Mateyu 12 - Mawu a Mulluku

Nikoho na dda nllapo na Sabata

¹ Nllapo nimodda na Sabata Yesu ni oohudderaaye yaheeta variyari va emata ddimodda dda tirigu. Oohudderaaye yaavolliwa ettalla, sika yahaamba okhoddolla makalla a tirigu enamucha.

² Koma Afarisi* amodda yoonilliiwa nndda, yaallota wa Yesu wi, “Khaddinaakhullelliwa ni malamulwaahu oohudderaanyu ophara mutteko va nllapo na Sabata vookhoddollani makalla a tirigu!”

³ Yesu ahaakhulla wi, “Khamweerengille nnddo Davide enreeye enthawi yeelle olliyooyo ni akhwaaye yavolliwiiwa ettalla?

⁴ Davide aavollowa mu enyumba ya Mulluku, amuchamo buledi oovelleelliwa wa Mulluku naari malamulo kheyaakhullelle wi olliyooyo ni akhwaaye emuche. Allupa mukuthove sika enaakhullelliwa omuchamo buledi yoolla.

⁵ Apaalle khamwaaweerengille m'malamuloni yaalla wi allupa mukutho khenathwarattho malamulo vawi enaphara mutteko mu enyumba ya Mulluku nllapo na Sabata? Koma tti oohichimwa.

⁶ Vano kinimuulleellani wi vookhalla mmodda vaava muullupalli ohiyana ni enyumba ya Mulluku.

⁷ Nave mawu a Mulluku eni, ‘Kinapaalla echifundo ohiri mukuthove.’ Mwadduwenlleke ottaphullella wa mawu yaalla, khamwaaweeruzeke wi aachimwa athu oohichimwa.

⁸ Vawi mi Mwaana a Muthu sika kiri mwaneena a nllapo na Sabata.”

Muthu a nnatta noorakalla

⁹ Yesu aavenyavo vanipuroni valle aya mu enyumba yamavekello.

¹⁰ Waakhalla muthu a nnatta noorakalla. Afarisi yapaalla wi emwiipe Yesu mullatu, sika yaamukoha wi, “Ethiyo tti wowaakhullelliwa ni malamulwaahu ochiriha va nllapo na Sabata?”

¹¹ Yesu ahaakhulla wi, “Muthu mmodda a nyuwaano arina enkhosa emodda nave yamorella munllitini noowallamella va nllapo na Sabata, khawa ayiphara ayikhumihamo?

¹² Muthu tti oopaalleyathi wunchichi ohiyana ni enkhosa! Sika vano tti wowaakhullelliwa weera ddaphaama va nllapo na Sabata.”

¹³ Vano aallota wa muthu oorakalla nnattoolle wi, “Okolla nnatta nawo.” Ahookolla nave naachirihiwa, ninaphwanaphwana ni nimoddanno.

¹⁴ Koma Afarisi yaakhuma nave yahiiwanana wi emwiiphe Yesu.

Oorumeyella ootthoolliwa a Mulluku

¹⁵ Yesu adduwenlleeye yiiwananiiwannddo, aavenyavo vanipuronimvo nave athu anchichi yaamuthwara. Ahaachiriha athu oovoriiwa attheene.

¹⁶ Koma ahaalamulella wi ehaalleelle amodda dda olliyooyo.

¹⁷ Nndda ddaakwakhwaniha nnddo namallotella Yesaya allotilleeye wi,

¹⁸ “Olla tti oorumeyellaaka oyo kamuthoollilleemi, kinamukondeemi ni ohakallallana wunchichi. Kineeromwinnya munepaaka, nave aneerollalleya dda echilungamwaaka wa athu a mitundu ddittheddene a ellapo yavatthi.

¹⁹ Khakangana ni muthu apaalle okhuwa, mawaaye kheyiiweya m'musewuni.

²⁰ Khawa inttaka epango yookhoromana, naari othiimiha enyali yoothuwa, ophiyera eerihalle echilungamo wi egonjihe ddeko ddittheddene.

²¹ Nave athu attheene a ellapo yavatthi enaamutiyereke olliye.”

Yesu ni Belezebulu

²² Vatulli viwa athu amodda yaawa wa Yesu ni muthu oohoona navettho oohillota kaambiiwa aakhalla ni munepa woonanara. Yesu anamuchiriha muthooyo, sika ahaamba woona ni ollota.

²³ Athu attheene yaattikhina ni ddaweera dda Yesu. Yaakohana wi, “Ethiyo yoolla ttuukhalla Edduullu ya Davide?”

²⁴ Koma Afarisi yiiwalliiwa nndda, yaallota wi, “Tti Belezebulu,* muullupalli a minepa ddoonanara, anamuvaha Yesu masiva ookhumiha minepa ddoonanara.”

²⁵ Koma Yesu aadduwella maganizwiiwa nave aallota wi, “Orive omwene wakawaneya va weekhiiwa ni owana, khollekella omalla. Navettho etawoni erive ettheene naari nibanja nakawaneya va weekhiiwa ni owana khanillekella omalla.

²⁶ Sika mulloko mmodda waawanaka ni mmodda mu omwene wa Satana, oyo ari Belezebulu, ddinooniha wi wookawaneya nave khollekella omalla.

²⁷ Miyaano kaakhumihaka minepa ddoonanara kaambiiwa Belezebulu sika anakivaha masiva aweerella ddenndda, vano anaavaha oothwarellellaanyu masiva ooddikhumiha ttaani? Ddineera oothwarellellaanyu ddineeroweeruzani wi nyuwaano tti oolakwa vookiphwanyellani mullatu.

