Mateyu 13 - Mawu a Mulluku

Niphwanaphwaniho na mullupa oomidda

¹ Nllapo nenno Yesu aakhuma mpammo aya akeraatthi mukhwipi mwa enyanja wi ahuddiheke.

² Mulloko wa athu oyo watthukumanne moomwaapheella waari muullupalli sika aawella mu ekallawa akeraatthi mwemmo nave mullokooyo wiimenlle mukhwipi mwa enyanja.

³ Ahaalleella ddeko ddinchichi m'maphwanaphwanihoni. Aallota wi, “Enthawi emodda waakhalla muthu ayiille woomidda mmiddo.

⁴ Amiddeeye mmiddooyo, mmodda wamorenlle muttilla nave epallame ddaawa ddiwuchamo.

⁵ Mmiddo mmodda wamorenlle vamallukuni mvo vaari ethaya yooyeva. Mmiddooyo waamella mwawaakuva kaambiiwa ethayeeyo kheyaari yinchichi.

⁶ Koma nndduwa nakhumalliiwa ddoomella dding'onong'ononnddo ddaanyaalla ni wumma kaambiiwa misisi ddiwa khaddaayiille vatthi mookwakhwana.

⁷ Mmiddo mmodda wamorenlle variyari va miiwa, miiwannddo ddahunnuwa ddikhwaranya ddoomella dding'onong'ononnddo nave ddaaddikhuneella.

⁸ Mmiddo mmodda wamorenlle va ethaya yaphaama nave ddoomellannddo ddahimma ezipaso, ddimodda 100, ddimodda 60, ddimodda 30.”

⁹ Vano Yesu aamallihella ni ollota wi, “Ngiiwani vano mwaarina maaru awiiwana!”

Yoolinga ya maphwanaphwaniho

¹⁰ Vano oohuddera yaaphiya wa Yesu nave yaamukoha wi, “Kaambiiwa tini athwaalla munaallotella m'maphwanaphwanihoni?”

¹¹ Nave ahaakhulla wi, “Wa nyuwaano woovahiwa odduwella ddookhuweya dda omwene wa Mulluku koma wa alliwaayo khonavahiwe.

¹² Vawi muthu arina odduwella aneerovahiwa wawaanjerera sika aneerokhalla ni wawaata. Koma muthu oyo ahinna odduwella aneerewaakhiwa naari ong'onong'ono ariiyena.

¹³ Kinaallotella m'maphwanaphwanihoni kaambiiwa ennaweha koma khenoonesesa, enniiwa koma kheniiwesesa.

¹⁴ Vano yookwakhwanihiwa m'makhallellwiiwa eyo Yesaya allotenlleeye wi, ‘Ddawoona, kinimuulleellani wi, wiiwa munniiwa koma khamuniiwesesa, woona munnoona koma khamudduwellesesa.’

¹⁵ Umiha mirima dda athwaalla, khoowiha maarwiiwa, minyalliha miitthwiiwa wi ehoone ni miitthwiiwa, ehiiwe ni maarwiiwa, ehidduwelle ni murimiiwa nave ehirukunuwe murima wi echirihiwe.”

¹⁶ “Koma miitthwaanyu yoodalisiwa vawi ennoonesesa navettho maarwaanyu yoodalisiwa vawi eniiwesesa.

¹⁷ Ddawoona kinimuulleellani ddawoona wi, anamallotella anchichi akhalle ni athu oolungama anchichi akhalle yaapaalla woona munooneenyundda koma khayaawoonille nave wiiwa muniiweenyundda koma kheyaawiiwalle.

Ottaphullella niphwanaphwaniho na mullupa oomidda

¹⁸ “Vano ngiiwani ottaphullella wa niphwanaphwaniho na mullupa oomidda.

¹⁹ Athu attheene eniiwa othenga wa omwene koma kheniiwesesa, tti wonanko mmiddo wamorenlle muttilla. Oonanarooyo, annawa awaakha othenga woomiddiwa m'murimani mwiwa.

²⁰ Mmiddo wamorenlle vamallukuni onaphwanaphwana ni athu ayo eniiwa othenga nave enthawi yeeyo enawaakhella moohakallalla.

²¹ Koma enakhalla wonanko ddoomella ddoohikhalla ni misisi nnddo ddihinallekella onyaalla. Vawi ddookatamiha ni ddoohoosa ddawa kaambiiwa enakhulupilila othengooyo, ennahiya enthawi yeeyo.

