Mateyu 19 - Mawu a Mulluku

Dda omwallana

¹ Yesu amallihalle ohuddiha, aavenyawo o echigawo ya Galileya aya o echigawo ya Yudeya okhopella wa muhinje wa Yordani.

² Athu anchichi yaamuthwara nave ahaachiriha oovoriiwa wenko.

³ Afarisi* amodda yaawa wa olliye, emukoha moomweesa wi, “Tti wowaakhullelliwa ni malamulwaahu wi muthu amwallane ni mwaariye va erive ekaamba anapaalleeye?”

⁴ Yesu ahaakhulla wi, “Khamweerengille mawu a Mulluku awi oyo aaphatusalle athu, vawaamba ahaaphatusa mullopwana ni mutthiyana?

⁵ Nave mawu Mulluku enittho, ‘Ekaamba ya yeella mullopwana aneerekewaahiya attiitthinnya ni amennya, aya atthella nave eellaayo eneerokhalla mwiilli mmodda.’

⁶ Sika kherittho eelli koma mmodda. Vano eyo Mulluku amakilleeye vamodda, muthu ahihiyanihe.”

⁷ Afarisi yaamukoha wi, “Kaambiiwa tini Mose alamuleeye wi muthu amwinnyeke mwaariye kalata oomwallanella aapaallaka omuhiya?”

⁸ Yesu ahaakhulla wi, “Mose aawaakhullellani omwallana ni awarinyu kaambiiwa nyuwaano tti awumma murima. Koma vawaamba kheddaari ddiidda.

⁹ Vano miyaano kinimuulleellani wi, mullopwana amuhiya mwaariye ahiraruwalle, amutthella mmodda, mullopwanooyo animararuwa.”

¹⁰ Oohudderaalle yaamulleella Yesu wi, “Okhalla wa muthu ni mwaariye wakhalla wawi ddiidda, ori phaama ohitthella.”

¹¹ Yesu ahaakhulla wi, “Khe athu attheene enawiiwesese ehuddiho ella koma wa yaayove ayo evahiwe ni Mulluku.

¹² Vawi vookhalla ddeko ddoohiyanahiyana ddinaweeriha athu ohitthella. Amodda kaambiiwa yaayariwe ddiiddo; amodda, tti kaambiiwa athu yahaahulla; nave amodda khenatthella kaambiiwa enapaalla emullapelleke phaama Mulluku. Yooyo anawora wiiwesesa ehuddihweella, iwesese.”

Yesu anaadalisa anamwani

¹³ Athu amodda yaawaana anamwani wa Yesu wi awiiyaatthi matta ni waavekellella koma oohuddera yahaahumullulla athwaayo.

¹⁴ Koma Yesu aallota wi, “Ahiyeni anamwanaayo ewe wa miyaano, muhaahiihe kaambiiwa omwene wa Mulluku tti wa athu ookhalla wonanko anamwanaalla.”

¹⁵ Sika ahaadalisa yaayo nave aavenyavo.

Dda musombwe eeyuuma

¹⁶ Musombwe mmodda aawa wa Yesu amukoha wi, “Ahuddihi, yaphaama ttiivi yawi keere wi kaakhelle okumi woohimalla?”

¹⁷ Vano Yesu ahaakhulla wi, “Onakikohera tini dda ddeko nnddo ddiri ddaphaama? Mullukuve sika ari aphaama. Waapaallaka ovollowa mu okumi woohimalla owiiwellelleke malamulwaaye.”

¹⁸ Aakoha wi, “Malamulweene aavi?” Yesu ahaakhulla wi, “Ohimwiiphe muthu, ohiraruwe, ohiiye, oheere omboni wawoottha

¹⁹ Waavaheke olemu attiittho ni amaayo, omukondeke mukhwaawo wonanko mmo oniikondelleewe weekha.”

²⁰ Musomboolle ahaakhulla wi, “Malamulo mattheenaalla kaawiiwellella, ekiyelleellettho tti tini?”

²¹ Yesu aallota wi, “Wapaalla okhalla aphaama wunchichi, khawe wakullihe ddeko oriiwena nave makobiraayo waavahe athu oohoowa nave oneerothuviwa oddullu. Weera ddiiddo owe okithware.”

²² Musomboolle iiwalleeye ddenndda, aavenyavo ari ookhupanya wunchichi kaambiiwa aakhalla ni eyuuma yinchichi.

²³ Yesu ahaalleella oohudderaaye wi, “Ddawoona, kinimuulleellani wi tti wookatamiha wi athu eeyuuma yavollowe mu omwene wa Mulluku.

²⁴ Kinimuulleellanittho wi tti yavakhuviru wi ekamira* evire vamullakoni va singano ohiyana ni wi muthu eeyuuma avollowe mu omwene wa Mulluku.”

²⁵ Oohudderaalle yiiwalliiwa ddenndda yaattikhina wunchichi. Yaakoha wi, “Ttaani vano, anaawore ovulluwa?”

²⁶ Yesu ahaawehesesa allota wi, “Ddenndda tti ddoohiworeya ni athu koma ddittheddene ddinaworeya ni Mulluku.”

²⁷ Vano Petro aallota wi, “Hi ninaaphurevo tini vawi noohiya ddittheddene nuuthwarani nyuwaano?”

²⁸ Yesu ahaalleella wi, “Ddawoona, kinimuulleellani wi mi, Mwaana a Muthu, kakeraatthi vampandonaaka wa ntitimiho mu ellapo yanaanweene, vano nyuwaanottho oohudderaaka khumi ni eelli muneerokeraatthi m'mipandoni wi muweeruze malloko khumi ni meelli a Israele.

²⁹ Nave attheene ayo ehiyalle enyumba ddiwa apaalle asinniwa naari arokoriwa apaalle attiitthiiwa apaalle ameewa naari aniiwa apaalle emata ddiwa kaambiiwa tti oohudderaaka eneerewaakhella nnddo ehiyalliwa waakullella 100 nave eneerewaakhella okumi woohimalla.

³⁰ Nave anchichi ayo eri awaamba eneerokhalla ookomihera nave ayo eri ookomihera eneerokhalla awaamba.”