Mateyu 17 - Mawu a Mulluku

Otthattuwa wa Yesu

¹ Vano viviralle mallapo matthanu ni nimodda, Yesu ahaakusa Petro, Yakobo ni mwanamunne Yohane awellana vaddullu vamwaangoni woorekama, wenko yaariwo weekhiiwa.

² Nave Yesu aatthattuwa vamiitthoni viwa. Owiitthoni waye waanawala wonanko nndduwa nave ddoowara ddaye ddaakhalla ddaweella mbee.

³ Enthawi yeeyo oohudderaalle yaawoona athu yakhwille khalle, Mose ni namallotella Eliya, ellotaka ni Yesu.

⁴ Vano Petro aallota ni Yesu wi, “Apwiya, ddookhalla phaama wi hiyaano niri vaava. Mwaapaallaka, kuutthipellelleni misasa miraru vaava; mmodda wa nyuwaano, mmodda wa Mose nave mmodda wa namallotella Eliya.”

⁵ Allotaka ddiiddo, waawa murapo woowala waakhuneella ni muuthuuchiiwa nave mawu oovenyera m'muraponimmo yaallota wi, “Olla sika Mwanaka ookondiwa, kinnahakallallana wunchichi mwiiwellelleni.”

⁶ Oohudderaalle yiiwalliiwa yeella, yahoova wunchichi sika yaamora ekhove.

⁷ Yesu aawa aattannya allota wi, “Venyani, muhoove.”

⁸ Vano yawehilliiwawo khayamonne muthu mmodda koma Yesuve.

⁹ Yakitthalliiwa m'mwaangonimmo, Yesu ahaalamulella wi, “Muhimulleelle muthu moonilleenyunnddo, ophiyera olliye Mwaana a Muthu avenyihiwe wa ookhwa.”

¹⁰ Oohudderaalle yaamukoha Yesu wi, “Kaambiiwa tini ahuddihi a malamulo* enallotiiwa wi namallotella Eliya anaakhalle ahokollowille Khrisitu ahinawe?”

¹¹ Yesu ahaakhulla wi, “Ddawoona, namallotella Eliya aahoolla owa wi apotokose ddeko ddittheddene.

¹² Koma kinimuulleellani wi Eliya aawa khalle nave athu kheyamudduwenlle koma yaamweerella yapanlliiwa. Eneerokihoosa mi Mwaana a Muthu emoddamoddave yeella.”

¹³ Vano oohudderaaye yahiiwesesa wi Yesu allota dda Yohane Oobatiza alloteeye dda Eliya.

Yesu anamuchiriha musombwe ookhalla ni munepa woonanara

¹⁴ Yahokollweelliiwa o mulloko wa athu muullupalloolle, muthu mmodda aawa wa Yesu amukokhorella,

¹⁵ nave aallota wi, “Apwiya, mweerelleni mwanaka echifundo! Animavoriiwa achillechille nave ennamuhoosa mwawoopiha wawi annamorella vamunlloni wiilliwiilli navettho m'maaddini wiilliwiilli.

¹⁶ Nave kaawaana wa oohudderaanyu koma kheyaawonre omuchiriha.”

¹⁷ Yesu ahaakhulla wi, “Nyu athu a mbado woohikhulupililoolla ni woonanara! Kinaakhalle ni nyuwaano ophiyera niini? Kinuuvillelleni ophiyera niini? Wannani musombooyo wa miyaano!”

¹⁸ Yesu aawusimwella munepa woonanarooyo nave waakhumamo mwa musombooyo nave enthawi yeeyo aachirihiwa.

¹⁹ Vano oohudderaalle yaawa wa Yesu arivo yeekhaaye emukoha wi, “Kaambiiwa tini hiyaano khanaawonre okhumiha munepa woonanara?”

²⁰ Yesu ahaakhulla wi, “Tti ekaamba yawi echikhulupilwaanyu tti yooyeva. Ddawoona, kinimuulleellani wi mwakhalla ni echikhulupililo yooyeva wonanko mmiddo wa masitadi, ttuuwora ollota wa mwaango wi, ‘Susavo mva oye valle!’ Mwaangooyo oneerosusa. Kheyiivo enaalepheliwe weeriwa ni nyuwaano.”

Yesu onallota waneepiilli dda okhwa waye

²² Oohuddera attheene yatthukumanniiwa mu Galileya, Yesu aallota wa alliwaayo wi, “Mi, Mwaana a Muthu, kineerovelleelliwa wa athu.

²³ Eneerokiipha koma vavira mallapo mararu kineerovenyihiwa wa ookhwa.” Oohudderaalle yiiwalle mawu yaalla yaamoriwa ethakaraka.

Okhoma musonkho wa enyumba ya Mulluku

²⁴ Yesu ni oohudderaaye ephiyalle o Kaperenao, ookhomiha musonkho wa enyumba ya Mulluku yaawa wa Petro emukoha wi, “Ahuddihaanyu ennakhoma musonkho wa enyumba ya Mulluku?”

²⁵ “Petro ahaakhulla wi, Ee, ennakhoma.” Petro avollowille mpa mulle, Yesu aallota vawaamba wi, “Simoni maganizwaawo tti awi tini? Ttaani anakhoma musonkho wa mamwene a va ellapo yavattheella? Alleto apaalle athu a mutundwiiwa?”

²⁶ Petro ahaakhulla wi, “Alleto sika enakhoma.” Yesu ahaakhulla wi, “Sikathi vano athu a mutundwiiwa khenaphwanella okhoma musonkho.

²⁷ Koma khaninapaalla waashiha murima athu yaalla. Sika khawe o enyanja wamedde ehomba. Ehomba yawaambeella omedda waatthamihe eyano nave muwano mwaye oneerophwanyamo makobiri ookwakhwanella okhomella musonkhwaaka ni waawo wa enyumba ya Mulluku. Waakuse nave wakhomelle misonkho ddahu.”