²² Mmiddo wamorenlle variyari va miiwa onaphwanaphwana ni athu ayo eniiwa othenga. Koma kaambiiwa ennaviheeriwa ni dda va ellapo ni okonda eyuuma, othengooyo onnakhuneelliwa sika khoniimma ezipaso.

²³ Koma mmiddo wamiddiwe va ethaya yaphaama onaphwanaphwana ni athu ayo eniiwa othenga ni owiiwesesa. Eniimma ezipaso, amodda ezipaso 100, amodda ezipaso 60 ni amodda ezipaso 30.”

Niphwanaphwaniho na nansongole

²⁴ Yesu ahaalleella niphwanaphwaniho nimodda. Aallota wi, “Omwene wa Mulluku tti wonanko mwaneena a nibanja oyo aamiddalle mmiddo waphaama m'matani mwaye.

²⁵ Koma mahiiyu amodda arive muthu akonaka mudanaaye aaya m'matani mulle, ammidda nansongole variyari va tirigooyo nave aathawa.

²⁶ Vano tirigooyo amenlleeye nave aambeeye wimma, nansongole aadduwanyeya.

²⁷ Sika allupa mutteko a mwaneena a emateeyo yaawa emulleella wi, ‘Apwiya, mmiddo mwaamiddalleenyu m'matani mwanyu mulle waari wa phaama, vano nansongole avenyere wuuwi?’

²⁸ Ahaakhulla wi, ‘Mudanaaka mmodda sika enre nndda.’ Vano allupa muttekwaalle yaamukoha wi, ‘Munapaalla wi niyeewo namutullemo nansongolooyo?’

²⁹ Koma ahaakhulla wi, ‘Iyaayi kaambiiwa mwaamutullaka nansongolooyo ttuumutullellattho nimodda ni tirigooyo.

³⁰ Muhiyeni tirigu ni nansongole ddinnuwelle nimodda ophiyera enthawi yoohata. Enthawi yeeyo kineerewaalleella athu oohata wi yaambe omutulla nansongole, emmake ereche ereche nave eddihelle viikho. Koma emutthukumanihe tirigooyo ni omuhella mukhokweni mwaka.’ ”

Niphwanaphwaniho na mmiddo woyevesesa

³¹ Yesu ahaalleella niphwanaphwaniho nimodda wi, “Omwene wa Mulluku tti wonanko mmiddo wa muteekho wa masitadi oyo muthu awumiddalleeye m'matani mwaye.

³² Mmiddo wa masitadi tti wooyevesesa ohiyana ni orive mmiddo koma wunnuwa onakhalla muullupalli ohiyana ni ddoomella ddittheddene. Onakhalla muteekho nave epallame ddinnamaka emphuru ddiwa mu enthambi ddiwa.”

Niphwanaphwaniho na Yisiti

³³ Yesu ahaalleellattho niphwanaphwaniho nimodda wi, “Omwene wa Mulluku tti wonanko yisiti oyo mutthiyana aamuttakanyihereeye ni othu wa tirigu munchichi ophiyera waafufuma muttheene.”

Ekaamba yoophariha mutteko maphwanaphwaniho

³⁴ Yesu aphariha mutteko maphwanaphwaniho voollotani ddeko ddittheddenenndda wa athu. Khaallota erive ello wa alliwaayo moohiphariha mutteko niphwanaphwaniho.

³⁵ Aheera nndda wi ddikwakhwanelle nnddo allotille namallotella Yesaya wi, “Kineerophariha mutteko maphwanaphwaniho kaallotaka. Kineerewaalleella ddeko ddoovittheya waambeella va ophatuwa wa ellapo yavatthi.”

Yesu anattaphullella niphwanaphwaniho na nansongole

³⁶ Yesu aahiyalleeye athwaalle, aavollowa mpa. Oohudderaaye yaawa ellota wi, “Nganilleelleni ottaphullella wa niphwanaphwanihonne na nansongole a m'matani.”

³⁷ Yesu ahaakhulla wi, “Muthu aamiddalle mmiddo waphaamoolle tti mi Mwaana a Muthu;

³⁸ emateelle tti ellapo yavatthi. Mmiddo waphaamoolle tti athu ayo eniiwellella malamulo a mu omwene wa Mulluku koma nansongoloolle tti athu ayo eniiwellella malamulo a Oonanarooyo.

