Mateyu 20 - Mawu a Mulluku

Allupa mutteko mu emata ya ezipaso ddampesa

¹ “Omwene wa Mulluku tti wonanko niphwanaphwaniho nna. Waakhalla mwaneena a emata oyo akhumalle ohinase wi aalembe allupa mutteko oollima emataaye ya ezipaso ddampesa.

² Vano aapanganana wi aallivelleke, nikobiri nimodda vanllaponi nimodda nave ahaarumiha omata waye wi yaphare mutteko.

³ Vano aakhuma enthawi ya 9 koloko aya omusika nko awoonilleeye athu amodda yiimenlle ehipharaka mutteko,

⁴ sika ahaalleella wi, ‘Nyuwaano khawenittho mwaphare mutteko m'matani mwaka nave kineerewuullivellani yeeyo eri yoophwanella.’ Sika alliwaayo yaayaawo

⁵ Vano enthawi ya 12 koloko navettho enthawi ya 3 koloko aheera emoddamoddave yeeyo.

⁶ Vano misikuwa enthawi ya 5 koloko aakhumattho aya omusika, aaphwanya athu amoddattho yiimenlle. Ahaakoha wi, ‘Kaambiiwa tini mweenreenyu moona wiimella vaava nndduwa nittheene muhipharaka mutteko?’

⁷ Vano yahaakhulla wi, ‘Khaavo anilembille mutteko.’ Ahaalleella wi, ‘Khaweni nyuwaano mwapharettho mutteko m'matani mwaka.’

⁸ “Vano misikuwa nndduwa nivollowaka mwaneena a ematoolle amulleella kapitawaaye wi, ‘Owiithane allupa mutteko wi waavahe mallivellwiiwa, waambeella ni ayo yaalembiwe moomallihella nave omallihe ni ayo yaalembiwe moowaambeella.’

⁹ Athu yaambille mutteko enthawi ya 5 koloko yahaakhella nikobiri nimodda arive muthu.

¹⁰ Sika athwaalle yaalembiwe moowaambeella yaphiyalliiwa yeesa eneerewaakhella ddinchichi koma alliwattho yaakhenlle nikobiri nimodda arive muthu.

¹¹ Yaakhenlle makobiriiwa nave yaamba orokella wa mwaneena a ematoolle.

¹² Yaallota wi, ‘Athu alla yaalembiwe moomallihella yaphanre mutteko enthawi yooyeva koma hiyaano naavillella mutteko wa nllapo nittheene ni oviha wa nndduwa nave mohaallivella moophwanaphwana ni mmo muniillivenlleenyu.’

¹³ “Mwaneena a ematoolle aamwaakhulla mmodda a yaayo wi, ‘Mukhwaaka, miyaano nguullekille. Weyaano naapangana ophara mutteko nllapo nittheene va nikobiri nimodda.

¹⁴ Vano kusa mallivellwaawo oroweke. Miyaano kinapaalla kimuvahe olla aalembiwe moomallihella mallivello ophwanaphwana ni a weyaano.

¹⁵ Khonaakhullelliwa wa miyaano weera yeeyo kinapaalleemi ni makobiraaka? Apaalle onakikhallella ehache kaambiiwa miyaano kiri aphaama?’ ”

¹⁶ Vano Yesu aamalliha ni wi, “Sika oomallihella eneerokhalla awaambeella nave awaambeella eneerokhalla oomallihella.”

Yesu anallota waneeraru dda okhwa waye

¹⁷ Vano Yesu awelleeye oya o Yerusalemu, ahaakusella oohudderaaye khumi ni eelli vakhwipi. Yeetaka ahaalleella wi,

¹⁸ “Ninnawella oya o Yerusalemu. Wenko mi, Mwaana a Muthu, kineerovelleelliwa wa allupa mukutho uullupalli ni ahuddihi a malamulo* nave eneerokamulla wi kiiphiwe.

¹⁹ Vano eneerokivelleella wa athu ayo ehiri Ayuda, yaayo eneerokillotella epewe, ekiwashulle, ekitthomeye vamutandani koma vavira mallapo mararu kineerovenyihiwa wa ookhwa.”

Dda muullupalli wunchichi

²⁰ Vano mwaara a Zebedayo ni anaaye aallopwana eelli, Yakobo ni Yohane, yaawa wa Yesu nave aamukokhorella aveka ello.

²¹ Yesu aamukoha wi, “Onapaalla tini?” Olliyooyo ahaakhulla wi, “Lamulellani wi mwakeraatthi vampandoni wa ntitimiho mu omwenaanyu anaaka eellaalla ewe yakhalle mmodda o nnattanatta nanyu ni mmodda o nnatta noonyottho nanyu.”

²² Koma Yesu aawaakhulla anamwanaayo wi, “Khamunadduwella eyo munavekeenyu. Muneerowora omuwiryella kapu a ddookatamiha oyo kinaamuwiryelleemi?” Yaayo yahaakhulla wi, “Nineeromuwiryella.”

²³ Yesu ahaakhulla wi, “Ddawoona muneeromuwiryella kapu kinaamuwiryelleemi koma nginna olamulello woomutthoolla oyo anaakhalle o nnattanatta naka apaalle o nnatta naka noonyottho. Koma mapuro yaalla tti ayo ekhozeriwe ni Attiitthaaka.”

²⁴ Oohuddera amodda khumaalle yiiwalliiwa ddennddo, yahaashella murima Yakobo ni Yohane.

²⁵ Vano Yesu aawiithana attheenaayo vamodda allota wi, “Munnadduwella wi oolamulella a athu a ellapo yavatthi ennakhalla ni masiva va olamulelliwa nave oohoollella aakhalla ni olamulello va oohoollelliiwa.

²⁶ Wa nyuwaano ddihikhalleke ddiidda. Koma muthu apaalla okhalla muullupalli anaphwanella akhalle oorumeyella a attheenenyu.

²⁷ Nave oyo anapaalla okhalla awaambeella mwa nyuwaano, akhalle kaporo a attheenenyu,

²⁸ wonanko mi, Mwaana a Muthu, ngaawiille wi kirumeyelliwe koma wi kaarumeyelle ni ovelleella okumaaka owoopolla athu anchichi.”

Yesu anaachiriha athu eelli oohoona

²⁹ Vano enthawi emodda Yesu ni oohudderaaye yakhumiiwa mu Yeriko, mulloko wa athu muullupalli wahaathwara.

³⁰ Athu oohoona eelli ayo yakeraatthille mukhwipi mwa musewu yahiiwa wi Yesu aamaviravo. Sika yaakhuwa wi, “Nyu Apwiya, edduullu ya Davide, muneerelle echifundo!”

³¹ Mullokooyo wahaasimwella waalleella wi emaalle. Koma yaavirellella okhuwa ohiyana ni vawaamba wi, “Apwiya, Edduullu ya Davide, muneerelle echifundo!”

³² Yesu ahiimella awiithana. Ahaakoha wi, “Munapaalla kiweerelleni tini?”

³³ Yahaakhulla wi, “Apwiya, ninapaalla wi nooneke.”

³⁴ Yesu ahaamorella ethakaraka nave aattannya miitthwiiwa. Vano enthawi yeeyo yahoonattho nave yaamuthwara olliye.