Masalimo 97 - Mawu a Mulluku

Apwiya oolamulella muullupalli

¹ Apwiya sika mwene, athu a va ellapo yavatthi ehakallalle, athu attheene a mukhwipi mwa enyanja ethapelle.

² Mirapo ni epiphi yuullupalli ddoowaapheella Apwiya, echilungamo ni echiweruzo sika ddikeraatthihalle omweniiwa.

³ Munllo onnahoolla, onnaashellelliha adaniiwa oowaapheella orive weko.

⁴ Ettariiwa ennawaliha ellapo yavatthi, ellapo ettheene ennoona nave ennatikheya.

⁵ Miyaango ddinnattotthowa wonanko nimphora vamiitthoni va Apwiya, Apwiya a ellapo yavatthi ettheene.

⁶ Ddamuddullu ddinnallalleya echilungamwiiwa, athu a mitundu ddittheddene ennoona ntitimiho niwa.

⁷ Attheene oollapella milluku ddawoottha, awiitikhulla ni mafano oohikhalla ni mutteko, ennawullihiwa muru. Nyu milluku ddittheddene, akokhorelleni Apwiya.

⁸ Nyu Apwiya, Ziyoni anniiwa nave annahakallalla, mizinda dda o Yuda ddinnathapella ekaamba ya echiweruzwaanyu.

⁹ Nyu Apwiya Amasiva Mattheene, tti oolamulella ellapo yavatthi ettheene, okhwaranya milluku ddittheddene.

¹⁰ Apwiya ennaakonda athu awiitana ni ddoonanara, ennasunga okumi wa athwiiwa oororomelleya, ennaavullusa m'mattani mwa athu oonanara.

¹¹ Owala onnaaphiyella athu oolungama, ooreera murima ennahakallalla.

¹² Nyu oolungama hakallallani mwa Apwiya, thokozani nnddina niwa naweella.