Masalimo 89 - Mawu a Mulluku

Nchipo na dda ellapo va enthawi ya ddookatamiha

Endakatulo ya Etani Muezara.

¹ Nyu Apwiya, kineerewiipa moohimaalliha nchipo nootitimiha echikondaanyu yoohisintheya. Kineerollalleya ni vayanoni vaka dda ororomelleya wanyu o mibado ddittheddene.

² Vawi kinnallota wi “Echikondaanyu yoohisintheya yookeraattheya wa enthawi yoohimalla, ororomelleya wanyu tti yoollipa wonanko eddullu.”

³ Moollota wi, “Koopangana ni ootthoolliwaaka, koollupella wa Davide oorumeyellaaka wi,

⁴ ‘Kineerokeraatthiha edduullu ddawo wa enthawi yoohimalla, kineerosungella mpandwaawo woomwene mibado ddittheddene.’ ”

⁵ Nyu Apwiya, ddooddullu ddinnatitimiha ddoottikhiniha ddanyu, ororomelleya wanyu, m'mutthukumanoni wa aweella.

⁶ Ethiyo ttaani muddullu anaaphwanaphwane ni Apwiya? Ttaani mwa ooddullu enaphwanaphwaniiwana?

⁷ Mulluku sika anooviwa m'mutthukumanoni wa aweella, sika awoopiha waakhwaranya attheene oomwaapheella.

⁸ Ethiyo nyu Apwiya Mulluku Amasiva Mattheene, ttaani ari amasiva wonanko nyuwaano ororomelleya wanyu woowaapheellani?

⁹ Munnalamulella enyanja yoowalli, mafundiiwa yanyaruwa munnaakhurumusa.

¹⁰ Mwaamunyenya Rahabu wonanko mutembo, mwaahapallallesa adanaanyu ni muwonwaanyu wa masiva.

¹¹ Oddullu ni ellapo yavatthi tti ddaanyu, mwaakeraatthiha ellapo yavatthi ni ddittheddene dda mwemmo.

¹² Mwaaphatusa ompoto ni omwera, Tabori ni Heremoni ennatitimiha nnddina nanyu moohakallalla.

¹³ Nyuwaano mookhalla ni muwono wamasiva, nnatta nanyu tti na ekophollo, nnattanatta nanyu tti noopambana.

¹⁴ Eechilungamo ni echiweruzo sika ddikeraatthihalle omweniiwa. Echikondaanyu yoohisintheya ni ororomelleya wanyu, ddinnahoolla vamiitthoni vanyu.

¹⁵ Nyu Apwiya, oodala tti athu ayo enadduwella wuullapellani, ayo eneeta mu owala wa ekhovaanyu.

¹⁶ Ennahakallalla mallapo mattheene ekaamba ya nnddina nanyu, ennatemellella mwa echilungamwaanyu.

¹⁷ Vawi nyuwaano tti ntitimiho na masiviiwa, voonaakhullellani nnyaka nahu ninnapambana.

¹⁸ Yootetezellaahu enavenyera wa Apwiya, Aweella a Israele sika mwenaahu.

Lonjezo na Mulluku wa Davide

¹⁹ Khalle mwaallota oweella m'masomphenya wa athwaanyu oororomelleya wi, “Koomuwariha enduwira yoomwene muthu amasiva, koomuwelliha ootthoolliwa variyari va athu.

²⁰ Koomuphwanya Davide oorumeyellaaka, koomuzoza ni makhuraaka aweella.

²¹ Sika nnatta naka nineerekomuseera, muwonwaakattho oneerekomullipiha.

²² Adani khewa emugonjiha, athu oonanara khewa emukitthiha.

²³ Kineerewaanyenya adanaaye vamiitthoni vaye, kineerowiipha oowiitana ni olliye.

²⁴ Ororomelleya waka ni echikondaaka yoohisintheya eneerokhalla ni olliye, aneeropambana ekaamba ya nnddina naka.

²⁵ Kineerewunnuwiha omwenaaye ovenyera o Enyanja Yuullupalli ophiya o muhinje wa Yufurate.

