Masalimo 92 - Mawu a Mulluku

Nchipo nootitimiha

Salimo. Nchipo na Sabata.

¹ Tti waphaama waathokoza Apwiya, wiipella nchipo nnddina nanyu, nyu Amasiva Mattheene.

² Tti waphaama ollalleya ohinase dda echikondaanyu yoohisintheya, mahiiyu dda ororomelleya wanyu,

³ voowiipani machipo ni echida ya enthambo khumi, gitala ni zeze.

⁴ Nyu Apwiya, mookihakallalliha ni ddaweera ddanyu, kinnakhuwa ni ohakallalla ekaamba ya mitteko dda mattaanyu.

⁵ Nyu Apwiya, mitteko ddanyu khe wunnuwa wiwa! Maganizwaanyu khe owallamella wiwa!

⁶ Muthu oohikhalla ni ezeru khanadduwella, muthu ookarangeya khaniiwesesa ddenndda.

⁷ Athu oonanara naari ephuweke wonanko manasi, oochimwa ddeko ddiweetelleke phaama, yayiwa tti echiwonongeko yoohimalla.

⁸ Nyu nyookha Apwiya tti Amasiva Mattheene wa enthawi yoohimalla.

⁹ Vawi ngoonani adanaanyu, nyu Apwiya, adanaanyu eneerewoonongeya, attheene aweera ddoonanara eneeropallalleya.

¹⁰ Koma moowelliha nnyaka naka wonanko enari, mookizoza makhura anaanweene.

¹¹ Miitthwaaka ahoona woonongeya wa adanaaka, maarwaaka ahiiwa winlla wa ookiwukila.

¹² Athu oolungama eneerophuwa wonanko mikwarangwa, eneerewunnuwa wonanko mikunguza dda o Lebanoni.

¹³ Tti wonanko miteekho ddawaalliwa mu enyumba ya Apwiya, ddoohakallalla m'mathatoni a Mullukwaahu.

¹⁴ Ennimma ezipaso naari dduulluvanlle enthawi ettheene ennaddalliwa ni maaddi ennarimbellella,

¹⁵ ennooniha wi Apwiya tti oolungama. Alliwa tti nlluku naka mwa alliwa khamuri yookhoromana.