Mateyu 11 - Mawu a Mulluku

Yesu ni Yohane Oobatiza

¹ Yesu amallihalle waalangiza oohudderaaye khumi ni eellaalle, aavenyawo wenko nave aaya woohuddiha ni ollalleya m'matawoni a wenko.

² Yohane Oobatiza iiwalleeye ari mundende dda ddeko Khrisitu eereeye, ahaarumiha oohudderaaye amodda wa yooyo wi yamukohe wi,

³ “Ethiyo nyuwaano tti oyo ninamutiyeraahu wi awe apaalle nimutiyereke mmodda?”

⁴ Yesu ahaakhulla wi, “Hokollowani mwamulleelle Yohane dda ddeko mwiiwalleenyu ni moonilleenyu.

⁵ Oohoona ennoona, ooheeta enneeta, athu amakate enneellihiwa, oohiiwa enniiwa, ookhwa ennavenyihiwa navettho othenga waphaama onnallalleyiwa wa athu oohoowa.

⁶ Nave oodalisiwa tti ayo ehinakhumuwa ni dda miyaano!”

⁷ Oohuddera a Yohane yarowiiwa, Yesu ahaamba ollota dda olliye wa mulloko wa athu wi, “Ethiyo mwayiilleenyu wa Yohane mu echipululu, mwapaalla moonewo tini? Muthu otikheyatikheya ni ephevo wonanko epango?

⁸ Ddaahiri ddiiddo, vano mwayiillewo wi moonewo tini? Muthu oowara ddoowara ddookotana? Iyaayi, athu oowara mwawi ddiidda enakhalla mu enyumba dda mamwene!

⁹ Vano mwayiillewo wi moonewo tini? Namallotella? Ddawoona, kinimuulleellani wi mwaamoonillewo ookhwaranya namallotella.

¹⁰ Vawi mawu a Mulluku enallota dda Yohane wi, ‘Kineeromurumiha amithengaaka vahoollo vanyu wi allime musewu wa nyuwaano.’

¹¹ Ddawoona, kinimuulleellani wi, khaavo muthu ooyariwa vatthimva ari muullupalli omukhwaranya Yohane Oobatiza. Koma oyo ari mung'onong'ono mu omwene wa Mulluku sika ari muullupalli omukhwaranya olliyoolla.

¹² Waambeella enthawi eyo Yohane allalleyeeye ophiyera ollello omwene wa Mulluku wookhalla owukiliwaka nave athu oowukilaayo enneeseesa wi yaakhe omwenooyo.

¹³ Ophiyera va enthawi ya Yohane, ehuddiho ya anamallotella ni malamulo a Mose yaallotella dda nnddo ddinaaweereye.

¹⁴ Nave mwapaalla okhulupilila othengiiwa, Yohane sika namallotella Eliya, oyo owa waye wallotelliwe.

¹⁵ Ngiiwani vano mwaarina maaru awiiwana!

¹⁶ “Vano kinaaphwanaphwanihere ni tini athu a mbadoolla? Enaphwanaphwana ni anamwani ookhalla mu misika. Amodda ekhuwaka wa akhwiiwa wi,

¹⁷ ‘Naawiipellani machipo a okwati koma nyuwaano khamwaawiinalle! Naawiipellani machipo a maliro koma nyuwaano khamwaawinllalle!’

¹⁸ Vawi Yohane awiilleeye, aahalla ocha* ni oohimuwirya vinyo nave athu yaallota wi, ‘Ookhalla ni munepa woonanara.’

¹⁹ Mi, Mwaana a Muthu, kiwiille kaacha ni omuwirya vinyo nave athu yaallota wi, ‘Ngamooneni, muthoolla tti oottutthuwa, oolezela, akhwaayettho tti ookhomiha misonkho ni amodda oochimwa!’ Komave ezeru dda Mulluku ddinooneya wi tti ddawoona oweella m'mittekoni ddiwa.”

Athu a m'matawoni oohirukunuwa murima

²⁰ Athu a m'matawoni mmo Yesu eereeye ddoottikhiniha ddinchichi yaari oohirukunuwa murima, sika ahaamba waahumullulla.

²¹ “Mookhalla ni otulli nyu athu a o Korazini naarittho o Betisaida vawi ddoottikhiniha ddeeriwe wa nyuwaano ddeeriweke wa athu aweera ddoonanara o Tiro ni o Sidoni, yaaweerorukunuwa murima khalle. Yaaweerowara eziguduli ni wiihella ntuura wooniha wi yoorukunuwa murima!

²² Ddawoona, kinimuulleellani wi, va nllapo na echiweruzo Mulluku aneeroweerella echifundo athu a o Tiro ni Sidoni ohiyana ni nyuwaano!

²³ Nave wa nyu athu a o Kaperenao, muneesa muneerowellihiwa ophiyera oddullu? Iyaayi Mulluku aneerewuukitthihani ophiya o gehena. Ddoottikhiniha ddeeriwe wa nyuwaano ddeeriweke wa athu a o Sodomu, muzinda yoolla waweerokhallavo ophiyera ollello.

²⁴ Koma kinimuulleellani ddawoona wi, va nllapo na echiweruzo Mulluku aneeroweerella echifundo athu a o Sodomu ohiyana ni nyuwaano.”

Waani wa miyaano wi mwiithuuwe

²⁵ Enthawi yeeyo Yesu aallota wi, “Attiitthaaka, Apwiya ooddullu ni ellapo yavatthi, kinimuutitimihani kaambiiwa mwaavittha ddeko ddenndda wa athu oohuddera ni eezeru muupullulla wa athu oohihuddera.

²⁶ Ee, Attiitthaaka, nndda ddeereye kaambiiwa ddahuuhakallallihani.

²⁷ “Attiitthaaka aakivaha ddeko ddittheddene. Khaavo muthu anamudduwellesesa Mwaana koma Attiitthinnyave sika enamudduwella. Nave khaavottho anaadduwellesesa Attiitthaaka koma Mwaana nave sika anaadduwella ni wa ayo Mwaanooyo anapaalleeye owuupullullella Attiitthinnya.

²⁸ “Waani wa miyaano attheenenyu ootopa ni oollemelliwa m'murimani mwanyu, miyaano kineerowiithuuwihani.

²⁹ Mukiiwellelleke miyaano wonanko eng'ombe ddatukhulla nigoli.* Navettho muhuddere wa miyaano kaambiiwa miyaano tti oomaalleya ni owiiyeviha, sika muneerewiithuuwa.

³⁰ Vawi nigoli nno kinuuvaheemini tti noovevuwa otukhulla navettho katundu oyo kinuutukhullihemini tti oovevuwa.”