Mateyu 10 - Mawu a Mulluku

Yesu anaarumiha oohuddera khumi ni eelli

¹ Yesu aawiithana oohudderaaye khumi ni eelli vamodda, aavaha olamulello wookhumiha minepa ddoonanara ni ochiriha ereta ddittheddene ni ddoovoriiwa ddittheddene.

² Manddina a amurummwa khumi ni eellaayo tti alla, awaamba, Simoni (ooromolliwa Petro) ni mwanamunne Andreya, Yakobo ni mwanamunne Yohane, anamwani a Zebedayo,

³ Filipo* ni Bartolomeyu, Tomasi ni Mateyu ookhomiha misonkhoolle, Yakobo mwaana a Alifeyu ni Tadeo.

⁴ Simoni a mulloko wa endale wa Azelote* ni Yudasi Isikariyoti oyo amuvelleelle Yesu.

Orumiwa wa oohuddera khumi ni eellaalle

⁵ Athu khumi ni eelli yaalla Yesu ahaarumiha ni malamulo awi, “Muhiyeewo o ezigawo dda athu ayo ehiri Ayuda naari o matawoni a Samariya.

⁶ Koma muye wa athu a o Israele ayo tti wonanko enkhosa ddoohollowa.

⁷ Khaweni mwallalleye wi, ‘Omwene wa Mulluku wohaatamella!’

⁸ Mwaachiriheke oovoriiwa, mwaavenyiheke athu ookhwa, mwaweelliheke athu amakate navettho mwakhumiheke minepa ddoonanara. Mwahaakhella moohillivella nanyeenettho mwaavaheke moohillivelliwa.

⁹ Muhikuse makobiri a golide, siliva apaalle makobiri a mutundu mmodda mu mathumbani mwanyu,

¹⁰ muhikuse nthumba na voolendoni naari malaya mamodda apaalle esapato naari ekopo. Allupa mutteko enaphwanella ovahiwa ddoopaalla ddiwa.

¹¹ “Vano mwaphiya mutawoni apaalle m'mizi mukoheseseke dda muthu oyo anaphwanella owaakhellani. Mwakhalle ni olliyooyo ophiyera muvenyillewo onipuroninko.

¹² Mwaavollowaka mpa mulloteke wi, ‘Murendelle okhalle ni nyuwaano.’

¹³ Athu a mpammo yawaakhellani phaama, ekhallekena murendellaanyu. Koma yaahiwaakhellani phaama murendellaanyooyo ohokollweelle wa nyuwaano.

¹⁴ Arive muthu aahiwaakhellani apaalle owiiwellellani, venyanivoni vanipuronimvo nave muttatthe nthupi omanyalloni wanyu.

¹⁵ Ddawoona, kinimuulleellani wi, va nllapo na echiweruzo, Mulluku aneeroweerella echifundo yinchichi athu a Sodomu ni Gomora, waakhwaranya athu a mu etawoni yeella.

Dda ohoosiwa wa amurummwa

¹⁶ “Kinuurumihani wonanko enkhosa variyari va enama ddawoopiha. Vano muchenjereke wonanko enowa nave mumaalleyeke wonanko ekhunda.

¹⁷ Chenjerani vawi vineerokhalla ayo enuumakeni nyuwaano ni wuukusellani vanthatoni namillatu nave eneerewuuwashullani mu enyumba ddamavekello.*

¹⁸ Nave muneerovelleelliwa wa oolamulella ni mamwene kaambiiwa nyuwaano tti oohudderaaka wi mwakhalle amboni a othenga waphaama wa yaayo ni athu ayo ehiri Ayuda.

¹⁹ Yuukusellani omillatuni, muhikhupanyeke wi munaaye mwallote tini apaalle munaallote mwawiidde vawi enthawi yeeyo Mulluku eneerewuulleellani yawi mullote.

²⁰ Vawi mawu munaalloteenywaayo khekhalla aanyu koma enaavenyere wa Munepa wa Attiitthaanyu ayo anallota mwa nyuwaano.

²¹ “Athu eneerewaakusa yaavelleelle asinniwa wowiiphiwa ni attiitthiiwa eneereweera emoddamoddave yeeyo wa aniiwa. Nave anamwani eneerewaawukila makhollwiiwa wi ewiiphe.

