Mateyu 21 - Mawu a Mulluku

Ovollowa wa Yesu mu Yerusalemu

¹ Yesu ni oohudderaaye yaatamelliiwa o Yerusalemu yaaphiya mu etawoni ya Betefage o mwaango wa Olivi. Vano Yesu ahaarumiha oohudderaaye eelli wi ehoolle.

² Ahaalleella wi, “Khaweni m'muzi muhoollo mwanyu. Enthawi yeeyo mwaphiya muneeromuphwanya bulu oomakellelliwa ni mwanaye eri nimodda. Mwaattaphulle muweena wa miyaano.

³ Muthu mmodda uukohani wi kaambiiwa tini muneereenyu yeella, mwamwaakhulle wi, ‘Apwiya ennaapaalla’ nave eneerewaarumiha mwawaakuva.”

⁴ Nndda ddeereyille wi ddikwakhwanelle nnddo allotille namallotella wi,

⁵ “Ngaalleelleni athu a o Ziyoni wi, ‘Ngoonani, mwenaanyu animawa wa nyuwaano! Tti awiiyeviha navettho amuwenlle mwaanabulu, mwaana a enama yoomutukhulla katundu.’ ”

⁶ Sika oohuddera eellaalle yaayaawo yeera moollikana ni yaalamulelliwiiwa ni Yesu wi yeere.

⁷ Yaawaana bulu ni mwanaye yaanddellella ddawiikhuneella ddiwa va yaayo. Vano Yesu aawella akeraatthi.

⁸ Athu anchichi yahaanddellella ddawiikhuneella ddiwa m'musewuni, amodda yahinttaka enthambi dda miteekho yaanddellella m'musewuni.

⁹ Athu yeeta vahoollo va Yesu ni vatulli vaye yaakhuwa wi, “Ntitimiho nikhalle wa Edduullu ya Davide! Oodalisiwa oyo anawa mu nnddina na Apwiya. Ntitimiho nikhalle wa Mulluku.”

¹⁰ Yesu avollowilleeye mu Yerusalemu, muzinda muttheene waatikheya nave athu yaakoha wi, “Ttaani olla?”

¹¹ Athwaalle yahaakhulla wi, “Olla sika Yesu namallotella oovenyera o etawoni ya Nazareti a echigawo ya Galileya.”

Yesu anawiikariha athu mu enyumba ya Mulluku

¹² Yesu aavollowa mu enyumba ya Mulluku awiikariha athu ookulliha ni ookulla malonda ddeko ddooheraatthella mukutho mwemmo. Aarukunusa matebulo a athu awaakakhaniha makobiri navettho mipando dda ookulliha ekhunda.

¹³ Nave aallota wi, “Mulluku aallota mu mawaaye wi, ‘Enyumbaaka ekhalle enyumba yoovekellamo.’ Koma nyuwaano mooyitthattusa nipuro nawiipitthamo allupaawiiya!”

¹⁴ Vano athu oohoona ni ookhwa meto yaawa wa olliyooyo mu enyumba ya Mullukweeyo nave olliyooyo ahaachiriha.

¹⁵ Allupa mukutho uullupalli ni ahuddihi a malamulo* yaasha murima yoonilliiwa ddoottikhiniha eerilleeyennddo navettho anamwani ekhuwaka mu enyumba ya Mulluku wi, “Ntitimiho nikhalle wa Edduullu ya mwene Davide.”

¹⁶ Sika yaamukoha Yesu wi, “Munniiwa enallotiiwanndda?” Yesu ahaakhulla wi, “Kinniiwa. Khamweerengille mawu a Mullukwaalle awi, ‘Mohaahuddiha anamwani ni akantchewa wi yuutitimihekeni phaama.’ ”

¹⁷ Yesu ahaahiya akhumamo m'muzindani mulle, aya o Betaniya, akona wenko.

Yesu anatembelela muteekho wanamukuyu

¹⁸ Osaka wene ohinase Yesu ni oohudderaaye yahokollweelliiwa omuzindani wulle, Yesu aavolliwa ettalla.

¹⁹ Ahoona muteekho wanamukuyu mukhwipi mwa musewu aya vaavo koma khaaphwanyillevo ezipaso koma makukhuve. Vano aallota wa muteekhooyo wi, “Khawimmattho ezipaso mallapo mattheene!” Enthawi yeeyo muteekho wanamukuyooyo wahumma.

²⁰ Oohudderaalle yoonilliiwa ddenndda yaattikhina emukoha Yesu wi, “Muteekho wanamukuyoolla waakuvalle wumma mwawiidde?”

²¹ Yesu ahaakhulla wi, “Ddawoona, kinimuulleellani wi mwakhalla ni echikhulupililo ni oohikayika, khamweera yeellave kenreemi va muteekho wanamukuyoolla koma naari ollota wa mwaangoolla wi, ‘Venya wiivokhelle weekha mu enyanja,’ eneereweereya.

²² Mwakhalla ni echikhulupililo, muneerewaakhella erive ello munavekeenyu mu nivekello.”

Nikoho na olamulello wa Yesu

²³ Yesu aahokollweella mu enyumba ya Mulluku nave ahuddiheeye allupa mukutho uullupalli ni attekweene yaamuweella emukoha wi, “Muneera ddenndda ni olamulello woovenyera wuuwi? Uuvahilleni olamulello yoolla ttaani?”

