Mateyu 14 - Mawu a Mulluku

Okhwa wa Yohane Oobatiza

¹ Enthawi yeeyo Herode,* oolamulella a o Galileya, ahiiwa dda epilli ya Yesu.

² Ahaalleella allupa muttekwaaye wi, “Yoolla tti Yohane, avenyille wa ookhwa. Ekaamba ya yeella annawora weera ddoottikhiniha.”

³ Vawi khalle, Herode aalamula wi Yohane amakiwe nave yammaka emuhiya mundende. Aheera ddenndda ekaamba ya Herodiyasi, mwaara a mwanamunne, Filipo.*

⁴ Vawi Yohane aanamulleella Herode wi, “Khaddinaakhullelliwa ni malamulwaahu vawi weyaano woomutthella mwaara a mwanamunno olliyooyo ahinakhwe.”

⁵ Sika Herode aanapaalla omwiipha Yohanooyo koma awoova athu kaambiiwa alliwaayo yamweera namallotella.

⁶ Va nllapo nawuupuwella oyariwa wa Herode, olliyoolla aahakallallana mwaana aamutthiyana a Herodiyasi kaambiiwa ahinna vahoollo va athu attheene.

⁷ Sika aamusimikizella wi, “Kinimallupella wi erive ello onaakivekeewe kineerewuuvaha!”

⁸ Vano moorumiwa ni amennya, aaveka wi, “Mukivahe vaava muru wa Yohane ori mumbaleni!”

⁹ Vano Herode aamoriwa ethakaraka koma ekaamba yawi aallupella vamiitthoni va alletwaaye attheene, aalamula wi yoopaallaaye avahiwe.

¹⁰ Sika aalamula wi Yohane aphaddiwe muru mundende.

¹¹ Muroolle waakuselliwa mumbaleni mulle avahiwa mwaanoolle ayaana wa amennya.

¹² Oohuddera a Yohane yaawa ekusa mutembo yawuvittha mu mahame nave yaaya yamulleella Yesu.

Yesu anachiha mulloko muullupalli wa athu

¹³ Yesu iiwalleeye dda mwaha wa Yohane, aavenyavo awella ekallawa aya akhalla ohakani, onipuroni na yeekhaaye. Koma athu yiiwalliiwa ya yeella, yaavenya m'matawoni mwiwa emuthwara, vaweetani vatthi.

¹⁴ Yesu akhumalleeye mukallawanimmo, aawoona mulloko wa athu muullupalloolle nave ahaamorella ethakaraka nave ahaachiriha oovoriiwiiwa.

¹⁵ Misikuwa yaayo oohudderaaye yaawa ellota wi, “Nndduwa noovollowa nave mva tti vahakani va weekhiihu. Sika mwaalleelle athu eye m'mizi wi yakulle ddoocha ddiwa.”

¹⁶ Koma Yesu awaakhulla wi, “Tti woohipaalleya wi evenyevo. Nyuwaano mwaavahe yoocha!”

¹⁷ Yaamwaakhulla wi, “Kheninna erive ello vaava koma niri ni mitthi dda buledi mitthanu ni ehomba piilli.”

¹⁸ Yesu aallota wi, “Wannani ddennddo wa miyaano vaava.”

¹⁹ Ahaalamula athwaalle wi ekeraatthi vamanasini. Vano aakusa mitthi dda buledi mitthanu ni ehomba piillinndde, aweha oddullu, avekella omuthokoza Mulluku nave amumeyameya buledooyo. Vano aawinnya oohudderaaye wi emuvelleelle wa athu.

²⁰ Attheenaayo yaacha evona. Nave oohudderaayo yaatotella ddoohalla eddalliha mitaanga khumi ni miilli.

²¹ Allopwana ayo yaachille yaari 5,000, ohiweerenga atthiyana ni anamwani.

Yesu aneeta vamaaddini

²² Enthawi yeeyo Yesu ahaalamulella oohudderaaye wi ewelle mukallawani nave ehoolle oya okhopella wa enyanja, vaavottho ahaalleella athwaalle wi eroweke.

²³ Aapallallesille athwaalle, aawella m'mwaangoni wi avekelle yeekhaaye. Voophiyani mahiiyu, Yesu aakhalla wenko yeekhaaye.

²⁴ Vano enthawi yeella ekallaweelle yaari erekamellane ni mukhwipi mwa enyanja, ekakhiwaka ni mafunde kaambiiwa ephevweeyo yaawa mwawoopanana.

²⁵ Ohinase enthawi eri variyari va 3 koloko ni 6 koloko, Yesu aawa wa oohudderaalle eetaka va enyanja.

²⁶ Yamoonilliiwa eetaka va enyanja, yahoova. Ellota wi, “Tti mutthowa!” Nave yaakhuwa ni woova.

²⁷ Enthawi yeeyo Yesu aallota wa alliwaayo wi, “Llipani murima! Tti miyaano, muhoove.”

²⁸ Nave Petro aamwaakhulla wi, “Apwiya, mwaari muri nyuwaano, kilamulelleni wi keete vamaaddini kiwe wanyuwaano.”

²⁹ Yesu ahaakhulla wi, “Waawo!” Sika Petro aakittha mukallawani mulle aamba weeta vamaaddini valle oya wa Yesu.

³⁰ Koma oonilleeye ephevo ya masiva ahoova nave aapwina m'maaddini mulle. Aakhuwa wi, “Apwiya, kivulluseni!”

³¹ Enthawi yeeyo Yesu ahookolla nnatta naye amuphara amulleella wi, “We muthu eechikhulupililo yooyeva! Kaambiiwa tini wakayikeewe?”

³² Nave yawenllewa mukallawanimmo, ephevweeyo yaamaalla.

³³ Vano oohuddera ayo yaari mukallawani mulle yaamullapella Yesu, ellota wi, “Ddawoona, kinimuulleellani wi nyuwaano tti Mwaana a Mulluku!”

Yesu anaachiriha athu oovoriiwa o Genesareti

³⁴ Nave yaallapuwa enyanja ephiya o echigawo ya Genesareti.

³⁵ Nave athu a wenko yamoonilliiwa yaavuwiha epilli mu echigawo ettheene kaambiiwa yaamudduwella. Vano yaawaana wa olliye athu oovoriiwa oovenyera mu echigawo ettheene.

³⁶ Yaamuveka yooyo wi awaakhullelle oovoriiwaalle ettannye mukhwipi mwa yawiikhuneellaaye. Nave attheene yattannyillaayo yaachirihiwa.