Masalimo 96 - Mawu a Mulluku

Apwiya mwene muullupalli

¹ Wiipelleni Apwiya nchipo nanaanweene! Wiipelleni Apwiya, nyu athu a va ellapo yavatthi ettheene.

² Wiipelleni Apwiya, titimihani nnddina niwa! Llalleyani dda ovullusa wiwa nllapo ni nllapo.

³ Llalleyani dda ntitimiho niwa wa athu a mitundu ddittheddene. Tthopoollani dda ddoottikhiniha ddiwa wa athu a ellapo ddittheddene.

⁴ Apwiya tti uullupalli, tti oophwanella otitimihiwa wunchichi, owoova okhwaranya milluku ddittheddene.

⁵ Milluku dda athu tti mafano koma Apwiya yaaphatusa ddamuddullu.

⁶ Ntitimiho ni omwene ddiri vamiitthoni viwa, masiva ni oreera ddiri mpa mwiwa.

⁷ Atitimiheni Apwiya, nyu athu a mitundu ddittheddene, akhullellani wi ntitimiho ni masiva tti ddayiwa.

⁸ Tthamallani ntitimiho na nnddina na Apwiya, wannani ddoovelleella m'mathatoni a enyumbiiwa.

⁹ Allapelleni Apwiya antitimiho ni aweella, tthukumellani vamiitthoni viwa, nyu athu attheene a va ellapo yavatthi.

¹⁰ Llalleyani wa mitundu ddittheddene dda athu wi, “Apwiya sika mwene. Ellapo yavatthi yaakeraatthihiwa moollipa, khewa etikheya. Eneereweeruza mitundu ddittheddene dda athu mweechilungamo.”

¹¹ Ddooddullu ddihakallalle, ddavatthimva ddithapelle, enyanja ni ddittheddene ddiri mwemmo ddithurume

¹² emata ni ddittheddene ddiri mwemmo ddihakallalle, miteekho dda muutthakoni ddiipeke moohakallalla

¹³ vamiitthoni va Apwiya, vawi enimawa wi yeeruze ellapo yavatthi. Eneereweeruza ellapo ettheene mweechilungamo, athu a mitundu ddittheddene mwawoona.