²⁴ Yesu ahaakhulla wi, “Mittho kineerewuukohani nikoho nimodda, mwakaakhulla, kineerewuulleellani wi kineera ddeko ddenndda ni olamulello wa aani.

²⁵ Yohane aakusalle wuuwi olamulello woobatiza, waavenyenre wa Mulluku apaalle wa athu?” Yaakambirana weekhiiwa wi, “Nillote wi tini? Namwaakhulla wi wa Mulluku, aneerollota wi, ‘Khamwaamukhulupililalle Yohane kaambiiwa tini?’

²⁶ Koma nallota wi, ‘Ovenyera wa athu,’ ninnoova eyo eneere athwaalla kaambiiwa attheene yaamwaakhullella Yohane wi aari namallotella.”

²⁷ Sika yaamwaakhulla Yesu wi, “Khaninadduwella.” Nave Yesu aallota wi, “Naari miyaanottho nguulleellani wi ddenndda kineera ni olamulello wa aani.

Niphwanaphwaniho na anamwani aallopwana eelli

²⁸ “Vano maganizwaanyu tti awi tini? Muthu mmodda aakhalla ni anaaye aallopwana eelli. Aaya wa mwaana awaamba allota wi, ‘Mwaanawe, khawe waphare mutteko m'matani mwa ezipaso ddampesa ollello.’

²⁹ Mwaanooyo ahaakhulla wi, ‘Nginapaalla miyaano.’ Koma vatulli viwa aasintha maganizo, ayaawo.

³⁰ Vano attiitthiiwaayo yaaya wa mwaana mmoddooyo amulleella emoddamoddave yeeyo. Olliyooyo ahaakhulla wi, ‘Kineeroyaawo attiitthaaka,’ koma khaayiillewo.

³¹ Ttaani mwa eellaalle enre yapanlle attiitthiiwa.” Yaamwaakhulla wi, “Awaamboolle.” Sika Yesu aallota wi, “Ddawoona, kinimuulleellani wi ookhomiha misonkho ni atthiyana ooraruwa eneerohoolla ovollowa mu omwene wa Mulluku nyuwaano muhinavollowe.

³² Vawi Yohane Oobatiza awa wa nyuwaano aawoonihani ettilla ya echilungamo yoopaalleya wi mukuse koma khamwaakhulupililalle koma ookhomiha misonkho ni atthiyana ooraruwa yaamukhulupilila. Koma naari nyuwaano moonilleenyu ddenndda khamwaarukunuwalle murima vatulli viwa wi mumukhulupilile.”

Niphwanaphwaniho na oollima oonanara

³³ Yesu aallota wi, “Iwani niphwanaphwaniho nimodda. Waakhalla mwaneena a emata aallimalle emataaye ya ezipaso ddampesa. Aamaka mpanda moowaapheella emateeyo, aasema nlliti moovotellamo ezipaso ddampesa, aamaka nttattha nookeraatthivo yaaweheraka emateeyo. Vano aapolleyiha emateeyo wa athu oollima nave olliye avenyavo aya o ellapo emodda.

³⁴ Yakwakhwanilliiwa enthawi yootthukumaniha ezipaso ddampesooyo, ahaarumiha allupa muttekwaaye wa oollimaayo wi yaakhelle ezipaso dda m'matanimmo.

³⁵ Oollimaayo yahaaphara allupa muttekwaayaayo, emuukutha mmodda, emwiipha mmodda navettho yaamwiipha mmodda voomuvokhani malluku.

³⁶ Mwaneena a ematoolle ahaarumihattho allupa mutteko amodda, awaata ohiyana ni vawaamba valle. Koma oollima emataayo yaaweerella allupa muttekwaalle emoddamoddave yeeyo.

³⁷ Voomallihella ahaarumihella mwanaye vooganizani wi, ‘Eneeromuvaha olemu mwanaka.’

³⁸ Koma oollimaayo yamoonilliiwa yaalleellana wi, ‘Olla sika mwanaye aamullopwana anaahallena eyuumeella, hankoni nimwiiphe wi eyuumeella ekhalle yaahu.’

³⁹ Sika yaamuphara emuvokha otte wa emateeyo emwiipha.”

⁴⁰ Yesu ahaakoha wi, “Vano mwaneena a ematoolle aphiya anaaweere tini wa oollimaalle?”

⁴¹ Yahaakhulla wi, “Eneerowiipha mowaahoosa oollima oonanaraayo apolleyihe emateeyo wa athu amodda, ayo enaamukawelle ezipaso ddampesa ddaye va enthawi yoohata.”

⁴² Yesu aallota wi, “Khamweerengille mawu a Mulluku awi, ‘Nlluku nno nakhootiwe ni oomaka enyumba nenna naakhalla nlluku noopaalleya. Nndda ddaheeriwa ni Apwiya nave eri yoottikhiniha oyoona!’ ”

⁴³ Yesu ahaanjerera ollota wi, “Sika kinimuulleellani wi, omwene wa Mulluku oneerewaakhiwa wa nyuwaano nave oneerovahiwa wa athu amodda ayo eniimma ezipaso ddaphaama vaweerani echilungamo.”

⁴⁵ Allupa mukutho uullupalli ni Afarisi* yiiwalliiwa maphwanaphwaniho a Yesu yaadduwella wi allota dda yaayo.

⁴⁶ Sika yaapaalla wi emmake koma yawoova athwaayo kaambiiwa yamwaakhullella Yesu wi tti namallotella.