophiyera kaagonjihalle adanaawo.’

⁴⁵ Sika Davide aamuromolla Mesiya wi Apwiya. Vano anaakhalle edduullu ya Davide mwawiidde?”

⁴⁶ Khaarivo naari mmodda aworille omwaakhulla Yesu nave waambeella nllapo nenno khaarivo mmodda oollipa murima amukohille makoho mamodda.