Mateyu 18 - Mawu a Mulluku

Muullupalli ttaani

¹ Enthawi yeeyo oohuddera a Yesu yaawa wa olliye emukoha wi, “Muullupalli ttaani mu omwene wa Mulluku?”

² Vano Yesu aamwiithana mwaana amwiimesa variyari va attheenaayo.

³ Nave aallota wi, “Ddawoona, kinimuulleellani wi mwaahirukunuwa muneerokhalla wonanko mwaana khamuwa muvollowa mu omwene wa Mulluku.

⁴ Vano oyo aniiyeviha yeekhaaye wonanko mwaanoolla sika ari muullupalli mu omwene wa Mulluku.

⁵ Nave muthu anamwaakhella mwaana mmodda awi ddiidda ekaamba ya miyaano, anakaakhella miyaano.

Ddoochimwiha

⁶ “Koma muthu oyo aneeriha wi mmodda a ang'onong'onwaalla ahiye okikhulupilila miyaano, waaweerokhalla waphaama wi nlluku na nsillo namakellelliweke munikohini mwaye nave apwinihiwe mu enyanja yoowallamella.

⁷ Otulli ori vatthimva kaambiiwa vookhalla ddeko ddinaweeriha athu ohiya echikhulupililwiiwa! Ddeko ddennddo ddinaphwanella wi ddeereyeke koma ootulli tti muthu aneeriha ddenndda.

⁸ “Nnatta nawo apaalle nnyallo nawo nuuchimwiha, oniphadde nave onitathille! Tti waphaama wa weyaano wi wavollowe mu okumi woohimalla ori oophaddeya nnatta apaalle nnyallo ohiyana ni okhalla ni matta meelli apaalle manyallo meelli koma ovokhiwa m'munlloni woohimalla.

⁹ Nave niittho nawo nuuchimwiha, onikhorokottemo nave onitathille! Tti waphaama wa weyaano wi wavollowe mu okumi woohimalla ni niittho nimodda ohiyana ni okhalla ni miittho meelli nave ovokhiwa mu munllo wa gehena.

Niphwanaphwaniho na enkhosa yoohollowa

¹⁰ “Chenjerani wi muhimuvevulle mmodda a ang'onong'onwaalla. Vawi kinimuulleellani wi angelwiiwa ooddullu eri vamiitthoni va Attiitthaaka enthawi ddittheddene.

¹² “Muthu akhalla ni enkhosa 100 nave emodda ehollowa, anaaweere tini? Aneerohiya ddimoddannddo 99 voochihani vaavo aya aashaashaka emodda yooholloweeyo.

¹³ Nave ayiphwanya, ddawoona, kinimuulleellani wi yooyo annahakallallella enkhosa yeeyo ohiyana ni 99 ddoohihollowanndde.

¹⁴ Emoddamoddave yeeyo Attiitthaanyu ooddullu khenapaalla wi naari mmodda mwa ang'onong'onwaalla ahollowe.

Mukhwaawo oochimwa

¹⁵ “Mukhwaawo uuchimwella, oye wa olliyooyo wamuhumullulle murivo eelli. Awiiwellella weyaano woomuhokollosa mukhwaawooyo.

¹⁶ Koma aahiwiiwellella omwaanjererevo mmodda apaalle eelli wi mawu mattheene yasimikizelliwe ni amboni eelli apaalle araru.

¹⁷ Nave aahiwiiwellella yaayo, olleelle mpingo yeeyo. Voomallihellani, aahiiwellellattho mpingooyo omweeseke wonanko muthu oohimullapella Mulluku apaalle ookhomiha musonkho.

¹⁸ “Ddawoona, kinimuulleellani wi attheenenyu eyo munamakeenyu va ellapo yavatthi eneeromakiwa oddullu. Nave eyo Munaattaphulleenyu va ellapo yavatthi eneerottaphulliwa oddullu.

¹⁹ “Kinimuulleellanittho ddawoona wi eelli mwa nyuwaano va ellapo yavatthi mwaakhullellana erive ello munavekelleenyu, eneereweeriwa wa nyuwaano ni Attiitthaaka ooddullu.

²⁰ Vawi eelli naari araru yawa etthukumana ekaamba yawi tti oohudderaaka, miyaano kiri wenko variyari viwa.”

Niphwanaphwaniho na mullupa mutteko oohikhululukella

²¹ Vano Petro aawa wa Yesu, amukoha wi, “Apwiya, mukhwaaka aakichimwellaka wiilliwiilli, kimukhululukelleke okavi? Ophiyera otthanu ni opiilli?”

²² Yesu ahaakhulla wi, “Iyaayi, ohiri otthanu ni opiilli koma ophiyera olendo 70 waakullella otthanu ni opiilli.

²³ Sika omwene wa Mulluku tti wonanko niphwanaphwaniho nna. Vaakhalla mwene mmodda oyo apaallille wi eerengelle ekongoli dda allupa muttekwaaye.

²⁴ Akhunlle waamba wene, yaawaana wa yooyo muthu mmodda akongonle makobiri manchichi wa olliyooyo.

²⁵ Mullupa mutteko yoolla khaarina ddookwakhwanella ohokollosa ekongoleelle, sika mwenoolle aalamulella wi yooyo akullihiwe wonanko kaporo ni mwaariyeene ni anaaye ni ddittheddene aariiyena wi ekongoleelle ehokollosiwe.

²⁶ Vano mullupa muttekoolle aamukokhorella mwenoolle, amuveka wi, ‘Mukitiyere nave kineerewuuhokollosellani ekongoli ettheene!’

²⁷ Mwenoolle aamumorella ethakaraka, sika aamukhululukella ekongoleelle nave aamulleella wi aroweke.

²⁸ “Vano mullupa muttekoolle aakhuma akumana ni mullupa mutteko mukhwaaye oyo aamukongolihalleeye makobiri ooyeva. Aamuphara amunyoka vanikohini amulleella wi, ‘Kihokolloselle nndde waakongonleewe!’

²⁹ Vano mukhwaayoolle aamukokhorella amuveka wi, ‘Kitiyere nave kineerewuuhokollosella!’

³⁰ Koma olliye aakhoota sika aamuhiyiha mundende ophiyera wi ahokollose ekongoleeyo.

³¹ Vano allupa mutteko amoddaayo yoonilliiwa yaweereyeeyo yahaapheella muru nave yaaya wa mwenoolle yamulleella ddittheddenenndde.

³² Sika mwenoolle aamwiithana mullupa muttekoolle amulleella wi, ‘We mullupa mutteko oonanara murima, kahuukhululukella ekongoli ettheeneelle kaambiiwa waakiveka wi kuukhululukelle.

³³ Weyaanottho waaweromweerella echifundo mullupa mutteko mukhwaawo, ophwanaphwana ni mmo kaweerelleemi echifundo.’

³⁴ Mwenoolle aasha murima wunchichi nave aamuhiyiha mullupa muttekoolle mundende wi allakiwe ophiyera wi ahokollose ekongoli ettheeneelle.”

³⁵ Nave Yesu aamalliha ni wi, “Attiitthaaka ooddullu eneeroweerellani mwawi ddiidda arive muthu a nyuwaano mwaahimukhululukellaka mukhwiinyu ovenyera m'murimani mwanyu.”