Masalimo 94 - Mawu a Mulluku

Mulluku aweeruza attheene

¹ Nyu Apwiya, tti Mulluku oohokollosella ddoonanara, nyu Mulluku oohokollosella ddoonanara, ddoonihelleni.

² Nyu aweeruza ellapo yavatthi, venyani, ahokolloselleni ookota ddawaaphwanella.

³ Ethiyo ophiyera niini, nyu Apwiya, ophiyera niini athu oonanara enaawiitthamallekiiwa?

⁴ Attheene aweera ddoonanara ennallota mwawiitukhulla, ennakota.

⁵ Nyu Apwiya, ennaanyenya athwaanyu, ennahoosa yoohallanaanyu.

⁶ Ennawiipha anaamukhwelle ni alleto, enawiiphattho akhwaadduni.

⁷ Vano ennallota wi, “Apwiya khenoona, Mulluku a Yakobo, khanadduwella.”

⁸ Nyu athu ookarangeya, iwesesani, nyu oolloddowa, ethiyo munaakhalle ni ezeru niini?

⁹ Ethiyo oyo aphatusalle maaru, khaniiwa? Ethiyo oyo apangille miittho, khanoona?

¹⁰ Ethiyo oolangiza mitundu dda athu khanallaka? Ethiyo owaahuddiha athu attheene khanna ezeru?

¹¹ Apwiya ennadduwella maganizo a athu wi tti oohikhalla ni mutteko.

¹² Nyu Apwiya, oodala tti muthu oyo munamulangizeenyu, oyo munamuhuddiheenyu malamulwaanyu.

¹³ Munnamwiithuuwiha mallapo a ddoohoosa ophiyera oonanara akatelliwe nlliti.

¹⁴ Apwiya kheyaahiya athwiiwa, khetathilla yoohallaniiwa.

¹⁵ Echilungamo eneerohokollweella o echiweruzo, athu aweella murima eneeroyithwara.

¹⁶ Ethiyo ttaani anaallipe murima wi akivaddere ekhoto ni oonanara? Ethiyo ttaani anaakhalle o embalaaka wi allipane ni aweera ddoonanara?

¹⁷ Apwiya yahikikavihereke, ddaano kiviralle o ellapo ya oohillota.

¹⁸ Kaganizeemi wi, “Nnyallo naka ninnaserenguwa,” echikondaanyu yoohisintheya yaakiseera.

¹⁹ Okhupanya m'murimani mwaka waawaataka, ddookhurumusa murima ddanyu ddinnakihakallalliha.

²⁰ Ethiyo oolamulella oonanara ttuuwaattana ni nyuwaano, ayo enakhoromaniha malamulwaanyu?

²¹ Aatthukumanella okumi wa oolungama, enakamulla wi oohikhalla ni mullatu yiiphiwe.

²² Koma Apwiya aatthattuwa mpandaaka, Mullukwaaka sika nlluku naka noothawellawo.

²³ Aneerewaahokollosella ddoonanara ddiwa, aneerowoononga ekaamba ya machimwiiwa. Ddawoona, Apwiya Mullukwaahu, eneerewaatthollosa.