Masalimo 90 - Mawu a Mulluku

Nibukhu naneesese Masalimo 90—106 Dda Mulluku ni athu

Nivekello na Mose, oorumeyella a Mulluku.

¹ Nyu Apwiya, tti mookhallamo mwahu va mibado ddittheddene.

² Miyaango ddihinakhallewo, muhinaphatuse ellapo yavatthi ni vookhalla athu, waambeella enthawi yoohimalla wa enthawi yoohimalla, nyu tti Mulluku.

³ Munnaahokollosella athu onthupini nave munnallota wi, “Nyu anamwani a athu, hokollowani.”

⁴ Vawi miyakha 1,000 vamiitthoni vanyu ddiri wonanko oddillo ovirallenngu. Apaalle wonanko owehera wa mahiiyu.

⁵ Munnaakwekweresa athu wonanko maaddi, enakhalla wonanko olloha. Ohinase enakhalla wonanko manasi enattaphuruwa,

⁶ ohinase enattaphuruwa ni ohakallalla, misikuwa ennanyaalla ni wumma.

⁷ Nohoonongeya ni osha murima wanyu, ninnoopopiheya ni owaallaanyu.

⁸ Moohiya machimwaahu vamiitthoni vanyu, ddoonanara ddahu ddoovittheya mooddoonihella vaweella.

⁹ Vallethi mallapwaahu ennayeva ekaamba ya onanariwa wanyu, miyakha ddahu ddinnamalla wonanko ovuma omodda.

¹⁰ Miyakha dda okumaahu tti 70, nakhalla amasiva ttuukwakhwana 80. Koma miyakhannddo tti dda okhupanya ni okatamihiwa, ddinnamalla mwawaakuva, hiyaano ninarowa.

¹¹ Ethiyo ttaani anadduwella masiva a onanariwa wanyu ni owaallaanyu moollikana ni mmo munaphwanelleenyu wooviwa?

¹² Vano nihuddiheni weerenga mallapwaahu wi nikhalle ni murima weezeru.

¹³ Nyu Apwiya, hokollweellani wa hiyaano, munaananariwe ophiyera niini? Amorelleni ethakaraka oorumeyellaanyu.

¹⁴ Niddalliheni ni echikondaanyu yoohisintheya orive ohinase, nihakallalleke ni othapella mallapwaahu mattheene.

¹⁵ Nihakallalliheni wa mallapo manchichi moollikana ni mmo mallapo mwanihooselleenyu, moollikana ni miyakha nnddo noonilleehu yoonanara.

¹⁶ Onihani mitteko ddanyu wa oorumeyellaanyu, masiva antitimiho nanyu wa aniiwa.

¹⁷ Nyu Apwiya Mullukwaahu, muneerelle echifundo, mukeraatthihe nnddo nineereehu, ddawoona, mukeraatthihe mitteko dda mattaahu.