³⁹ Nave mudani amumiddalle nansongoloolle tti Satana. Ohata sika omalla wa ellapo yavatthimva nave athu oohata sika angelo.

⁴⁰ Mmo nansongole anaatthukumanihiwiiwa ni ohelliwa munllo, emoddamoddave yeeyo eneereweereya va omalla wa ellapo yavattheella.

⁴¹ Miyaano Mwaana a Muthu kineerewaarumiha angelwaaka wi yaakhumihe mu omwenaaka athu oowaachimwiha akhwiiwa ni attheene aweera ddeko ddoonanara.

⁴² Nave eneerovokhelliwa vamunlloni wawoopiha, wenko eneerekewinlla ni okhuuriha miino.

⁴³ Vano athu oolungama eneerowala wonanko nndduwa mu omwene wa Attiitthiiwa. Ngiiwani vano mwaarina maaru awiiwana!

Niphwanaphwaniho na eyuuma yoovittheya

⁴⁴ “Omwene wa Mulluku tti wonanko eyuuma evitthiwe m'matani. Muthu ayiphwanya annayiivitthattho nave annahakallalla wawi annarowa akulliha ddeko ddaye ddittheddene. Eera ddiiddo annahokollweella akulla emateelle.

Niphwanaphwaniho na nlluku noowallamella mutengo wunchichi

⁴⁵ “Omwene wa Mulluku orittho wonanko mullupa malonda oyo anaashaasha malluku oowallamella mutengo.

⁴⁶ Aphwanya nlluku noowallamella mutengo, annaya akulliha ddeko ddaye ddittheddene akulla nlluku nenna.

Niphwanaphwaniho na nthavi na ehomba

⁴⁷ “Omwene wa Mulluku orittho wonanko nthavi nno navokhiwe mu enyanja ni ophara ehomba dda mitundu ddittheddene.

⁴⁸ Nthavinno naaddalla, awiipha ehomba yaananikakhella mukhwipi mwa enyanja nave ekeraatthi enatthoolla ehombannddo. Ddaphaama yaanaddihiya mu ddookusella koma ddoonanara yaanadditathilla.

⁴⁹ Ddinaakhallettho ddiidda va omalla wa ellapo yavattheella. Angelo eneeroowa nave eneerewaatthukumaniha athu oonanara ni waavenyihavo variyari va oolungama.

⁵⁰ Nave oonanaraayo eneerewaavokhella vamunlloni wawoopiha, wenko eneerekewinlla ni okhuuriha miino.”

Ehuddiho yanaanweene ni yakhalle

⁵¹ Yesu ahaakoha wi, “Moohiiwesesa ddeko ddittheddenenndda?” Yahaakhulla wi, “Ee.”

⁵² Vano Yesu ahaalleella wi, “Sika arive muhuddihi a malamulo* oyo anakhalla oohuddera a omwene wa Mulluku ari wonanko mwaneena a nibanja oyo anakhumiha ddeko ddanaanweene ni ddakhalle mu enyumba yoosungellamo.”

Yesu anakhootiwa o Nazareti

⁵³ Yesu amallihalle ohuddiha maphwanaphwaniho yaalla, aavenyawo wenko.

⁵⁴ Nave aphiyalle o etawoni yoowaniwa, ahaamba ohuddiha mu enyumba yamavekello. Nave ayo yamwiiwalle yaattikhina, ekoha wi, “Addikusalle wuuwi ezeru ddenndda ni ddoottikhiniha ddenndda?

⁵⁵ Khe mwaana a ookhoma mataboolle? Amennya khe Mariya? Nave asinne khe Yakobo, Yosefe, Simoni ni Yudasi?

⁵⁶ Ethiyo arokoriye attheene kheri nimodda ni hiyaano vaava? Aakusalle wuuwi ezeru ni ddoottikhinihanndda”

⁵⁷ Sika yaamukhoota. Yesu aallota wi, “Namallotella khanavahiwa olemu owaniwa naari nibanja naye. Koma anavahiwa olemu waweeta”

⁵⁸ Owaniwanko khaaweerillewo ddoottikhiniha ddinchichi kaambiiwa kheyaarina echikhulupililo.