²⁸ Koma kaakhumihaka minepa ddoonanara ni masiva a Munepa a Mulluku ddinnooniha wi omwene wa Mulluku woowa khalle wa nyuwaano.

²⁹ “Nave khaavo muthu anawora ovollowa mu enyumba ya muthu amasiva ni wiiyamo ddeko ddaye ahaambille ommaka muthu amasivooyo. Eera ddiiddo anniiya dda mpammo.

³⁰ “Muthu oyo ahiniiwanana ni miyaano, yooyo annakikhoota miyaano; navettho oyo ahinakikavihera waatthukumaniha athu mu omwene wa Mulluku yooyo annaamwaramwasa athu mu omwene wa Mulluku.

³¹ Kaambiiwa kinimuulleellani wi ttuuworeya okhululukelliwa athu erive yoochimwa naari ollota epewe, koma oyo anallotella epewe Munepa Waweella khawa akhululukelliwa.

³² Nave oyo anakillotella epewe mi, Mwaana a Muthu, aneerokhululukelliwa koma oyo anallotella epewe Munepa Waweella khakhululukelliwa enthawi yeella naari muhoollo.

Muteekho ni ezipaso ddiwa

³³ “Muteekho wawunnuwa phaama onniimma ezipaso ddaphaama nave muteekho wohunnuwa phaama khoniimma ezipaso ddaphaama. Muteekho onadduwanyeya ni ezipaso ddiwa.

³⁴ Nyu enowa! Munaawore mwawiidde ollota ddaphaama muri oonanara? Vawi eyano enallota nnddo ddiddanlle m'murimani.

³⁵ Muthu aphaama anakhumiha ddeko ddaphaama ovenyera m'murimani mwaye, emoddamoddave yeeyo muthu oonanara anakhumiha ddeko ddoonanara ovenyera m'murimani mwaye.

³⁶ “Kinimuulleellani wi va nllapo na echiweruzo muthu aneerewiipiwa mullatu va mawu mattheene oohikhalla ni mutteko ayo aallotilleeye.

³⁷ Vawi ni mawaanyu mullatwaanyu oneeroweetellani phaama apaalle khoweetellani phaama.”

Oveka echizindikiro

³⁸ Vano ahuddihi amodda a malamulo ni Afarisi amodda yaamulleella Yesu wi, “Ahuddihi, ninapaalla wi noone echizindikiro yoovenyera wa nyuwaano yawooniha wi Mulluku sika uurumihalleni.”

³⁹ Koma Yesu aawaakhulla wi, “Athu a mbadoolla tti oonanara ni oohiroromelleya, enakiveka echizindikiro. Kheyiivo echizindikiro enaavahiwiiwa koma ya namallotella Yona.

⁴⁰ Vawi Yona akhanlle m'mirimani mwa ehomba yuullupalli mallapo mararu otthaana ni mahiiyu, emoddamoddave yeeyo mi, Mwaana a Muthu, kinaakhalle vatthi va ethaya mallapo mararu otthaana ni mahiiyu.

⁴¹ Va nllapo na echiweruzo athu a Nineve eneerovenya vamodda ni athu a mbadoolla. Athu a o Ninevaayo eneerewaavaanyiha athu a mbadoolla kaambiiwa alliwa yaarukunuwa murima yiiwalliiwa ollalleya wa Yona. Vano kinimuulleellani wi vookhalla mmodda vaava muullupalli oomukhwaranya Yona.

⁴² Va nllapo na echiweruzo mwene aamutthiyana a ellapo ya Sheba aneerovenya ni athu a mbadoolla. Nave aneerewaavaanyiha kaambiiwa aheeta olendo woorekama ovenyera mu ellapwaaye wi iiwe ehuddiho ya ezeru ya Solomoni. Nave kinimuulleellani wi vookhalla vaava mmodda muullupalli oomukhwaranya Solomoni.

Ohokollowa wa munepa woonanara

⁴³ “Munepa woonanara wakhuma mwa muthu, onneeteeta m'mapuroni awumma waashaasha vawiithuuwella. Koma waahiphwanya,

⁴⁴ onnallota weekhiiwa wi, ‘Kinahokollweella onyumbani waka yakhalle! Nave wawa onaphwanya mpammo muri mooshelliwa ni moopotokosiwa phaama, moohikhalla ddeko.’

⁴⁵ Vano onnakhuma oya wakusa minepa ddimodda mitthanu ni miilli ddoonanara ohiyana ni olliyooyo nave ddinnawa ddivollowa ddinakhalla mwemmo. Vano muthooyo makhallellwaaye voomallihella ennakhalla oonanara ohiyana ni vawaamba valle! Nndda sika ddineereye wa athu oonanara amuttano.”

Amennya ni asinne a Yesu

⁴⁶ Yesu alloteeye wa athu, amennya ni asinne yaaphiya. Yahiimella vaatte, opaalla wi ellote ni olliyooyo.

⁴⁷ Vano muthu mmodda aallota ni olliye wi, “Amennyu ni asinninyu yiimenlle vaattemva nave enapaalla wi mwallotena.”

⁴⁸ Koma Yesu aamwaakhulla wi, “Amoowaaka ttaani? Asinnaka ttaani?”

⁴⁹ Eerille ddiiddo, ahaatthoonya oohudderaaye allota wi, “Alla sika amoowaaka ni asinnaka!

⁵⁰ Oyo aneera ddoopaalla dda Attiitthaaka ooddullu sika mwanamunnaka, murokoraka ni amoowaaka.”