Mateyu 2 - Mawu a Mulluku

Alleto oovenyera wookhuma nndduwa

¹ Yesu ayariweeye mu etawoni ya Betelehemu mu echigawo ya Yudeya, mwene a ellapweeyo aari Herode.* Enthawi yeeyo athu oohuddera dda etheneeri oovenyera wookhuma nndduwa yaaphiya m'muzindani wa Yerusalemu.

² Vano yaakoha wi, “Ari wuuwi mwaanooyo ayariwe wi akhalle mwene a Ayuda? Hiyaano noonille etheneeri yoodduwelliha oyariwa waye ekhumalle wookhuma nndduwa, vano noowa wi nimullapelle.”

³ Mwene Herode iiwalleeye nndda, ahaapheella muru vamodda ni athu attheene a o Yerusalemu.

⁴ Vano Herode ahaatthukumaniha allupa mukutho uullupalli ni ahuddihi a malamulo* attheene a Eyuda. Vano ahaakoha wi, “Anaayariwelle wuuwi Mesiyooyo.”

⁵ Vano yaamulleella wi, “Mu Betelehemu a Yudeya. Vallethi namallotella aalemba wi,

⁶ ‘We Betelehemu mu echigawo ya Yudeya, ori muullupalli variyari va matawoni a mu Yudeya. Oohoollella anawa avenyera mwa weyaano, oyo anaahoollelle athwaaka Aisraele wonanko mbusa.’ ”

⁷ Vano Herode aawiithanella alleto a wookhuma nndduwaalle vakhwipi, ahaakohesesa dda enthawi yoonilliiwa etheneereelle.

⁸ Eerille ddiiddo ahaarumiha o Betelehemu aallella wi, “Khaweni mwakohesese dda mwaanooyo. Mwamphwanya, mukilleelle wi nameene kiyeewo kamullapellettho.”

⁹ Vano yiiwalliiwa mawu a mwene, yaatimulla. Eri muttilla, yahoonattho etheneereelle yoonilliiwa ekhumalle wookhuma nndduwa nave yahaaholleella ophiyera yiimella vanipuroni mvo vaari mwaanoolle.

¹⁰ Vano yaari oohakallalla ni murimiiwa muttheene vawoonani etheneereeyo.

¹¹ Yavollowilliiwa mpa, yaamoona mwaanooyo ari ni amennya, Mariya. Vano yaakokhora emullapella. Yaattaphulla eyuumiiwa emuvaha emphaso dda golide, lubani* ni makhura a nthuko naphaama na mure.*

¹² Vano Mulluku aachenjezille muullohani wi ehihokollweelle wa Herode, yaahokollweella owaniwa oyeella ettilla emodda.

Yosefe ni Mariya enathawella ni Yesu o ellapo ya Iguputo

¹³ Alleto a wookhuma nndduwaalle erowille, mungelo a Apwiya ahooneya wa Yosefe muullohani allota wi, “Ngavenya, omukuse mwaanooyo ni amennya muthawelle o Iguputo. Wakhalle wenko ophiyera kuulleelle yaweera kaambiiwa Herode anapaalla omwiipha mwaanooyo.”

¹⁴ Vano Yosefe aavenya, amukusa mwaanooyo ni amennya mahiiyu yaayo eya o Iguputo.

¹⁵ Yaakhalla wenko ophiyera Herode aakhwa. Ella yeereye wi ekwakhwanelle eyo yallotille Apwiya mwa namallotella wi, “Kaamwiithana mwanaka wi akhumewo o Iguputo.”

Herode anawiipha anamwani

¹⁶ Vano Herode adduwenlleeye wi alleto a wookhuma nndduwaalle yaamoottottha, aasha murima. Ahaalamulella akhoto wi yawiiphe anamwani aallopwana oohikhwaranya miyakha miilli a mu Betelehemu ni m'mapuroni mutthemwene mwawaatamanana moollikana ni yeeyo aakohesesilleeye alletwaalle dda enthawi yoonilliiwa etheneereelle.

¹⁷ Nndda ddaakwakhwaniha nnddo namallotella Yeremiya aallotilleeye wi,

¹⁸ “Okhuwa onniiweya o Rama, wa ekutho ni winlla wunchichi, Rakele anawinllella anaaye, animakhoota okhurumusiwa murima, kaambiiwa anaaye aakhwa.”

Yosefe ni Mariya enawaawo o Iguputo

¹⁹ Vano akhwille Herode, mungelo a Apwiya ahooneya wa Yosefe muullohani mu Iguputo allota wi,

²⁰ “Ngavenya omukuse mwaanooyo ni amennya, muye o Israele kaambiiwa ayo yapaalla omwiipha mwaanooyo yookhwa.”

²¹ Vano Yosefe aavenya, aamukusa mwaanooyo ni amennya ehokollweella o Israele.

²² Koma Yosefe iiwalleeye wi Arikalawo aari mwene a o Yudeya munipuroni mwa attiitthinnya, Herode, ahoova oya wenko. Vano Mulluku amuchenjezille muullohani, aaya o echigawo ya Galileya.

²³ Vano aakhalla mu etawoni yooromolliwa Nazareti wi ekwakhwanihiwe yoollotiwa ni anamallotella wi, “Aneeroromolliwa Munazarene.”