Masalimo 98 - Mawu a Mulluku

Apwiya oolamulella ellapo yavatthi

Salimo.

¹ Wiipelleni Apwiya nchipo nanaanweene, vawi aheera ddoottikhiniha. Nnattanatta niwa nohaapambaniha muwonwiiwa waweella wohaavullusa.

² Apwiya aadduwanyeyiha opambana wiwa, ahoonihella echilungamwiiwa vamiitthoni va athu amitundu ddittheddene.

³ Ahuupuwella echikondiiwa yoohisintheya ni ororomelleya wiwa o enyumba ya Israele. Athu a wookomella ellapo yavatthi otthewene ahoona ovullusa wa Mullukwaahu.

⁴ Nyu ellapo yavatthi ettheene, khuwellani moohakallalla wa Apwiya, wiipelleni moothapella machipo owaatitimiha.

⁵ Wiipelleni mowaatitimiha Apwiya ni zeze, ni zeze ipani machipo aphaama.

⁶ Khuwani vamiitthoni va mwene Apwiya, wiipelleni moollipihella ni mapallapata.

⁷ Enyanja ni ddittheddene ddiri mwemmo ddithurume, ellapo ni ddittheddene ddiri mwemmo ddikhuwe.

⁸ Mihinje ddoope matta, miyaango ddikhuwe vamodda moohakallalla

⁹ vamiitthoni va Apwiya vawi enimawa wi yeeruze ellapo yavatthi. Eneereweeruza ellapo ettheene mweechilungamo, mitundu ddittheddene moohiweha ekhove.