Masalimo 91 - Mawu a Mulluku

Woothawella waka ni mpandaaka

¹ Muthu ookhalla mu mpanda wa Amasiva Mattheene, oyo anakhalla m'muuthuuchinaaya,

² aneerollota wa Apwiya wi, “Nyu tti woothawella waka ni mpandaaka, Mullukwaaka oyo kinamuroromelleemi.”

³ Eneerewuuvullusa wa musampha wa oosaya wa mullilli wootthollosa.

⁴ Eneerewuukhuneella ni muuphellwiiwa, oneerophwanya moothawellamo m'muuphelloni, ororomelleya wiwa onnateteza wonanko echishango.

⁵ Khawoovaka ddawoopiha dda mahiiyu ni mipaamba dda otthaana,

⁶ mullilli wa mwiipiphini ni ddawoononga dda otthaana.

⁷ Athu 1,000 ttuuwiiphiwa vakhwipi vawo, 10,000 o nnattanatta nawo koma ddawoopihannddo kheddiwaatamella.

⁸ Oneerekoweha ni miitthwaawo, oneerewoona mmo enaallakelliiwa athu oonanara.

⁹ Vawi waallota wi Apwiya tti woothawella wawo, Amasiva Mattheene tti mookhallamo mwawo,

¹⁰ ddoonanara khaddiwa dduumorella, ddawoopiha khaddiwa ddiphiya vakhuviru ni enyumbaawo.

¹¹ Vawi Apwiya eneerewaalamula angelwiiwa dda weyaano yuutetezeke mu ettilla ddawo ddittheddene.

¹² Eneerewuukaphullani ni mattiiwa wi manyallwaanyu ehiphoreye vamallukuni.

¹³ Oneerekonyingalla mukango ni evilli, oneerekonyingallella mukango ni enowa.

¹⁴ Kineeromuvullusa anakiwandeellella miyaano mweechikondi, kineeromuteteza kaambiiwa annadduwella nnddina naka.

¹⁵ Akiithana, kineeromwaakhulla, kineerokhalla ni olliye enthawi ya ddoohoosa, kineeromwaakiha ni omuvaha olemu.

¹⁶ Kineeromuvaha okumi woorekama, kineeromooniha ovullusa waka.