Masalimo 9 - Mawu a Mulluku

Omuthokoza Mulluku ekaamba ya echilungamwaaye

Wa oohoollella wiipa, voottakihani miipello a Muti Labeni. Salimo na Davide.

¹ Apwiya, kineerewuuthokozani ni murimaaka muttheene, kineerollota dda ddaweera ddanyu ddittheddene ddoottikhiniha.

² Kineerohakallalla ni othapella ekaamba ya nyuwaano, kineerewiipa otetheella nnddina nanyu, nyu Amasiva Mattheene.

³ Vawi adanaaka attheene ennathawa, ennakwakwatuwa ni okhwa mwaphiya.

⁴ Nyuwaano moosimikizella ohilakwa waka, mwakeraatthi va mpandwaanyu waweeruzella, munneeruza mweechilungamo.

⁵ Moohumullulla mitundu ddittheddene, moowoononga athu oonanara, khewa yuupuwelliwa wa enthawi yoohimalla.

⁶ Adanaahu attheene aatthollowa, matepiiwa tti a enthawi yoohimalla. Moopwanyulla mizinda ddiwa, kheddiwa dduupuwelliwa wa enthawi yoohimalla.

⁷ Koma Apwiya ennalamulella wa enthawi yoohimalla, ahiikaatthiha mpandwiiwa wi yeeruzeke.

⁸ Eneeruza ellapo yavatthi ettheene moolungama, ennakamulla millatu dda athu moohiweha ekhove.

⁹ Wa Apwiya tti woothawellawo athu oophittiwa, tti woovulluwellawo enthawi ya ddawoopiha.

¹⁰ Apwiya, ayo enuudduwellani ennuuroromellani, khamunamuhiya muthu oyo anawaashaashani.

¹¹ Wiipelleni Apwiya ookhalla o Ziyoni. Llotani ddaweera ddiwa wa athu attheene.

¹² Vawi oohokollosella nikhame, annawuupuwella oohoosiwa, khanatiwalla winlla wiwa.

¹³ Apwiya, mukeerelle echifundo, ngoonani enakihoosella ookiita. Munnakivullusa wi kihikhwe,

¹⁴ wi kithokoze mitteko ddanyu ddittheddene variyari va athwaanyu mu Ziyoni. Ddawoona, kinnahakallalla kaambiiwa mookivullusa.

¹⁵ Athu a mitundu ddimodda aamorella mu nlliti nno yakatilliiwa weekhiiwa. Nnyallo niwa nohaanga mu nthavi nawiipittheya nno yareyilliiwa weekhiiwa.

¹⁶ Apwiya aadduupullulla weekhiiwa vaweeruzani moolungama. Athu oonanara aamakiwa mu musampha wooreya weekhiiwa.

¹⁷ Athu attheene oonanara, mitundu ddittheddene ddimutiwanlle Mulluku ddineerooya o ellapo ya ookhwa.

¹⁸ Koma ohoowa khetiwalliwa wa enthawi yoohimalla, etiyerello ya oophittiwa kheyoonongeya wa enthawi yoohimalla.

¹⁹ Apwiya venyani, muthu ahuuvevulleni, weeruzeni athu a mitundu ddimodda vamiitthoni vanyu.

²⁰ Nyu Apwiya, woopopiheni athwaayo, athu a mitundu ddimodda edduwelle wi alliwaayothi tti athu.