Mateyu 15 - Mawu a Mulluku

Ehuddiho ya makhollo a Ayuda

¹ Vano Afarisi* amodda ni ahuddihi a malamulo* amodda oovenyera o Yerusalemu yaawa wa Yesu emukoha wi,

² “Kaambiiwa tini oohudderaanyu kheniiwellella ehuddiho ya makhollwaahu?* Vawi yaachaka khenanawa moollikana ni ehuddihweella!”

³ Yesu ahaakhulla wi, “Nave nyuwaano muhiniiwellellella tini lamulo na Mulluku vawi muniiwellella ehuddihwaanyu?

⁴ Vawi Mulluku aalamulella wi, ‘Waavaheke olemu attiittho ni amaayo nave muthu anaatembelela attiitthinnya naari amennya, ddawoona iiphiweke.’

⁵ Koma munahuddiha wi mmodda aalleella attiitthinnya apaalle amennya wi, ‘Nikavihero kaawinnyemini koovelleella wa Mulluku,’

⁶ khanaphwanella waavaha olemu makhollwaaye. Mwawi ddiidda munnavevulla mawu a Mulluku vawi muniiwellella ehuddihwaanyu.

⁷ Awoottha nyu! Yesaya aallotella ddawoona dda nyuwaano eerilleeye,

⁸ Mulluku aallota wi, ‘Athwaalla enakititimiha miyaano ni vayanonive, koma mirima ddiwa ddoorekamellana ni miyaano.

⁹ Khaddinna mutteko wi ekillapelleke, kaambiiwa enahuddiha malamulo a athu wonanko tti malamulwaaka.’ ”

Ddeko ddinamuripiha muthu

¹⁰ Vano Yesu aawiithana athwaalle nave aallota wa yaayo wi, “Iwani nave mwiiwesese!

¹¹ Khe ello eyo enavollowa muwano mwa muthu enamuripiha vamiitthoni va Mulluku koma eyo enukhuma muwano mwaye sika enamuripiha.”

¹² Vano oohudderaalle yaawa wa olliye ellota wi, “Munnadduwella wi Afarisaalle yaasha murima ni nnddo mwaallotilleenyu?”

¹³ Yesu ahaakhulla wi, “Afarisaalle tti wonanko ddoomella ddoohaalliwa nave Attiitthaaka ooddullu eneeromutulla arive muthu a yaayo.

¹⁴ Muhaapwatheke! Yaayo tti oohoollella oohoona owaahoollella akhwiiwa oohoona. Vano oohoollella oohoona amuhoollella oohoona mukhwaaye, eelli attheene eneeromorihellana munllitini.”

¹⁵ Nave Petro aallota wi, “Munittaphullelle nnddo mwaallotilleenyu dda ddeko ddoomuripiha muthu.”

¹⁶ Yesu aallota wi, “Nanyeenettho khamuniiwesesave?

¹⁷ Khamunadduwella wi erive ello yoovollowa muwano enaya m'mirimani nave vano ennakhuma etathilliwa?

¹⁸ Nave mawu ookhuma muwano mwa muthu enavenyera m'murimani, alla sika enamuripiha.

¹⁹ Vawi m'murimani munnavenyera maganizo oonanara, wiipha, oraruwa, wiiya, omboni wawoottha ni oweerella amodda epewe.

²⁰ Ddenndda sika ddinamuripiha muthu. Koma ocha muhinawille m'mattani khonamuripiha muthu.”

Echikhulupililo ya mutthiyana

²¹ Yesu aavenyawo wenko aya o echigawo yowaatamana ni muzinda wa Tiro ni wa Sidoni.

²² Mutthiyana o Kanani ookhalla o ezigawo dda wenko, aawa wa olliye. Aakhuwa wi, “Mukeerelle echifundo, Apwiya, Edduullu ya Davide! Mwanaka aamutthiyana ookhalla ni munepa woonanara.”

²³ Koma Yesu khaamwaakhullalle naari vang'ono. Oohudderaaye yaaphiya wa olliye emuveka wi, “Mumulleelle avenyevo kaambiiwa animanyakulla vatulli vahu.”

²⁴ Vano Yesu ahaakhulla wi, “Mi kaarumihiwa wa Aisraeleve ayo eri wonanko enkhosa ddoohollowa.”

²⁵ Koma mutthiyanooyo aawa wa olliye nave amukokhorella allota wi, “Apwiya, kikavihereni.”

²⁶ Yesu ahaakhulla wi, “Khe yaphaama okusa yoocha ya anamwani waavokhella anapwa.”

²⁷ Koma mutthiyanooyo ahaakhulla wi, “Ddawoona, Apwiya naari anapwa ennacha ddoohalla ddoomora ovenyera vatebuloni va apwiiwa.”

²⁸ Vano Yesu aamwaakhulla wi, “We tti mutthiyana a echikhulupililo yuullupalli. Onapaalleewe eneereweereya wa weyaano.” Enthawi yeeyo mwanaye a mutthiyanoolle aachirihiwa.

Yesu anaachiriha athu anchichi

²⁹ Vano Yesu aavenya wenko, eeta mukhwipi mwa enyanja ya Galileya.* Aawella mwaango akeraatthi wenko.

³⁰ Athu anchichi yaawa wa olliyooyo ni athu ookhwa meto, oohoona, oorakalla eziwalo, oohillota ni amodda oovoriiwa anchichi. Yahaahiya vahoollo vaye nave ahaachiriha.

³¹ Athu yaattikhina voowoonani oohillota ellotaka, oorakalla eziwalo echiraka, ookhwa meto yeetaka ni oohoona yoonaka nave yaamutitimiha Mulluku a o Israele.

Yesu anachiha mulloko wa athu mmodda muullupalli

³² Vano Yesu aawiithana oohudderaaye allota wi, “Athwaalle ennakimoriha ethakaraka kaambiiwa aakhalla ni miyaano mallapo mararu nave khenna ello yoocha. Nginapaalla waarumiha owaniwa eri ni ettalla kaambiiwa eneerongomowella muttilla.”

³³ Oohudderaaye yaamukoha wi, “Tti wuuwi ohakani wuno nineereehu naphwanyewo yoocha yawi nichihe mulloko wa athu yoolla?”

³⁴ Yesu ahaakoha wi, “Murina mitthi dda buledi mikavi?” Yahaakhulla wi, “Mitthi mitthanu ni miilli ni ehomba dding'onong'ono ddooyeva.”

³⁵ Yesu aalamulella mullokooyo wi okeraatthi vatthi.

³⁶ Vano aakusa mitthi dda buledi mitthanu ni miillinnddo ni ehombanndde avekella omuthokoza Mulluku, amumeyameya buledooyo. Vano aawinnya oohudderaaye wi emuvelleelle wa athwaayo.

³⁷ Attheenaayo yaacha, evona. Yaatotella ddoohalla nave ddoohalla ddaaddalla mitaanga mitthanu ni miilli.

³⁸ Allopwana ayo yaachille yaari 4,000, ohiweerenga atthiyana ni anamwani.

³⁹ Nave Yesu aapallallesilleeye athwaalle, olliye aawella mukallawani aya o echigawo ya Magadani.