Mateyu 16 - Mawu a Mulluku

Oveka echizindikiro

¹ Afarisi* amodda ni Asaduki* amodda yaawa wa Yesu. Yapaalla omweesa, sika yaamuveka echizindikiro yoovenyera oddullu yawooniha wi Mulluku sika amurumihalle.

² Koma Yesu ahaakhulla wi, “Nndduwa naavollowaka, munnallota wi, ‘Osiisello oneerosa phaama kaambiiwa oddullu woofiira.’

³ Nave ohinase munallota wi, ‘Ollello oneerokhalla ephevo yuullupalli kaambiiwa oddullu tti woofiira mwawoopiha.’ Munnadduwella ollotella wooneya wooddullu koma khamunawora ottaphullella ezizindikiro dda enthawi yeella!

⁴ Athu a mbadoolla tti oonanara ni oohiroromelleya, enakiveka echizindikiro. Kheyiivo echizindikiro enaavahiwiiwa koma ya namallotella Yonave.” Vano ahaahiya avenyavo.

Yisiti a Afarisi ni Asaduki

⁵ Oohudderaalle yallapuwelliiwa okhopella wa enyanja nko waari Yesu, yaatiwalla omukusa buledi.

⁶ Yesu aallota wa alliwaayo wi, “Muchenjere ni owehera dda yisiti a Afarisi ni Asaduki.”

⁷ Oohudderaayo yaatakhellana weekhiiwa wi, “Anallota ddenndda kaambiiwa khanimukusalle buledi.”

⁸ Yesu aadduwella yallotiiwa, sika ahaakoha wi, “Munatakhellana ddoohikhalla ni buledi kaambiiwa tini? Nyu athu eechikhulupililo yooyeva!

⁹ Khamuniiwesesave? Khamunuupuwella kameyilleemi mitthi dda buledi mitthanu waachiha athu 5,000? Khamunuupuwella wi mwaaddallihalle mitaanga mikavi ni ddoohalla?

¹⁰ Apaalle khamunuupuwella dda mitthi dda buledi mitthanu ni miilli waachiha athu 4,000 nave mwaaddallihalle mitaanga ddikavi dda ddoohalla?

¹¹ Kaambiiwa tini muhiniiweseseenyu wi kalloteemi khe ya buledi? Koma muchenjereke ni yisiti a Afarisi ni Asaduki!”

¹² Vano oohudderaalle yahiiwesesa wi khaalleelle ddawi echenjerekena yisiti koma echenjerekena ehuddiho yawoottha ya Afarisi ni Asaduki eyo yaari wonanko yisiti.

Petro anasimikizella dda Yesu

¹³ Yesu aaya mu echigawo yowaatamana ni etawoni ya Kaisareya Filipi ahaakoha oohudderaaye wi, “Athu enallota wi mi Mwaana a Muthu kiri aani?”

¹⁴ Yaamwaakhulla wi, “Amodda eni Yohane Oobatiza, amodda eni namallotella Eliya nave amodda eni namallotella Yeremiya apaalle mmodda a anamallotella amodda.”

¹⁵ Vano ahaakoha wi, “Nyu munihina miyaano ttaani?”

¹⁶ Simoni Petro ahaakhulla wi, “Nyu tti Mesiya,* Mwaana a Mulluku Ookumi.”

¹⁷ Nave Yesu ahaakhulla wi, “Tti oodalisiwa weyaano, Simoni mwaana a Yona vawi khe muthu uupullullalle ddawoonanndda wa weyaano koma Attiitthaaka ooddullu.

¹⁸ Sika kinuuvaha nnddina nawi Petro ottaphullella wi, ‘nlluku’. Vanllukuni vaava kineeromakavo mpingwaaka nave masiva a okhwa khewugonjiha.

¹⁹ Kineerewuuvaha makiiyi a omwene wa Mulluku nave yeeyo onaamakeewe va ellapo yavatthi, eneeromakiwa oddullu, eyottho onaattaphulleewe va ellapo yavatthi, enaakhalle yoottaphulliwa oddullu.”

²⁰ Vano Yesu ahaalamulella oohudderaalle wi ehimulleelle arive muthu wi olliyooyo tti Mesiya.

Yesu anallota vawaamba dda okhwa waye

²¹ Waambeella enthawi yeeyo oya muhoollo Yesu ahaamba waalleella oohudderaaye wi tti woophwanella wi olliyooyo aye o Yerusalemu wi ahoosiwe wunchichi ni attekweene a Ayuda,* allupa mukutho uullupalli ni ahuddihi a malamulo* nave aneerewiiphiwa koma vavira mallapo mararu aneerovenyihiwa wa ookhwa.

²² Petro aamukusella vakhwipi aamba omuhumullulla wi, “Mulluku ahaakhullelle, Apwiya! Ddenndda ddiheereye wa nyuwaano.”

²³ Koma Yesu aamurukunuwella Petro allota wi, “Okivenyerevo, Satana! Weyaano tti oolepheliha muttekwaaka kaambiiwa maganizwaawo khenavenyera wa Mulluku koma wa athu.”

²⁴ Vano Yesu aallota wa oohudderaaye wi, “Muthu aapaallaka okithwara iikhoote yeekhaaye, atukhulle mutandaaye akithware miyaano.

²⁵ Vawi muthu aapaallaka ovullusa okumaaye, aneerewuutathilla nave atathilla okumaaye kaambiiwa annakithwara miyaano, aneerewuuvullusa.

²⁶ Muthu anaapindulevo tini aakhella ellapo yavatthi ettheene atathilla okumaaye? Apaalle muthu anaavelleelle tini wi ahokolloselliwe okumaaye?

²⁷ Vawi mi Mwaana a Muthu kiri vakhuviru owa ni ntitimiho na Attiitthaaka ni angelo. Vano kineeromuthuva arive muthu moollikana ni mitteko ddaye.

²⁸ Ddawoona, kinimuulleellani wi, aakhallavo amodda vaava khewa ekhwa ophiyera ekoonille mi, Mwaana a Muthu kiwaaka wi kilamulelle wonanko mwene.”