²² Athu attheene eneerowiitani kaambiiwa nyuwaano tti oohudderaaka. Koma oyo anaavillelle ophiya o mamallihello, aneerovulluwa.

²³ Yaawuuhoosakani mu etawoni emodda thawellani mu matawoni mamoddattho. Ddawoona, kinimuulleellani wi muhinamallihe ophara muttekwaanyu mu matawoni attheene a Israele, mi Mwaana a Muthu kinaakhalle kiwiille.

²⁴ “Oohuddera khanamukhwaranya muhuddihaaye nave kaporo khanaakhwaranya apwinnya.

²⁵ Tti wookwakhwanella wa oohuddera okhalla wonanko muhuddihaaye nave wa kaporo okhalla wonanko apwinnya. Mwaneena a nibanja aneeroromolliwa wi Belezebulu,* muullupalli a minepa ddoonanara, athu amodda a munibanjanimmo eneeroromolliwa manddina oonanara ohiyana ni nnddina nenna.

Oophwanella wooviwa

²⁶ “Muhiwooveke athu. Vano erive yawiipittheya eneerewuupullulliwa navettho erive yookhuweya eneerodduwanyeya.

²⁷ Nnddo kinuulleelleemini mwiipiphini nyuwaano munaphwanella muddiwulule vawooneya navettho nnddo muniiweenyu ddillotiwaka moonong'ona wa nyuwaano munaphwanella muddillalleye vaddullu va enyumba.

²⁸ Muhiwooveke ayo eniipha mwiillive koma khenawora wiipha munepa. Koma mumooveke Mulluku oyo anawora wiipha munepa ni mwiilleene mu gehena.

²⁹ Munnawora okulla epallame dda kattiitti piilli ni nikobiri nimodda. Nave naari kattiitti mmodda khanakhwa Attiitthaanyu ehinaakhullelle.

³⁰ Vano nyuwaanottho naari meehi mattheene a m'muruni mwanyu aheerengiwa.

³¹ Sika muhooveke, nyuwaano tti oopaalleyathi wunchichi ohiyana ni mulloko wa akattiitti anchichi!

Omwaakhullella apaalle omukhoota Khrisitu

³² “Sika arive muthu anaakhullella wi tti aaka vamiitthoni va athu, miyaanottho kineeromwaakhullella vamiitthoni va Attiitthaaka oddullu.

³³ Koma oyo anakikhoota vamiitthoni va athu miyaanottho kineeromuruna vamiitthoni va Attiitthaaka oddullu.

Dda murendelle ni ekhoto

³⁴ “Muhiganize wi koowa wi kuuvaheni murendelle va ellapo yavatthi. Naari mano, ngaawiille wi kuuvaheni murendelle koma ekhoto.

³⁵ Vawi miyaano kaawa weeriha anamwani aallopwana wi ewaneke ni attiitthiiwa, anamwani aatthiyana ewaneke ni ameewa, avokohi ewaneke ni akwegwawiiwa,

³⁶ adani a muthu enaakhalle a munibanjani mwaye.

³⁷ “Oyo anaakonda attiitthinnya apaalle amennya ohiyana ni miyaano khanaphwanella okhalla oohudderaaka, oyo anamukonda mwanaye aamullopwana apaalle mwanaye aamutthiyana ohiyana ni miyaano khanaphwanella okhalla oohudderaaka.

³⁸ Oyo ahinatukhulla mutandaaye anakithwara miyaano khanaphwanella okhalla oohudderaaka.

³⁹ Oyo anapaalla ovullusa okumaaye eneerowutathilla koma oyo anatathilla okumaaye kaambiiwa tti oohudderaaka eneerowuvullusa.

Ddoothuviwa

⁴⁰ “Oyo anawaakhellani nyuwaano anakaakhellattho miyaano, oyo anakaakhella miyaano annamwaakhellattho Mulluku oyo akirumalle.

⁴¹ Oomwaakhella namallotella kaambiiwa tti namallotella, aneerothuviwa moollikana ni namallotella. Nave oyo anamwaakhella muthu oolungama kaambiiwa tti oolungama, aneerothuviwa moollikana ni muthu yooyo.

⁴² Nave oyo anamuvaha mmodda mwa oohuddera oohambuwaalla naari kapu amaaddi oowirya ooriirya kaambiiwa tti oohudderaaka, kinimuulleellani ddawoona wi, aneerothuviwa.”