²⁶ Olliye aneerokilleella wi, ‘Nyuwaano tti attiitthaaka, Mullukwaaka.’ Nyuwaano tti nlluku naka, oovullusaaka.

²⁷ Kineeromutthattusa mwanaka awaamba wi aakhwaranya mamwene mattheene a va ellapo yavatthi.

²⁸ Kineeromukonda enthawi yoohimalla ni echikondaaka yoohisintheya, echipanganwaaka ni olliye khetathiya.

²⁹ Kineerokeraatthiha edduullu ddaye wa enthawi yoohimalla, mpandwaaye woomwene wonanko mallapo ooddullu.

³⁰ Koma edduullu ddaye ddahiya lamulo naka, yaahithwara malangizwaaka,

³¹ yatathilla ehuddihwaaka, yaahisunga malangizwaaka,

³² kineerewaallaka ni ekopo ekaamba ya ddoolakwa ddiwa. Kineerewaawashulla ni muwashullo ekaamba ya machimwiiwa.

³³ Koma ngiwa kimuvenyihella echikondaaka yoohisintheya, ngiwa kikhalla oohiroromelleya wa olliye.

³⁴ Ngitathilla echipanganwaaka, ngisintha mawu ookhuma vayanoni vaka.

³⁵ Kaallupella omodda wi, ‘Vamiitthoni va nnddina naka naweella, ngiwa kimulleka Davide.’

³⁶ Edduullu ddaye khaddimalla wa enthawi yoohimalla, mpandwaaye woomwene oneerokhallawo enthawi ettheene wonanko nndduwa vamiitthoni vaka.

³⁷ Omwenaaye oneerokeraattheya wa enthawi yoohimalla wonanko mweeri, mbonaaka oororomelleya muddullu.”

Winlla ekaamba ya ogonjihiwa wa mwene

³⁸ “Koma vano moomutatthilla ni omuruna oozoziwaanyu,* olliye moomushella murima.

³⁹ Mootathilla echipanganwaanyu ni oorumeyellaanyu, moovokhella munthupini enduwiraaye yoomwene.

⁴⁰ Mookumulla esiri ddaye ddittheddene, mootthattusa mipanda ddaye ddoollipa matepe.

⁴¹ Attheene oovira ennamwaakha ddeko ddaye, athu oomwaapheella ennamunyemulla.

⁴² Mohaapaambaniha oomwiita, mohaahakallalliha adanaaye attheene.

⁴³ Ddawoona, mootturiha nsupada naye, khamwaamullipihalle vakhotoni.

⁴⁴ Moomwaakha ekopo yoomwene m'mattani mwaye, moomoriha mpandwaaye woomwene.

⁴⁵ Moomuulluvalliha mwawaakuva, moomuhuruwella ni owulliha muru.”

Nivekello na ovullusiwa

⁴⁶ Ethiyo ophiyera niini, nyu Apwiya, munaakiipitthelleenyu wa enthawi yoohimalla? Ethiyo owallaanyu onaakhare wonanko munllo ophiyera niini?

⁴⁷ Upuwellani wi mallapo a okumaaka tti ooyeva. Ethiyo mwaaphatuselle nivuddo athu attheene?

⁴⁸ Ethiyo ttaani anaawore okhalla ni okumi, woohikhwa, ovullusa okumaaye o ellapo ya ookhwa?

⁴⁹ Nyu Apwiya, eri wuuwi echikondaanyu yoohisintheya yakhalle mwamullupellelleenyu Davide va ororomelleya wanyu?

⁵⁰ Nyu Apwiya, upuwellani ovevulliwa wa mi oorumeyellaanyu, kookhalla kivillellaka m'murimani epewe yinchichi ya athu.

⁵¹ Nyu Apwiya, upuwellani wi enakivevullaayo tti adanaanyu, ennanyaambusa meetello a oozoziwaanyu virive veko anyinganlleeye.

⁵² Edaliseye Apwiya wa enthawi yoohimalla! Amen! Amen!