Masalimo 99 - Mawu a Mulluku

Apwiya mwene muullupalli

¹ Apwiya tti mwene, mitundu dda athu dditthukumelle! Ennakeraatthi variyari va akerubi,* ellapo yavatthi etikheye!

² Apwiya tti uullupalli o Ziyoni, eri vaddullu va mitundu ddittheddene dda athu.

³ Attheene etitimihe nnddina niwa nuullupalli ni nawooviwa! Alliwa tti aweella!

⁴ Nyu mwene amasiva, ookonda echilungamo, mookeraatthiha ddoollikana, weeruza woolungama mwa Yakobo.

⁵ Atitimiheni Apwiya Mullukwaahu, kokhorellani voonyingalla manyallwiiwa, alliwa tti aweella!

⁶ Mwa allupa mukuthwiiwa mwaakhalla Mose ni Aroni, Samuele aari mmodda awiithana nnddina niwa yaaninllella wa Apwiya, alliwa enawaakhulla.

⁷ Yaanallotana mu opoto amurapo, yaanasunga malamulo ni malangizo yaavahilliiwa.

⁸ Nyu Apwiya Mullukwaahu, mwaanawaakhulla, mwaari Mulluku owaakhululukella, koma oollaka mitteko ddiwa ddoonanara.

⁹ Atitimiheni Apwiya Mullukwaahu, allapelleni o mwaangwiiwa waweella, Apwiya Mullukwaahu tti aweella.