Mateyu 1 - Mawu a Mulluku

Ntthopoollo na makhollwaaye a Yesu Khrisitu

¹ Nna sika ntthopoollo na makhollwaaye a Yesu Khrisitu, edduullu ya Davide, oyottho aari edduullu ya Abrahamu.

² Abrahamu aamuyara Isaki, Isaki aamuyara Yakobo, Yakobo aamuyara Yuda ni asinne

³ Yuda aamuyara Perezi ni Zera ovenyera mwa mwaariye Tamara; Perezi aamuyara Ezironi; Ezironi aamuyara Ramu;

⁴ Ramu aamuyara Aminadabu; Aminadabu aamuyara Nashoni; Nashoni aamuyara Salimoni;

⁵ Salimoni aamuyara Bowazi ovenyera mwa mwaariye Rahabu; Bowazi aamuyara Obedi ovenyera mwa mwaariye Rute; Obedi aamuyara Yese;

⁶ Yese aamuyara mwene Davide. Davide aamuyara Solomoni akonille ni mwaara a Uriya;

⁷ Solomoni aamuyara Rehobowamu; Rehobowamu aamuyara Abiya; Abiya aamuyara Asa;

⁸ Asa aamuyara Yehoshafati; Yehoshafati aamuyara Yoramu; Yoramu aamuyara Uziya;

⁹ Uziya aamuyara Yotamu; Yotamu aamuyara Ahazi; Ahazi aamuyara Hezekiya;

¹⁰ Hezekiya aamuyara Manase; Manase aamuyara Amosi; Amosi aamuyara Yosiya;

¹¹ Yosiya aamuyara Yekoniya ni asinne enthawi eyo a Israele yaphariwiiwa oya mu ellapo ya Babiloni.

¹² Athwaalle ewiillewo o Babiloni, Yekoniya aamuyara Shalatiele; Shalatiele aamuyara Zerubabele;

¹³ Zerubabele aamuyara Abiyudi; Abiyudi aamuyara Eliyakimu; Eliyakimu aamuyara Azoro;

¹⁴ Azoro aamuyara Zadoki; Zadoki aamuyara Akimu; Akimu aamuyara Eliyudi.

¹⁵ Eliyudi aamuyara Eliyezara; Eliyezara aamuyara Matani; Matani aamuyara Yakobo;

¹⁶ Yakobo aamuyara Yosefe, mamune a Mariya, mwa oyo Yesu ooromolliwa Mesiya,* ayariweeye.

¹⁷ Sika waari mibado khumi ni misese waambeella va Abrahamu ophiyera va Davide navettho mibado khumi ni misese waambeella va Davide ophiyera enthawi yaphariwiiwa oya o Babiloni navettho mibado khumi ni misese waambeella enthawi yeeyo ophiyera oyariwa wa Mesiya.

Oyariwa wa Yesu Khrisitu

¹⁸ Oyariwa wa Yesu Khrisitu waari wawi amennya, Mariya, yaatomeliwa ni Yosefe koma ehinatthellane, Mariyooyo aaphwanyeya ari ni erukullu mwamasiva a Munepa Waweella.

¹⁹ Yosefe aari muthu oolungama nave khaapanlle omuwulliha muru Mariyooyo. Vano Yosefooyo aapaalla wi amulleelle Mariya erivo eelli wi echitomelweeyo emalle.

²⁰ Vano aganizeeye ello yeella, mungelo a Apwiya ahooneya wa Yosefe muullohani allota wi, “Yosefe, edduullu ya Davide, ohoove omutthella Mariya. Erukullu yeella tti ya masiva a Munepa Waweella.

²¹ Aneeromuyara mwaana aamullopwana nave aneeromuvaha nnddina nawi Yesu kaambiiwa aneerewaavullusa athwaaye o machimwiiwa.”

²² Ddittheddenndda ddeereyille wi ddikwakhwanelle nnddo yallotille Apwiya mwa namallotella wi,

²³ “Namwalli aneerokhalla ni erukullu nave aneeromuyara mwaana aamullopwana. Athu eneerekomuromolla wi Imanuele ottaphullella wi Mulluku ari ni hiyaano.”

²⁴ Vano Yosefe arurumuwalle moollikana ni mmo mungelo a Apwiya aamulleelleeye; aamutthella Mariya,

²⁵ koma khaakonillena ophiyera aamuyara mwaanooyo. Sika Yosefe aamuvaha nnddinanne nawi Yesu.